Aisaia 66:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Ikiavɨra Itir God ghaze, “Kɨ gumazamizibar nɨghnɨziba ko arazibar ganigha fo, kar dughiar kɨ gumazamiziba bar me akuvamim. Kantriba bar dar itir gumazamiziba ko akar igharazibav mɨgeir gumazamiziba, me bar moghɨra izam. Me izɨ uari akuvaghamin dughiamɨn, me nan angazangarir ekiam ko gavgavimɨn ganam.

Aisaia 66:18 ပူးပေါင်းရင်းမြစ်များ

Onger Akaba 86:9

O Ekiam, ikɨzibar gumazamizir nɨ ingariziba bar izɨ, nɨn ziar ekiam bagh teviba apɨrigh, nɨn ziam fam.

Akar Mogomem 11:15

Ezɨ enselɨn namba 7 uan sɨgham givima, Godɨn Nguibamɨn itir darazi tiariba akara ghaze: “En Ekiam ko an Gumazir a Gumazamiziba Ua Me Iniasa Mɨsevezim, aning datɨrɨghɨn nguazir kam gativagha an gari. Egh aning atrivimɨn ikɨ mamaghɨra ikiam.”

Aisaia 2:2

A ghaze: Gɨn otivamin dughiar tamɨn, mɨghsɨar Ikiavɨra Itir Godɨn Dɨpenim tughav itim, ziar bar ekiam iniam. Egh a pɨn mar ikɨ mɨghsɨar igharaziba bar dagh afiragham. Eghtɨ Kantrin Igharazibar Gumazamiziba bar izɨ an uari akuvagh ikiam.

Akar Mogomem 2:13

Kɨ nguibar ia itim bar deragha a gɨfo, Satanɨn atrivir dabirabim nguibar kamɨn iti. Ezɨ ia nan ziamɨn tugha gavgavigha, nɨghnɨzir gavgavim nan ikia egha ia nɨghnɨzir gavgavir kam modir puvatɨ. Fomɨra gumazir mam Antipas, a gumazir nan akam akurim, egha ia ko ike. A guizbangɨra nan akamɨn gɨn zui, ezɨ me ian nguibar ekiar Satan itimɨn a mɨsoghezɨ an areme. Dughiar kamɨn ia uaghan akɨrim ragha na gasarazir puvatɨ.

Akar Mogomem 2:9

Kɨ osɨmtɨziba ko mɨzazir ia bativiziba ko biziba bar puvatɨzir arazim gɨfo. Ezɨ puvatɨ. Ia guizbangɨra bizir bar avɨriba iti. Kɨ fo, gumazamizir maba gɨrakɨrangɨn akar kurabar ia mɨgɨa ghaze, me Judan adarasi. Ezɨ me Judan adarazi puvatɨ. Me guizɨn Satanɨn adarasi.

Akar Mogomem 2:2

Ia Kraisɨn adarasi, ian arazir ia amiba kɨ bar dagh fo. Egha kɨ fo, ia pamtem ingarigha, tuivigha gavgafi. Egha gumazamizir kurabar aghua. Gumazamizir kaba ia mɨgɨa ghaze, ‘E uaghan aposelba.’ Puvatɨ, me aposelba puvatɨ. Ezɨ ia men mɨgɨrɨgɨaba tuisigha gɨvagha, men nɨghnɨzir ifavarim gɨfogha ghaze, me pura gumazamizir ifavariba.

Hibru 4:12

Godɨn Akam an angamɨra ikia, egha pamtemɨn ingara iti. A bar ghumigha, mɨdorozir sabar ghumtɨzir pumuning itim gafira. Ezɨ akar kam, sabar ghumtɨzimɨn mɨn, a bar gumazimɨn namnam okoregha bar aven ghua, duam ko navir averiam uaning bativi naghɨn oto, egha uaghan aghariba uari isasuirazir naghɨn, ko agharibar aven itir ovim, aning uaning bativi naghɨn oto. Egha a bar en nɨghnɨziba ko en navir averiabar aven itir ifongiabagh fogha da tuisɨsi.

1 Korin 3:20

Godɨn Akɨnafarim uaghan kamaghɨn mɨkeme, “Ekiam a fofozir gumazamizibar nɨghnɨzibagh fo. A fo, me damuasa nɨghnɨzir biziba, da otivan kogham.”

Jon Osirizir Akar Aghuim 17:24

“Afeziam, gumazamizir nɨ na ganɨngiziba, me na ko nguibar kɨ itimɨn ikiasa kɨ ifonge. Me nan angazangarir ekiam ko nan gavgavimɨn ganasa kɨ ifonge. Dughiar nguazim tɨghar otivam, nɨ na gifonge, egha nɨ angazangarir kam ko gavgavim na ganɨngi.

Jon Osirizir Akar Aghuim 5:42

Kɨ ia gɨfo. Ian navir averiabar, ia guizbangɨra God gifongezir puvatɨ.

Luk Osirizir Akar Aghuim 5:22

Ezɨ Iesus men nɨghnɨzibagh fogha men azara, “Ia tizim bagha bizir kaba uan navir averiabar aven dagh nɨghnɨsi?

Matyu 12:25

Ezɨ Iesus men nɨghnɨzibagh fogha egha kamaghɨn me mɨgei, “Kantrin tamɨn gumazamiziba uari tuiragh uarira uariv soghtɨ, men dabirabim ikuvigham. Eghtɨ dɨpenir vamɨran itir darazi o nguibar vamɨran itir darazi uari tuiragh uarira uariv soghtɨ, men dabirabim ikuvigham.

Matyu 9:4

Ezɨ Iesus men nɨghnɨzibagh fogha gɨvagha kamaghɨn me mɨgei, “Ia tizim bagha nɨghnɨzir kurar kaba uan navir averiabar dagh ami?

Amos 5:12

Ia amir arazir kuraba, kɨ bar dagh fo. Kɨ fo ia osɨmtɨzir bar avɨribagh ami. Ia gumazamizir aghuiba paza me gami. Gumazir kuraba ia apezepera moga dagɨaba ia ganɨdima, ia dagɨaba isa, gumazir onganarazibagh amibar, kotiabar me gifara me abɨri.

Joel 3:2

Eghtɨ kɨ kantriba bar dar gumazamiziba bar me inigh izɨ, danganir zarir mamɨn otogham. Me danganir zarir kam kamaghɨn a dɨbori, God Gumazamiziba Tuisɨsi. Kɨ kagh me akuvagh, arazir me nan gumazamizibagh amiziba bagh akam me gasam. Gumazamizir kaba, me nan gumazamizir kɨ ua bagha inabazibara. Kantrin kabar gumazamiziba, nan nguazim inigha anebɨgha uarigh anɨngi, egha Israelia inigha tintinimɨn kantrin igharazibar ghue.

Esekiel 39:21

Ikiavɨra Itir God ua mɨgɨa ghaze, “Kɨ gumazamizibar arazir kuraba ikarvagh ivezir kuram me danɨngam. Eghtɨ Kantrin Igharazibar Gumazamiziba dughiar kamɨn nan gavgavir ekiamɨn ganigh fogham, egh ziar ekiam na danɨngam.

Esekiel 38:10

“Kɨ Ikiavɨra Itir Godɨn Ekiam, kɨ kamaghɨn Gok mɨgei: Dughiar kam otoghtɨ, nɨghnɨzir taba nɨ bativtɨ nɨ arazir kuratabar amusɨ nɨghnɨgh, dar amuamin tuaviba buriam.

Aisaia 66:10

“Ia Jerusalem gifongezir darasi, ia a ko bar akongegh. Ia gumazamizir a bagh azia itiba, ia datɨrɨghɨn a bagh bar akongegh.

Aisaia 37:28

“ ‘Ezɨ kɨ bar moghɨra nɨ gɨfo, nɨn dabirabir araziba ko dɨkavir araziba, ko iza zuir araziba, kɨ bar dagh fo. Egha nɨn anɨngagharir nan itim, kɨ uaghan bar a gɨfo.

Onger Akaba 82:8

O God, nɨ dɨkavigh izɨ nguazimɨn gumazamiziba bar me gativagh men araziba tuisɨgh. Nguazimɨn itir gumazamiziba bar nɨn gumazamiziba.

Onger Akaba 72:17

Gumazamiziba, atrivir kamɨn ziam gɨnamangan kogham. Dughiaba bar, aruem tɨghar maghɨn anangtɨ, gumazamiziba ziar ekiam atrivir kam danɨngam. Egh gumazamiziba an ziam fam. God deragha atrivim gamir arazir kam bagh, me uaghan kamaghɨra deragh uari damusɨ Godɨn azangsɨgham.

Onger Akaba 72:11

Atriviba bar izɨ a bagh teviba apɨram. Eghtɨ kantriba bar, dar gumazamiziba an ingangaribar amuam.

Onger Akaba 67:2

Eghtɨ nguazimɨn gumazamiziba ganigh nɨn arazibagh fogham. Me kamaghɨn fogham, nɨ gavgavir bar ekiam ikia men akurvasi.

Jopɨn Akɨnafarim 42:2

“Kɨ datɨrɨghɨn fo, nɨrara biziba bar dar amuamin gavgavim iti. Egha nɨ uan ifongiamɨn gɨn ghuava amir ingangariba, tav dar anogoreghan kogham.

Godɨn Araziba 31:21

Egh Israelia dughiar kurar kamɨn aven ikɨva, ighiar kam gɨnɨghnɨghvɨra ikɨ a bangam. Eghtɨ men ovavir boriba uaghan, a gɨfogh a bangam. Eghtɨ ighiamɨn akaba men arazir kurar me amiziba, men akakagh dar gun me mɨkɨmam. Kɨ tɨghar me inigh nguazir kɨ me danɨngasa akam akɨrizir kamɨn aven mangam, egha kɨ men nɨghnɨzir kurabagh fogha gɨfa.”

Onger Akaba 97:6

Overiam uabɨ, kamaghɨn akam akura ghaze, “God arazir aghuibaram ami.” Ezɨ gumazamiziba bar an angazangarim ko gavgavimɨn gari.

Onger Akaba 139:2

Nɨ nan saghon ikia nan nɨghnɨziba ko, kɨ amir biziba ko, kɨ apia dɨkavir araziba, nɨ bar dagh fo.

Aisaia 11:9

Dughiar kamɨn, nguazimɨn itir gumazamiziba bar deraghvɨra Ikiavɨra Itir God gɨfogham. Eghtɨ fofozir kam, nguazimɨn oteviba bar dagh izɨvagham, mati ongarim bar ghua uan danganimra tu. Kamaghɨn amizɨ, God baghavɨra itir mɨghsɨamɨn itir gumazamiziba ko, gumazamizir igharaziba bar moghɨra uari inigh deraghvɨra ikɨva, tav pazɨ tav damuan kogh, egh me gasɨghasɨghan kogham.

Aisaia 45:22

“Ia nguazir kamɨn saghon itir danganibar gumazamiziba, ia bar na bagh izɨ. Kɨrara kɨ God, ezɨ godɨn tam ua itir puvatɨ. Kamaghɨn amizɨ, ia na bagh izɨtɨ, kɨ ian akurvaghtɨ, ia deravɨra ikiam.

Aisaia 52:10

Ikiavɨra Itir God uan gavgavim, kantribar gumazamiziba an ganasa, anekagha gɨfa. Eghtɨ a uan gumazamizibar akuragha ua me inizir gavgavir ekiam, nguazir kamɨn gumazamiziba bar an ganam.

Aisaia 55:8

Ikiavɨra Itir God ghaze, “Ia gumazamiziba ian nɨghnɨziba, nan nɨghnɨzibar mɨn zuir puvatɨ. Ezɨ nan araziba, ian arazibar mɨn itir puvatɨ.

Aisaia 56:8

Kɨ Ikiavɨra Itir God, ian Ekiam ghaze, Kɨ Israelian gumazamizir apaniba inigha kalabus gatɨziba, kɨ uamategh me inigh izam. Egh gumazamizir kɨ kalabusɨn inigha iza akuvaziba, kɨ ua gumazamizir igharazir taba inigh me gɨfuragham.

Aisaia 57:12

Ia ti ghaze, ia arazir aghuibaram ami. Ian arazir ia amiba, kɨ da azenim datɨgham. Eghtɨ da tong ian akuraghan kogham. Bar puvatɨgham.

Aisaia 59:7

Ia zuraram arazir kuram damuasa bar ifonge. Egha ia zurara atamra ghua gumazamizir arazir kurabagh amir puvatɨzibav sozi, me ariaghiri. Ia bizir kurabara damuasa nɨghnɨsi. Egha ia gumazamizibar ikɨrɨmɨrim gasɨghasɨghasava arua bizibagh ami.

Aisaia 65:2

Kɨ zurara dughiabar gumazamizir nan akaba batoziba ua me iniasa me baghavɨra ikia uan dafarim amadagha men azangsɨghavɨra iti. Kar gumazamizir uan arazir kurabar tuavibar gɨn mangasa bar ifongeziba. Me uan ifongiabar gɨntɨsi.

Jeremaia 3:17

Eghtɨ dughiam izɨtɨ gumazamiziba kamaghɨn mɨkɨmam, Jerusalem uabɨ, a Ikiavɨra Itir Godɨn atrivir dabirabimɨn mɨn ikɨ. Eghtɨ kantriba bar dar gumazamiziba izɨ an uari akuv, Ikiavɨra Itir Godɨn ziar ekiam fam. Egh me uan navir averiabar aven damuasa ifongezir arazir kuraba ko men arazir akam batoziba, me ua dar gɨn mangan kogham.

Sekaraia 14:16

Judaba uan apaniba abɨraghtɨ, men apanir mɨkeaghɨrɨziba, me azenibar zurara Jerusalemɨn izɨva Atrivimɨn ziam fam, a Ikiavɨra Itir Godɨn Gavgaviba Bar Itim. Egh me Averpenibar Ikiamin Dughiar Ekiamɨn aven ikiam.

Malakai 1:11

“Kɨ Ikiavɨra Itir Godɨn Gavgaviba Bar Itim, kɨ ghaze, gumazamizir aruem anadi naghɨn itiba ko, aruem uaghiri naghɨn itir kantriba, me bar moghɨra ziar ekiam na ganɨdi. Nguibaba bar dar gumazamiziba mughuriar aghuim zuir ofaba ko, ofan igharazir guar avɨriba sara na danɨngam. Gumazamizir kaba me bar moghɨra ziar ekiam na ganɨdi.

Onger Akaba 94:11

Ikiavɨra Itir God, a bar gumazamizibar nɨghnɨzibagh fo. Bizir me damuasa nɨghnɨziba, an a dagh fogha gɨfa. Da mɨgharimɨn mɨn zuamɨra mangɨgh, otivan kogham.

Aisaia 40:5

Eghtɨ Ikiavɨra Itir Godɨn angazangarir gavgavim ko ziar ekiam azenim girɨghtɨ, nguazir kamɨn gumazamiziba bar moghɨram an ganam.” Kar Ikiavɨra Itir Godɨn, akatorimɨn otozir mɨgɨrɨgɨam.

Jeremaia 16:17

Me amir biziba bar nan modozir puvatɨ. Da bar nan damazimɨn azenara iti. Me uan arazir kuraba mongɨva avegham.