Amos 4:10 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁰ “Kɨ faragha Isipia bagha arɨmariar mam amadazɨ moghɨn, kɨ datɨrɨghɨn ian marazigh asɨghasɨghasa arɨmariar mam ia bagh anemada. Mɨdorozir dughiamɨn, kɨ apanibar amamangatɨzɨ, me ian gumazir igiabav soghezɨ me ariaghire. Kɨ ian apanibar amamangatɨzɨ, me ian hoziaba okeme. Gumazir ariaghirezibar kuaba, kɨ dagh amizɨ, dar mughuriar kuraba ian fetoribar aven zui. Kɨ bizir kabagh amizɨ, ia tong uan navibagh iraghasa nɨghnɨzir pu. Bar puvatɨ. Kɨ Ikiavɨra Itir God, kɨ kamaghɨn mɨkeme.”

Amos 4:10 ပူးပေါင်းရင်းမြစ်များ

Godɨn Araziba 28:60

Egh a Isipɨn ia ganɨngizir arɨmariaba ua ia danightɨ ia ua deraghan kogham.

Joel 2:20

Eghtɨ kɨ notɨn amadaghan itir odeziba batueghtɨ, da ian saghon mangam. Da danganir mɨsɨngizir gumazamiziba itir puvatɨzimɨn mangam. Dar okoruar faragha zuim, kɨ da batueghtɨ, da Amangsɨzim Itir Dɨpar Akaremɨn magɨram. Eghtɨ dar okoruar igharazim, kɨ da batueghtɨ, da Mediterenianɨn Ongarir Ekiamɨn magɨram. Dar kuaba kurigh mughuriar bar anɨnganir kuram otivam. Bar guizbangɨra, kɨ arazir gavgavir bar ekiam damuam.

2 Atriviba 13:7

Ezɨ Sirian mɨdorozir gumaziba Israelian mɨdorozir gumazir avɨribav soghezɨ me ariaghire. Sirian mɨdorozir gumaziba bar puvɨra me gamua, me dɨkabɨra me gamima me nguazir mɨnemniamɨn mɨn otifi. Kamaghɨn amizɨ, dughiar kamɨn, Joahas mɨdorozir gumazir avɨriba puvatɨ. Israelia datɨrɨghɨn 50plan mɨdorozir gumazir hoziabagh apia mɨsozibara iti. Egha me mɨsoghamin 10plan karisba ikia, egha 10,000plan mɨdorozir gumazir igharaziba iti.

Ofa Gami 26:25

Ia nan Akar Dɨkɨrɨzir Gavgavim abightɨ, kɨ apaniba amadaghtɨ me ia mɨsogham. Eghtɨ ia ti mangɨ nguibar ekiar dɨvazir gavgaviba itibar aven mangɨtɨ, kɨ arɨmariar kurar ekiaba ia bagh da amangɨtɨ, gumazamizir avɨrim arɨmɨghiregham. Eghtɨ ia ikuvamin dughiamɨn, kɨ ia isɨ apanibar dafarim darɨgham.

Godɨn Araziba 7:15

Eghtɨ Ikiavɨra Itir God, deraghvɨra ian gantɨ arɨmariar guar igharagha garitaba ia bativan kogham. Egh arɨmariar kurar ia Isipɨn ikia ganizir katam uam ia bativan kogham. Arɨmariar kaba, da ian apanibara bativam.

Amos 8:3

Dughiar kamɨn, gumazamizir atrivimɨn dɨpenimɨn itiba, me uam ighiabar amuan kogham. Me azivɨra ikiam. Eghtɨ gumazamizir ariaghirezibar kuaba, tintinibar danganibar irɨv ikiam. Me gumazir kuaba azenan da akuntɨ, gumaziba mɨkɨman iburagham. Kɨ Ikiavɨra Itir Godɨn Ekiam, kɨ kamaghɨn mɨkeme.”

Amos 4:6

“Kɨrara, kɨ mɨtiriar ekiam gamizɨ, a ian nguibaba bar da batozɨ, dagheba puvatɨ. Ezɨ ia tong uan navibagh irazir pu. Bar puvatɨ. Kɨ Ikiavɨra Itir God, kɨ kamaghɨn mɨkeme.”

Jeremaia 18:21

Ezɨ datɨrɨkɨn, nɨ men boribar amutɨ, me dagheba puvatɨgh arɨghiregham. Egh apaniba ateghtɨ, me izɨ gumazitabav sueghtɨ me arɨghiregh. Eghtɨ gumazitaba arɨmariar kurataba ini arɨghirɨ. Eghtɨ gumazir igiaba mɨdorozimɨn arɨghirɨ. Kamaghɨn, men amuiba boriba ko paba puvatɨgham.

Jeremaia 11:22

“Kɨ Ikiavɨra Itir Godɨn Gavgaviba Bar Itim, kɨ guizbangɨra mɨgei: Kɨ Anatotɨn gumazamiziba pazɨvɨra me damighɨva, ivezir kuram me danɨngam. Kɨ me mɨsoghsɨ apaniba amadaghtɨ me izɨ men gumazir igiabav sueghtɨ me arɨmɨghiregham. Eghtɨ dughiar kamɨn, Anatotɨn gumazamiziba dagheba puvatɨghtɨ, men otariba ko guiviba arɨmighiram.

2 Atriviba 13:3

Kamaghɨn amizɨ, Ikiavɨra Itir God puvɨra Israelian atari, egha Sirian Atrivim Hasael ataghizɨ, a dughiar avɨribar iza Israelia mɨsogha me abɨri. Ezɨ gɨn Hasaelɨn otarim Benhadat, Sirian atrivimɨn oto. Ezɨ Ikiavɨra Itir God anetaghizɨ, a uaghan Israelia dɨkabɨnasava ami.

Godɨn Araziba 28:22

Dughiar kamɨn, an arɨmariar igharagh garir kuraba ia bagh da amangɨtɨ, da ian mɨkarzibar otivam. Kar, mɨkarziba ber arɨmariam, ko mɨkarziba puvɨra fer arɨmariam, ko mɨkarziba arugharughamin arɨmariar kuram. Eghtɨ God aruem damutɨ a bar gavgavigham. Egh an amɨnir puvɨra fem amadaghtɨ, a izɨ ian dagher azeniba dar amutɨ da bar mɨsigh bar ikuvigham. Eghtɨ bizir kurar kaba ian ikɨ mangɨtɨ ia bar arɨghiregham.

Ofa Gami 26:16

kamaghɨn kɨ bizitamɨn ia damuam. Kɨ zuamɨra ia damightɨ, ia bar ikuvigh bar atiatigham. Kɨ ia damutɨ, ia arɨmariar bar ekiaba iniva, ian mɨkarziba puv fengtɨ, ian damaziba okavightɨ, ian mɨkarziba nɨmɨra su magɨrɨ mangɨ bar ikuvigham. Ia azenibar dagheba opar, egh ia dar daghebar aman kogham. Apanibara, da ini dar amam.

Ua Me Ini 8:19

Ezɨ imezibagh amir gumaziba, atrivim kamaghɨn a mɨgei, “God uabɨ bizir kam gami!” Ezɨ atrivimɨn navim gavgavizɨ, Ikiavɨra Itir God mɨkemezɨ moghɨn, a Moses ko Aron baraghan aghua.

Jeremaia 48:15

“Atrivir kam, an ziam, Ikiavɨra Itir Godɨn Gavgaviba Bar itim, a kamaghɨn mɨgei: Apaniba izɨ Moap gasɨghasɨgh, an nguibaba iniam. Me Moapian gumazir igiar diribav soghɨrarɨgham.

Jeremaia 16:4

Me bar arɨghiregham. Tarazi arɨmariar kuraba iniva arɨmighiram. Eghtɨ apaniba izɨ taraziv soghtɨ me arɨghiram. Eghtɨ men tarazi dagheba puvatɨghɨva, arɨmɨghiram. Eghtɨ gumazir men kuabar apangkuv aziva, me isɨ mozibar afamiba puvatɨgham. Eghtɨ men kuaba pura tintinibar afiar buaribar mɨn nguazim girɨv ikiam. Eghtɨ kuarazir pɨn mɨghagha aruiba ko asɨzir atiaba men kuabar amam.

Jeremaia 15:3

“Kɨ Ikiavɨra Itir God, kɨ bizir gumazamiziba bar me agɨvamin 4plan kaba amangi: Apaniba me mɨsoghtɨ me arɨmɨghireghtɨ, afiaba men kuaba kurvagh mangɨtɨ, da dɨghortɨ kuarazir pɨn mɨghagha aruiba izighirɨ dar tuzibar amɨtɨ, asɨzir atiaba izɨ dar naba bar ada amɨ da agɨvagham.

Jeremaia 9:22

Ikiavɨra Itir God mɨkɨmasa na mɨgɨa ghaze, “Ariaghirir gumazamizibar kuaba pura tintinibar nguazimɨn ikiam, mati afiar buariba, ko witɨn ikɨziba pura tintinibar irav iti. Ezɨ gumazir dagh eghuvamiba puvatɨ.”

Jeremaia 6:11

Ezɨ Ikiavɨra Itir God, nɨn anɨngagharir nɨ men itir kam uaghan na gizɨfa. Ezɨ kɨ an suiraghtɨ a dughiar ruarimɨn nan ikian kɨ aghua. Kɨ bar amɨra.” Ezɨ Ikiavɨra Itir God, kamaghɨn na ikaragha ghaze: “Nɨ nan anɨngagharir kam isɨ, borir pura tintinibar tuavibar ikarara itiba ko, gumazamizir igiar uari akuva itiba me gingegh. Egh uaghan poroghamiba ko gumazamizir bar ghuriba, uaghan me gingegh.

Aisaia 9:13

Ezɨ Israelian gumazamiziba navibagh irazir puvatɨ. Ikiavɨra Itir Godɨn Gavgaviba Bar Itim, ivezir bar kuram me ganɨngi, ezɨ me uamategha a baghavɨra izir puvatɨ.

2 Atriviba 10:32

Dughiar kamɨn Jehu atrivimɨn itima, Ikiavɨra Itir God kantrin igharaziba ataghɨrazi, me Israelia gafigha men nguazir otevir maba isi. Sirian Atrivim Hasael Israelian nguazir otevir kam bar a iniasa me mɨsosi.

2 Atriviba 8:12

Ezɨ Hasael kamaghɨn an azai, “Nan gumazir ekiam, nɨ tizim bagh azi?” Ezɨ Elisa kamaghɨn a ikaragha ghaze, “Kɨ fo, nɨ gɨn arazir kurar avɨribar Israelian gumazamizibar amuam. Nɨ uan mɨdorozir gumaziba ko, men dɨvazir gavgavibagh asɨghasɨgh, egh dar apongtɨ da isiam. Egh ia Israelian gumazir igiabav soghtɨ me arɨghiram. Egh ia borir muziariba, nguazimɨn me apɨstɨ me arɨghiram. Egh ia naviba adair amizibar garir dughiam, ia mɨdorozir sababa inigh men naviba ofɨram. Kamaghɨn amizɨ, kɨ azi.”

Ua Me Ini 15:26

Ezɨ God me mɨgei, “Ia deragh nan akam baragh. Kɨrara Ikiavɨra Itir God, ian God, ia arazir nan damazimɨn deraziba, ia dar amu. Egh ia nan Akar Gavgaviba ko arazir kɨ ifongeziba bar dar gɨn mangɨ. Ia kamaghɨn damutɨ, kɨ pazɨ ia damuan koghɨva, arɨmariar kurar kɨ Isipɨn gumazamizibagh anɨngiziba ia danɨngan kogham. Guizbangɨra, kɨ ian Ikiavɨra Itir God. Kɨ ian arɨmariaba akɨrizɨ ia ghuamazi.”

Ua Me Ini 14:4

Kɨ atrivim damightɨ an navim gavgavightɨ, a ian agɨragham. Eghtɨ kɨ a ko an mɨdorozir gumaziba, me dɨkabɨragh me abɨragham. Egh bizir kam bangɨn kɨ ziar ekiam iniam. Eghtɨ Isipia fogh suam, Kɨrara, kɨ Ikiavɨra Itir God.” Ezɨ Israelia Ikiavɨra Itir Godɨn akam baregha, uamategha ghua Pihahirotɨn nguibamɨn boroghɨn apia.

Ua Me Ini 10:27

Ezɨ Ikiavɨra Itir God atrivimɨn navim gamizɨ, a bar gavgavigha, men amamangatɨghtɨ me mangan kogham.

Ua Me Ini 10:3

Egha Moses ko Aron atrivimɨn bighan ghugha, a mɨgɨa ghaze, “Ikiavɨra Itir God, a Hibruian God, a ghaze, ‘Dughiar ruarimɨn iza datɨrɨkɨn, nɨ nan akam batoke. Nɨ uabɨ abɨragh nan apengan izan aghua, a? Nɨ nan gumazamizibar amamangatɨghtɨ me mangɨ, nan ziam fam.

Ua Me Ini 9:17

Egha nɨ uabɨ uan ziam favɨra ikia nan gumazamiziba dɨkabɨragha, mangasa men amamangarɨzir puvatɨ.

Ua Me Ini 9:12

Ezɨ Ikiavɨra Itir God mɨkemezɨ moghɨn, an atrivim gamizɨ, an navim gavgafi, ezɨ a Moses ko Aron baraghan aghua.

Godɨn Araziba 28:21

Egh Ikiavɨra Itir God arɨmariar igharagha garir avɨriba ia bagh da amangightɨ, da izɨ ia damu mangɨtɨ, ia bar nguazir ia iniamin kamɨn ikɨ bar arɨmɨghireghtɨ, ian tav ua ikian kogham.

Aisaia 9:17

Gumazamizir kaba bar moghɨra God ategha arazir kurabagh ami. Me bar akar kurabav gei. Kamaghɨn amizɨ, Ekiam bar moghɨra me gasɨghasigham. A gumazir igiatam ateghtɨma a ikian kogham. Egh an amizir paba oveaghueziba ko borir ameboghfeziaba oveaghuezibar apangkuvighan kogham. Ekiam kamaghɨn damuam, eghtɨ bizir kam an anɨngagharim agɨvaghan kogham. Puvatɨ. A ivezir kuram isɨ me danɨngvɨra ikiam.

Aisaia 34:3

Eghtɨ men kuaba, gumaziba mozibar da afeghan kogham. Puvatɨ. Da pura ikɨ kur mughuriam mangam. Eghtɨ men ghuziba mɨghsɨaba avaragh daghuribar emɨr magɨram.

Aisaia 50:11

Ia gan! Ia nɨghnɨzir gavgavim Ekiamɨn itir puvatɨ, ia mati gumazamiziba tuavir mɨtarmebar mangasa, uari uan adenir avibagh aboi, ia uan arazir kamɨn gɨn mangɨ, e ganika. Ia mangɨ ikiamin danganim, Ekiam an amɨsevegha gɨfa, a mɨzazir bar kuram iniamin danganim.

Jeremaia 49:26

Kɨ Ikiavɨra Itir Godɨn Gavgaviba Bar Itim, kɨ guizbangɨra mɨgei: Dughiar kamɨn apaniba Damaskusɨn gumazir igiabav sueghtɨ, me arɨghirɨva, tintinibar uari akuvir danganibar irɨv ikiam. Eghtɨ apaniba bar moghɨra Damaskusɨn mɨdorozir gumazibav sueghtɨ, me arɨghiregham.

Jeremaia 5:3

Ezɨ kɨ Ikiavɨra Itir God ikaragha ghaze: “Kɨ fo, nɨ gumazamizir deravɨra guizɨn arazimɨn gɨn zuiba, nɨ bar me gifonge. Egha nɨ gumazamizir kabav soghezɨ, me mɨzazim baraghizir puvatɨ. Nɨ me akɨrasa me gasɨghasɨghizir bizir kam, me an ganigha fofozim inian aghua. Men dapaniba dagɨabar mɨn gavgafi, ezɨ me uan navibagh iraghan aghua.

Hosea 11:5

“Ezɨ me ua na bagh izan aghua. Kamaghɨn amizɨ, me ua Isipɨn mangɨ, o Asiriaba me gativagh men ganam.

Hagai 2:17

Ikiavɨra Itir God ghaze, Kɨ amɨnir gavgavir fefeim itim ko, arɨmariar kurar mam ko, aisɨn amozir kuram amadazɨ, da izaghirava ian dagher ia oparizibagh asɨghasɨki. Ia bizir kabar gara navibagh ighasa nɨghnɨzir puvatɨ.