Aisaia 66:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ “Gumazamizir maba uan ifongiar kuramɨn gɨntɨgha arazir kurabar amuasa bar ifonge. Egha me uari kamaghɨn nɨghnɨgha ghaze, me guizbangɨra nan ziam fe. Egha me amir ofan kaba, kɨ bar dar aghua. Kɨ garima, me bulmakaubav sogha na bagha ofabagh amua, merara uaghan gumazir maba isa, me mɨsuegha uan aseba bagha ofabagh ami. Me na bagha sipsipɨn nguzibar ofabagh amua, me uaghan afiaba isa dav suegha, aseba bagha dar ofabagh ami. Me witba isa na bagha ofabagh amua, me uaghan uan aseba bagha dabar ghuzibar ofabagh ami. Me na bagha pauran me iter balsamɨn eborimɨn ingarizimɨn ofabagh amua, egha uaghan asebar marvir guaba bagha ofabagh ami.

Aisaia 66:3 ပူးပေါင်းရင်းမြစ်များ

Aghuzir Akaba 15:8

Ikiavɨra Itir God, gumazir arazir bar kurabagh amiba, God men ofaba bar dar aghua. Egha God ko mɨgeir gumazir aghuariba, a bar me gakonge.

Aisaia 66:17

Ikiavɨra Itir God kamaghɨn mɨgei, “Gumazamizir maba, asebar ziaba fasa uari zueghamin arazibar gɨn ghua, egha uan azenibar itir marvir guabar ziaba fer danganibar ghua, men tongɨn itir gumazir dapanimɨn gɨn zui. Egha me dabar tuziba ko kuarziba ko bizir igharazir nan damazimɨn zuezir puvatɨziba saram api. Egh me bar moghɨra ikuvigh bar gɨvagham.”

Aisaia 65:12

Ezɨ kɨ ia bagha dughiar igharagha garim amɨsevegha gɨfa. Ian apaniba izɨ, uan mɨdorozir sababar ia mɨsoghtɨ, ia arɨmɨghiregham. Ia uan teviba apɨrigh, avigh dapaniba nguazimɨn gantɨ, apaniba ian fɨriba aghoram. Ia fo, kɨ ian deima, ia nan dɨmdiam ikarazir puvatɨ. Kɨ uaghan uan akam ia mɨkeme, ezɨ ia an gɨn zuir puvatɨ. Ia nan akaba batogha, arazir kurar kɨ bar aghuaziba nan damazimɨn dagh ami. Kamaghɨn amizɨ, dughiar kurar kam ia bativam.

Ofa Gami 2:2

egh a inigh Aronɨn adarazir ofa gamir gumaziba bagh mangɨ. Eghtɨ ofa gamir gumazitam uan dafarim plauan kam darugh, egh a plauan muziaritam, ko mɨgharir mughuriar aghuim zuim itir pauran me iter balsamɨn eborimɨn ingarizim, aningɨn dafarir izɨvɨrɨzim inigh ofa gamir dakozimɨn a tuaghtɨ, avim an isi mangɨtɨ a bar mɨghɨrightɨ, averenir kɨnim otogham. Plauan muziarir gumazim Ikiavɨra Itir Godɨn ofa gamizir kam, bar plauan namɨn danganim iniam. Eghtɨ Ikiavɨra Itir God, wit tuer ofan kamɨn mughuriam baregh, egh a gifuegh navir aghuim an ikiam.

Aghuzir Akaba 21:27

Ekiam gumazir arazir kurabagh amibar ofa bar aghua. Ezɨ gumazim arazir ifavarimɨn gɨn ghua ofabagh ami, ezɨ Ekiam ghaze, arazir kam bar ikufi.

Godɨn Araziba 23:18

Ia uaghan, tuavir amizim o tuavir gumazimɨn arazir kam damighɨva arazir kamɨn dagɨaba inigh, egh gɨn dagɨar kaba isɨ uan akar dɨkɨrɨzir Ikiavɨra Itir God ko amizim, anekɨrsɨ izɨ, Ikiavɨra Itir God, ian God, an Dɨpenimɨn aven mangan markɨ. Bar guizbangɨra, Ikiavɨra Itir God, ian God arazir kam ko an dagɨaba, sara bar dar aghua.

Godɨn Araziba 14:8

Ia dabar aman markɨ. Dar soroghafariba puzir pumuning ikia, aning uaning tuiragha ikia, bulmakaubar mɨn graziba apir puvatɨ. Kamaghɨn, ia fogh, daba da nan damazimɨn mɨze. Egh ia dar gantɨ da arɨghirɨtɨ, ia dar kuabar suighan markɨ. Bar markiam. Da nan damazimɨn zuezir puvatɨ.

Gumazir Dapaniba 10:14

Ia mangɨ aser ia uari bagha inabazibar dɨm. Egh ia osɨmtɨzim bativamin dughiamɨn, me ti ian akurvagham.”

Aisaia 57:17

Me faragha bizir avɨriba iniasa, arazir kurar guar avɨribagh ami, kamaghɨn amizɨ, nan anɨngagharim men ikia, puv me gamua, egha uan guam men modo. Ezɨ me akaba barazir puvatɨgha, uan ifongiabar gɨntɨsi.

Gumazir Dapaniba 5:8

Ezɨ Israelia aser igiabar gɨn zuir dughiamɨn, mɨdoroziba me batifi. Israelia mɨdorozir gumazir 40,000pla iti, egha me bar moghɨra mɨsoghamin oraba ko afuziba puvatɨ.

Aisaia 44:19

Gumazim nɨghnɨzir aghuim ikɨ, arazir kam tuisɨgh egh kamaghɨn mɨkɨmam, ‘Kɨ temer otevir kabar mabar avim atɨ, egha uaghan bretba ko asɨziba tuegha da ame. Egh tizim bagh kɨ an otevir kam inigh, bizir bar kurar kamɨn marvir guamɨn ingarigh, uan tevimning apɨrigh an ziam fam?’ Guizbangɨra, gumazamizir onganir kaba, me nɨghnɨzir aghuiba puvatɨgh mɨgɨrɨgɨar katam damuan kogham.

Aisaia 65:2

Kɨ zurara dughiabar gumazamizir nan akaba batoziba ua me iniasa me baghavɨra ikia uan dafarim amadagha men azangsɨghavɨra iti. Kar gumazamizir uan arazir kurabar tuavibar gɨn mangasa bar ifongeziba. Me uan ifongiabar gɨntɨsi.

Jeremaia 6:20

Me ofa gamua nan ziam fasa Seban adarazi da pauran mughuriar aghuim zuim ko, saghon itir gumaziba da borer aghuim givese. Egha ghaze, bizir kaba nan damazimɨn deragham. Bar puvatɨ. Kɨ ofan me tue bar isia mɨghɨriba ko ofan igharazir me na bagha amiba, kɨ bar adagh ifongezir puvatɨ. Kɨ da inighan kogham.

Gumazir Dapaniba 21:25

Dughiar kabar atrivir tam Israelɨn itir puvatɨ. Kamaghɨn, gumazamiziba vaghvagha tintinibar uan ifongiabar gɨn ghua pura bizibagh amua iti.

Aisaia 53:6

Guizbangɨra, e bar moghɨra sipsipbar mɨn tintinibar arua, vaghvagha uan ifongiabar gɨn arui. Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn, a kamaghɨn amizir puvatɨ. A uan ingangarir gumazim gamizɨ, a en danganim inizɨ, e iniamin mɨzaziba, an ada isa a ganɨngi.”

Hagai 2:14

Ezɨ Hagai kamaghɨn mɨgei, “Ikiavɨra Itir God ghaze, ‘Gumazamizir kaba ko, men kantrin me amir biziba nan damazimɨn kamaghɨra ghue. Men nɨghnɨziba ko, me amir araziba mɨze. Kamaghɨra ofan me ofa gamir dakozimɨn amiba, da bar moghɨra nan damazimɨn mɨze.’ ”