Aisaia 9:16 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁶ Gumazir dapaniba tuavir aghuim ko arazir aghuim men akazir puvatɨ. Kamaghɨn amizɨ, gumazamiziba okam nɨghnɨgha pura tintinibar ghue.

Aisaia 9:16 ပူးပေါင်းရင်းမြစ်များ

Matyu 15:14

Ia gumazir kabagh nɨghnɨghan markɨ. Me damazir okavɨrɨziba, egha me tuavim isava gumazir igharazimɨn akakasi. Eghtɨ gumazir damazir okavɨrɨzim tuavim isava gumazir okavɨrɨzir mamɨn akakagh, egh aning vɨrara mangɨ mozimɨn magɨrɨgham.”

Aisaia 3:12

O nan gumazamiziba, iavzika! Ian gumazir dapaniba ia gifara ia gamizɨ, ia men gɨn tuavir kurabar ghue. Ezɨ borir igiaba ko amiziba ia gativagha, ia dɨkabɨra paza ia gami.

Hibru 7:7

E kamaghɨn fo, gumazim God ko mɨgɨa ghaze, God bizir aghuiba gumazir igharazim damuam, a gumazir bar ekiam. Ezɨ bizir aghuiba iniamin gumazim, an an apengan iti.

2 Eghaghaniba 30:27

Ezɨ gɨn ofa gamir gumaziba ko, Livaiba dɨkavigha tuivigha deragh gumazamizibar amuasa, Godɨn azangsɨsi. Ezɨ God uan Nguibamɨn ikia, egha uan ofa gamir gumazibar azangsɨzim barasi.

Aisaia 19:14

Guizbangɨra, Ikiavɨra Itir God, Isipian nɨghnɨzim gasɨghasigha gɨfa. Bizir kam bangɨn, Isipia amir biziba, bar ikuvigha ghua, mati wainɨn dɨpar onganim amezir gumazim uan mimizim dɨkaragha, atam irɨghai.

Jeremaia 23:13

“Kɨ fomɨra Samarian Godɨn akam inigha izir gumazibar garima, me kamaghɨra arazir kurar kɨ bar aghuazim gami. Me asem Balɨn ziamɨn, akam akuri, egha nan gumazamizibar akua tuavir kuramɨn zui.

Amos 2:4

“Ia oragh! Ikiavɨra Itir God Akar Gavgavir kam ia ganɨga ghaze, Judaba arazir kurabagh amua ghuavɨra iti. Me nan Araziba batogha, arazir kɨ ifongezibar gɨn zuir puvatɨ. Egha me uan inazir afeziaba faragha gɨn ghuezir aser ifavariba, uaghan dar gɨn zui. Kamaghɨn amizɨ, nan anɨngagharim guizbangɨra me bagha bar ekefe, eghtɨ kɨ ivezir kuram me danɨngam.

Maika 3:5

Godɨn akam inigha izir gumazir maba, deragha nan gumazamizibagh amir puvatɨ. Eghtɨ tav dagheba me danɨngtɨ, me a ko akaba akɨr suam, a dughiar aghuibar ikiam. Puvatɨ, kar me a gifari. Eghtɨ gumazamiziba dagheba me danighan kogham, eghtɨ me akar atiatibav kɨm ifar suam, men apaniba izɨ me gasɨghasɨgham. Ezɨ Ikiavɨra Itir God, akam inigha izir gumazir kabav gɨa ghaze,

Aisaia 5:25

Ikiavɨra Itir God uan gumazamizibar anɨngaghe. Egha datɨrɨghɨn uan agharim ghufegha me gasɨghasɨghasa gara iti. A dughiar vamɨran agharim akunightɨ, mɨkɨmkɨzim otoghtɨ, mɨghsɨaba ivazvaghtɨ, gumazamizir bar avɨrim arɨghiregham. Eghtɨ men kuaba nguibar ekiamɨn tuavibar buarir pozibar mɨn pura tintinibar ireghɨv ikiam. Ikiavɨra Itir God kamaghɨn damuam, eghtɨ bizir kam an anɨngagharim agɨvaghan kogham. Puvatɨ. A ivezir kuram isɨ me danɨngvɨra ikiam.

Aisaia 10:4

Ia bizitam damuva avegham. Bar puvatɨgham. Ian tarazi mɨdorozimɨn arɨmɨghiregham. Me ian tarazir suigh mangɨtɨ, ia kalabuziabar tongɨn bar atiatigh teviba apɨrigh mamaghɨra ikiam. Ia osɨmtɨzir bar kurar kam gitaghan kogham. Ikiavɨra Itir God bizir kabar amutɨ, da ia bativam, eghtɨ bizir kam an anɨngagharim agɨvaghan kogham. Puvatɨ. A tɨghar ivezir kuram isɨ me danɨngvɨra ikiam.

Jeremaia 9:4

“Ia gumazamiziba kamaghɨn fogh, ian namakaba ko aveghbuaba ifara, mati ia uan inazir afeziam Jekopɨn mɨn ifari. Kamaghɨn amizɨ, ia bar me bagh deraghvɨra gan, nɨghnɨzir gavgavim men akabar ikian markɨ.

Jeremaia 18:21

Ezɨ datɨrɨkɨn, nɨ men boribar amutɨ, me dagheba puvatɨgh arɨghiregham. Egh apaniba ateghtɨ, me izɨ gumazitabav sueghtɨ me arɨghiregh. Eghtɨ gumazitaba arɨmariar kurataba ini arɨghirɨ. Eghtɨ gumazir igiaba mɨdorozimɨn arɨghirɨ. Kamaghɨn, men amuiba boriba ko paba puvatɨgham.