Amos 5:11 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹¹ Ia onganarazibagh amir gumazamiziba dɨkabɨra men biziba pura dagh ekuava, men dagheba okei. Ia dagɨar gavgavibar dɨpenir aghuibar ingari, egh ia dɨpenir katamɨn ikeghan kogham. Ia wainɨn azenir aghuiba opari, egh ia azenir kabar wainɨn dɨpatabar ameghan kogham.

Amos 5:11 ပူးပေါင်းရင်းမြစ်များ

Sefanaia 1:13

Gumazir kaba, gumazir igharaziba izɨ men biziba okemegh, men dɨpenibagh asɨghasigham. Me dɨpenir igiabar ingarigh, dar ikian kogham. Egh wainɨn azenir me opariba, me dar wainɨn dɨpabar aman kogham.

Maika 6:15

Ia azeniba oparɨva, dar daghetam inighan kogham. Egh ia olivɨn ovɨziba dɨkabɨn da mɨrmɨr, egh olivɨn borer tam uan mɨkarzim daghuighan kogham. Egh ia wainɨn ovɨziba dɨkabɨn da mɨrmɨr, egh wainɨn dɨpatam ameghan kogham.

Godɨn Araziba 28:30

“Egh ia gumazitam bagh amizim ginabaghtɨ, gumazir kam an ikeghan kogham. Puvatɨ. Gumazir igharazim a gakaghon a gekuigh a ko dakuam. Ia dɨpenimɨn ingarigh, egh an ikeghan kogham. Ia wainɨn azenim oparigh, egh an ovɨzibar ameghan kogham.

Jems 2:6

Ezɨ ia akar aghumsɨziba onganarazibagh anɨdi. Ia nɨghnɨgh! Tina ia dɨkabɨra egha osɨmtɨziba ia garɨsi, egha ia mɨkɨrvagha kotiabar zui? Kar gumazamizir dagɨaba bar izɨvaziba arazir kabagh ami.

Hagai 1:6

Ia dagher avɨriba oparigha, dar dagher avɨriba isir puvatɨ. Ia apava izevir puvatɨ. Ia dɨpaba apava, kuariba ian pɨravɨra iti. Ia korotiaba ikia da aghuava, arugharughvɨra ikiam. Gumazir dagɨaba bagha ingara da isiba, da zuamɨra gefi, mati ia da isa dagɨavtarir toriba itibagh azui.

Maika 2:2

Ia gumazamizibar azenibar gara dagh ifuegha purama da isi darasi. Egha ia men dɨpenibar gara dagh aguava pura da isi. Ia ifavaribagh amuva, gumazamizibar nguaziba ko, biziba ko, dɨpenibar okei darasi.

Amos 3:15

Egh kɨ dɨpenir aghuir gumaziba dughiar orangtɨziba bagha ingarizibagh asɨghasɨgh, dɨpenir aghuir me aruem garir dughiamɨn avughsɨ ikiamibagh asɨghasigham. Egh dɨpenir me elefanɨn ataribar kurkeziba, kɨ bar da apɨrarightɨ da mɨnezir kɨnibar otivigham. Eghtɨ dɨpenir ekiaba bar moghɨra ikuvigham. Kɨ Ikiavɨra Itir God, kɨ kamaghɨn mɨkemegha gɨfa!”

Aisaia 16:10

Wainɨn azenir kaba, da fomɨra bar puvɨra be, ezɨ gumazamiziba da kuarir dughiamɨn, me bar akonge. Ezɨ datɨrɨghɨn bar akongezir arazir dɨmdɨar kam gɨfa, ezɨ gumazamiziba ua bar akongeghamin ighiabagh amir puvatɨ. Ezɨ gumazamiziba uam wainɨn itarir ekiamɨn, wainɨn ovɨziba mɨrmɨrir puvatɨ. Ikiavɨra Itir God men akaba dukuagha, me bar akongezir arazir dɨmdɨar kam agɨfa.

Esekiel 26:12

Ian apaniba ian dagɨaba okɨmɨva, ia dagɨaba bagha amadir biziba tintinimɨn da iniam. Me ian dɨvaziba akurarightɨ da irɨtɨ, me ian dɨpenir bar aghuiba akararigh bar adagh asɨghasigham. Egh me ian dagɨaba ko temeba ko nguaziba isɨ ongarimɨn da makunigham.

Amos 2:6

“Ia oragh! Ikiavɨra Itir God Akar Gavgavir kam ia ganɨga ghaze, Israelia arazir kurabagh amua ghuavɨra iti. Israelia uan namakabar amamangatɨzɨ, me pura men biziba inigha, ua da ikarvaghan iburaghburaki. Ezɨ Israelia pura uan bizir namakabagh anɨngizibagh nɨghnigha, gumazir kaba biziba amadi moghɨn me amadi, ezɨ gumazir ekiaba me givese. Ezɨ me pura gumazir ekiar kabar ingangarir gumazir kɨnibar ikiam. Ezɨ Israelia gumazir ekiar kaba da dagɨaba inigha, gumazir pura men bizir me da inizibar biziba ikarvasi. Gumazir men biziba pura da iniziba, mevzika, me osɨmtɨziba puvatɨ, ezɨ bizir me Israelia da pura iniziba dar ivezim ekevezir puvatɨ. Dar ivezimɨn dɨbobonim, dagarir asuamning givezamin dagɨabar ko magh ghue. Egha Israelia tong men apangkuvir puvatɨ. Kamaghɨn amizɨ, nan anɨngagharim guizbangɨra me bagha bar ekefe. Eghtɨ kɨ ivezir kuram me danɨngam.

Amos 3:9

Ia mangɨ, gumazir Asdotɨn nguibar ekiamɨn dɨpenir gavgavibar itiba, ko Isipɨn kantrin dɨpenir gavgavibar itiba, men diagh, akar kamɨn gun me mɨkemegh, “Ia bar mangɨ Samarian mɨghsɨabar uari akuvagh ikɨ, egh Samarian gumazamizibar gan, me bar onganigha atiatim uarira uarigh anɨdi. Egh men igharaz darazi dɨkabɨrir arazir kurar me amiba ia dar ganigh.”

Amos 4:1

Ia Samarian amiziba, ia akar kam baragh: Ia mati bulmakaun aghuibar mɨn grazir avɨrim apava ian mɨkarziba bar dera. Gumazamizir gavgaviba puvatɨziba, ia bar pazavɨra me gami. Egha ia osɨmtɨziba isa onganarazibagh amir gumazamizibagh anɨga, tong men apangkuvir puvatɨ. Egha ia uaghan uan pabar dia uari bagh wainɨn dɨpaba inigh izasa me mɨgɨa ghaze, “Ia wainɨn dɨpar avɨriba inigh izɨtɨ, e dar amɨ onganam.”

Amos 6:11

Ia oragh! Ikiavɨra Itir God mɨkɨmtɨ, dɨpenir ekiaba ko, doziba sara bar dɨpɨrighɨrɨ akuar muziaribar otivigham.

Amos 6:12

Ia ti ghaze, hoziaba dagɨar ekiabagh isɨn ivemaram? Egha ia ghaze, gumazim bulmakau inigh mangɨ, ti dagɨabagh isɨn mangɨ nguazim abɨgham? Ti Puvatɨgham. Arazir kaba da bar guizbangɨra puvatɨgham. Ia guizɨn arazibagh irazɨ, da ghua imezimɨn mɨn oto. Egha ia arazir aghuim gɨrazɨ, a ghua bizir kuramɨn mɨn oto.

Amos 8:4

Ezɨ Ikiavɨra Itir God ghaze, Israelia, Ia oragh. Ia Israelia, ia gumazamizir biziba oteveziba dɨkabɨra, egha gumazamizir onganarazir ian kantrin itiba ia me gasɨghasɨsi.

Maika 1:6

Kamaghɨn amizɨ, Ikiavɨra Itir God ghaze, “Kɨ Samarian nguibar ekiam gasɨghasigh, an mɨzumzuiariba azenan dar pozim mɨkɨnigham. Eghtɨ a wainɨn biar igiaba oparamin danganimɨn mɨn otogham. Kɨ an dɨpeniba bar da apɨrarightɨ, da dagɨar muziaribar otivigh ikiam. Eghtɨ dagɨar muziarir kaba irɨ poghpogh danganir zarimɨn magɨrɨ, dɨpenibar danganir faragha ikeziba avaraghan kogham.

Malakai 1:4

Eghtɨ Idomia kamaghɨn mɨkɨm suam, “En nguibar ekiaba ikuvigha gɨfa, ezɨ e uam adar ingaram,” eghtɨ Ikiavɨra Itir Godɨn Gavgaviba Bar Itim men akam ikaragh mɨkɨm suam, “Ia uam adar ingartɨ, kɨ da apɨrarightɨ da ua bar ikuvigham. Eghtɨ gumazamizir igharaziba, me Idomia ia mɨkɨm suam, ‘Me gumazamizir kuraba,’ egha ‘Me gumazamizir, Ikiavɨra Itir God zuraram atariba.’ ”

Ofa Gami 26:16

kamaghɨn kɨ bizitamɨn ia damuam. Kɨ zuamɨra ia damightɨ, ia bar ikuvigh bar atiatigham. Kɨ ia damutɨ, ia arɨmariar bar ekiaba iniva, ian mɨkarziba puv fengtɨ, ian damaziba okavightɨ, ian mɨkarziba nɨmɨra su magɨrɨ mangɨ bar ikuvigham. Ia azenibar dagheba opar, egh ia dar daghebar aman kogham. Apanibara, da ini dar amam.

Jopɨn Akɨnafarim 20:19

Guizbangɨra, me gumazamizir onganarazibar apangkuvir pu. Puvatɨ, me paza me gami. Me arazir ifavarir avɨribagh amua gumazamizir igharazibar dɨpeniba isi.

Esekiel 34:21

Ia sipsipɨn gavgaviba itiba, ia zurara sipsipɨn gavgaviba puvatɨziba uan komba ko, uan dapaniba ko, uan namnabar da munamadima, da tintinibar zui.

Hosea 9:2

Ezɨ kɨran oveghangɨn ia dagheba, ko wainɨn dɨpaba puvatɨgham.

Amos 2:7

Me gumazir gavgaviba puvatɨziba dɨkabɨra, onganarazibagh amir gumazamiziba batosi. Egha afeziar maba uan otariba ko me amizir vamɨra ko akua arazir kurabar a gami. Me kamaghɨn amua nan ziar aghuim gasɨghasɨsi.

Amos 9:14

Kɨ uan gumazamiziba Israelia inigh, uamategh men nguibamɨn mangam. Eghtɨ me uan nguibar ekiar ikuviziba akɨrigh, ua dar apiam. Eghtɨ me ua wainɨn ikarɨziba opar wainɨn dɨpabar amɨva dar amam. Egh me uam azenibar ingar dar dagheba iniva dar amam.