Amos 5:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Ia bar moghɨra kamaghɨn ifonge, Ikiavɨra Itir God Izamin Dughiar Ekiam, a bar zuamɨrama otogham. Iavzika! Ia bizir aghuir manamra dughiar kamɨn an gantɨ an otivam? Ia ti ghaze, dughiar kamɨn amɨnim ti ian tiragham. Bar puvatɨ. Amɨnir bɨrim a ikɨ kamaghɨra ikiam.

Amos 5:18 ပူးပေါင်းရင်းမြစ်များ

Joel 1:15

Bar guizbangɨra, dughiar kuram kɨran oveghangɨn otivam, kar Ikiavɨra Itir God Izamin Dughiar Ekiam. Kar Godɨn Gavgaviba Bar Itim, uan gavgavimɨn ivezir kuram gumazamizibar anɨngamin dughiam. Evzika! E uarira uarir apangkufi, dughiar kam, a bar moghɨra ikuvigham.

Joel 2:31

Eghtɨ aruem mɨtarmeghtɨ, iakɨnim ghuzimɨn mɨn otogham. Bizir kaba faragh otivightɨ, gɨn Ikiavɨra Itir God Izamin Dughiar Ekiam otogham. Dughiar ekiar kam otoghtɨ, gumazamiziba bar atiatigham.

Jeremaia 30:7

Iavzika! Dughiar bar kurar mam otivasava ami. Egha dughiar kam bar dughiar kurar maba bar adagh afira. Nan gumazamiziba, Israelia, me dughiar kamɨn osɨmtɨzir bar ekiam iniam. Eghtɨ kɨ ua me iniam.”

Malakai 4:1

Ikiavɨra Itir Godɨn Gavgaviba Bar Itim ghaze, “Ia deragh oragh. Dughiatam izɨtɨ, gumazamizir akaba batogha uan ziaba fava arazir kurabagh amiba, avir ekiam tuzibar isi moghɨn, otogh bar men isitɨ, me bar gevegham. Eghtɨ temer aguatam, o ter bitam ikian kogham.

Aisaia 9:19

Ikiavɨra Itir Godɨn Gavgaviba Bar Itim bar anɨngaghegha, nguazir kamɨn ruaghatevibar itir gumazamiziba bar me gasɨghasɨki. A mati avim ruarir ekiamɨn isia bar a gasɨghasɨghizɨ moghɨn, bar me gasɨghasɨki. Gumazamiziba uaghan vaghvagha men nɨghnɨzibar gɨn ghua, igharaz darazi dɨkabɨnasava ami.

Aisaia 5:30

Eghtɨ dughiar kamɨn, mɨdorozir gumaziba izɨ Judan kantri gasɨghasɨgham, egh me bar pamtemɨn dɨm nɨgɨnir dafam damuam, mati ongarim dɨpɨra iza ongarir dadarim gɨra tɨngazi. Eghtɨ gumazitam ian kantrin kamɨn gantɨ, a bar ikuvightɨ, ghuariar pɨziba aruemɨn angazangarim apazaghtɨ, kantrin kamɨn danganiba bar mɨtarmegham.

Aisaia 5:19

Ia kamaghɨn mɨgɨa ghaze, “E kamaghɨn orasi, Israelian Godɨn Bar Zuezim, a bizitamɨn e damusɨ egh a zuamɨram a damuam. Egh e kamaghɨn ganigh, an nɨghnɨzim gɨfogham.”

Joel 2:10

Me zuima nguazim mati mɨkɨmkɨzim a gɨnobazɨ a ivazvasi, ezɨ overiam mati God a gɨnobazɨ a nɨdi. Ezɨ aruem ko iakɨnim mɨtarmangizɨ, mɨkoveziba ua isir puvatɨ.

2 Pita 3:4

Me kamaghɨn ia dɨpovam, “Iesus ghaze, a ti ua izam, o? Egha a managh iti? A izan kogham. En ovavir ovengeziba ua dɨkavan kogham. Ezɨ biziba fomɨra nguazim otozir dughiamɨn iti moghɨn ikia iza datɨrɨkɨn.”

Esekiel 12:27

“Nguazir kamɨn gumazim, Israelɨn ikɨzim ghaze, ‘Esekiel, irebamɨn mɨn garir bizibar gara, egha gɨn otivamin bizibar mɨgɨrɨgɨabar gun mɨgei. Ezɨ bizir a mɨgeir kaba datɨrɨghɨn otivan kogham. Puvatɨ, da bar gɨn otivam.’

Esekiel 12:22

“O nguazir kamɨn gumazim, bizir tizim bagha Israelian gumazamiziba zurara akar otevir kam gami? Me ghaze, ‘Akam inigha izir gumaziba bizir gɨn izamibav gɨa ghaze, da otivam. Ezɨ azenir avɨriba iza zui, irebabar mɨn garir bizir kabar aven otivir akaba guizbangɨra otivir puvatɨgha pura zui.’ Ezɨ kɨ Israelian aghuzir akar kamɨn aghua.

2 Pita 3:10

Ekiam Izamin Dughiam zuamɨram otogham, mati okɨmakɨar gumaziba izi mokɨn. Eghtɨ dughiar kamɨn overiam afuaragh pamten tɨngaghegh bar gɨvagham. Eghtɨ bizir nguazimɨn itiba sara bar isigh ameregh gɨvagham. Eghtɨ nguazim ko an itir bizir me amiziba ua ikian kogham.

Jeremaia 17:15

Israelia kamaghɨn na dɨpova mɨgɨa ghaze, “E manadɨzoghɨn gantɨ, Ikiavɨra Itir God, bizir kurar a damuasava mɨkemezir kabar amutɨ, da otivam? A datɨrɨghɨn guizbangɨra dar amutɨ, da otivtɨ, e dar ganika!”

Godɨn Araziba 32:24

Kɨ me damutɨ mɨtiriaba men aghɨtɨ, me arɨmariar guar avɨrir igharagha gariba iniva arɨmɨghiram. Eghtɨ kɨ asɨzir atiar igharagha gariba ko kuruzir imezir kuraba itiba amangtɨ, da me giviam.

Aisaia 8:22

vɨn nguazimɨn gan, egh me bar bizir aghuitamɨn ganighan kogham. Bar puvatɨ. Me osɨmtɨziba ko dughiar kuramra danganiba bar da gan ikiam, mati amɨnirbɨrim bar me avara. Egh me osɨmtɨzim gitavɨragh arɨmangamin tuaviba puvatɨgham.

Aisaia 13:6

Ikiavɨra Itir God Izamin Dughiar Ekiam, a roghɨra izegha gɨfa. Kamaghɨn amizɨ, ia bar puvɨram aziva arang. Dughiar kamɨn, Godɨn Gavgavim Bar Itim, dughiar bar kuram amadaghtɨ a izam.

Jeremaia 13:16

Ia datɨrɨghɨn Godɨn akurvazimɨn angazangarim bagha garavɨra iti. Eghtɨ gɨn Ikiavɨra Itir God, angazangarir kam giraghtɨ, a mɨtarmer bar ekiamɨn otogham. Guizbangɨra, dughiar kuram otogham, mati Ikiavɨra Itir God ian nguibaba mɨtarmem dar anightɨ, ia mɨghsɨabar pɨn daruva asaghpor tintinibar iregham. Kamaghɨn, arazir kam faragha otivamin dughiamɨn, ia zuamɨra ziar ekiam isɨ Ikiavɨra Itir God, ian God, a danɨng.

Joel 2:11

Ikiavɨra Itir God uan mɨdorozir gumaziba Akar Gavgavim me ganɨdi, ezɨ an mɨgɨrɨgɨaba mati ararim dagarvasi. An mɨdorozir gumaziba bar avɨraseme, eghtɨ gumazitam me dɨponɨva avegham. Ikiavɨra Itir God Izamin Dughiar Ekiam, gumazamizibar amutɨ, me bar atiatigham. Eghtɨ tinara dughiar kamɨn aven mangɨ ikuvighan kogh, deravɨra ikiam? Ti puvatɨgham.

Obadia 1:15

Ikiavɨra Itir God ua kamaghɨn mɨgei: “Ikiavɨra Itir God Izamin Dughiar Ekiam, a roghɨra izegha gɨfa. Kar dughiar kɨ kantriba bar men gumazamizibar araziba tuisɨghamim. Ia Idomia amizir arazir kuraba, kɨ dar ia damuam. Osɨmtɨzir ia iniamim, kar arazir kurar ia amizibar ivezim.”

Aisaia 24:18

Eghtɨ gumazitam dughiar kurar kamɨn mɨgɨrɨgɨam bareghɨva arɨmangam, a torir ekiamɨn magɨrɨgham. Egh a uamategh anabogh arɨ mangɨsɨ, ivem gasagham. Guizbangɨra, overiam kuighirɨghtɨ, amozir ekiam nguazim giram. Eghtɨ nguazimɨn mɨngarim nɨgham.

Aisaia 58:2

Guizbangɨra, me nan ifongiam gɨfoghasa ifuegha, bizir kɨ damuasa mɨkemezibar aghuazir puvatɨgha, dughiabar zurara nan ziam fer arazibagh ami. Me ifara ghaze, me nan boroghɨra ikiasa bar akonge. Me ifara, arazir aghuibar deragh uari damuasa nan azangsɨsi. Bar puvatɨ, gumazamizir kaba bar moghɨra ifari. Me guizbangɨra akɨrim ragha nan akabagh asaragha arazir kurabagh ami.