Aisaia 51:5 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁵ Kɨ men akuragh ua me iniamin dughiam, a roghɨra izegha gɨfa. Kɨ arazir aghuimɨn gɨn mangɨ, uan gavgavimra kantriba bar dar ganam. Saghon itir arighatɨzibar gumazamiziba, nɨghnɨzir gavgavim nan gavgavimɨn ikɨ, egh uarir akurvaghsɨ, na mɨzuam ikiam.

Aisaia 51:5 ပူးပေါင်းရင်းမြစ်များ

Aisaia 46:13

Bar puvatɨ. Nan akurvazim, a bar roghɨra izegha gɨfa. Eghtɨ kɨ ua mɨzuaman kogham. Israelia, kɨ zuamɨra izɨ ian akurvagh apanir ia abɨriba, kɨ bar puv me damightɨ, ia ua deravɨra ikiam. Egh kɨ uaghan Saionɨn nguibar ekiamɨn akurvaghtɨ, a deravɨra ikiam. Kɨ uan ziar ekiam ko gavgavim damightɨ, aning Israelia ian tongɨn azenim girɨgham.”

2 Korin 5:10

Guizbangɨra, e bar moghɨra Kraisɨn kotɨn otivightɨ, an en araziba tuisɨgham. Dughiar e nguazimɨn inivafɨzimɨn aven itim, e arazir aghuibagh ami, o arazir kurabagh ami, eghtɨ kotiamɨn dughiam e bar vaghvagh uan arazir amizibar ivezim iniam.

Aisaia 60:9

Kar, Tarsisɨn nguibar bar saghon itimɨn kuriba. Bar guizbangɨra, saghon itir arighatɨzibar gumazamiziba uarir akurvaghasa na mɨzua iti. Egh me nɨn boriba inigh uamategh nɨ bagh me amangɨsɨ, kurir ekiar kaba amangɨtɨ, me izam. Egh gumazamizir kaba uaghan gol ko silvan avɨrim isɨ kurir kabar da ameghtɨ, da izam. Me garima, kɨ bar deravɨra nɨ gamizɨ, nɨ ziar ekiam iti, kamaghɨn amizɨ, me arazir kam gami. Me fo, kɨ Ikiavɨra Itir God, ian God, kɨ Israelian Godɨn Bar Zuezim, egha me ziar ekiam na danɨngasa kamaghɨn ami.

Aisaia 42:4

Eghtɨ osɨmtɨzitam a dɨkabɨraghan kogham. A pamten ingar mangɨva, dughiar a guizɨn arazimɨn gɨn mangɨ gumazamiziba tuisɨghamim otogham. Egh an otogh gavgavigh nguazir kam bar an ikiam. Ezɨ saghon itir arighatɨzibar gumazamiziba, me arazir God uarir sure damuamibav mɨzua iti.

Akɨnafarir Pol Romɨn Nguibar Ekiamɨn Itir Sios Bagha Osirizim 2:16

Kamaghɨn amizɨ, Akar Aghuir kɨ kurim kamaghɨn mɨgei, God gumazamiziba bar men navir averiabar itir nɨghnɨzir mogomeba tuisɨghamin dughiam, gumazamizir kabar nɨghnɨzibara arazir kurar me amiziba bagh men araziba tuisɨgham. God gumazamizibar araziba bagh me tuisɨghamin ingangarim isava, Krais Iesusɨn dafarim gatɨ.

Aposel 17:31

God gumazamizibar arazir kuraba bagh me tuisɨghamin dughiam akɨrigha gɨfa. An arazir aghuimɨn mɨrara a inabazir gumazim, nguazir kamɨn gumazamiziba tuisɨgham. Gumazir kam aremezɨ God a gamizɨ a ua dɨkafi. Bizir kamɨn God e tuisɨghamin ingangarim gumazamiziba bar men akazɨ, me fo, a guizbangɨram otogham.”

Luk Osirizir Akar Aghuim 24:47

Eghtɨ nan ziamɨn, ia nan akam inigh mangam. Ia Jerusalem ikegh nan akam inigh nguazimɨn mɨkebaba bar dar mangɨ. Ia ikɨziba bar dar gumazamizibav kɨmtɨ, me navibagh iraghtɨ kɨ men arazir kuraba gɨn amangam.

Mak Osirizir Akar Aghuim 16:15

Egha a kamaghɨn me mɨgei, “Ia mangɨ nguazir kam bar a daruva nguazir kamɨn itir gumazamiziba bar Akar Aghuim me mɨkɨm.

Matyu 28:18

Ezɨ Iesus men boroghɨra iza kamaghɨn me mɨgei, “God nguazim ko overiam gativamin gavgaviba bar na ganɨngi.

Matyu 3:2

Egha ghaze, “God Bizibagh Ativamin Dughiam, a roghɨra ize. Kamaghɨn amizɨ, ia navibagh iragh.”

Sefanaia 2:11

Ikiavɨra Itir God me damutɨ, me puvɨram atiatingam. Kantriba bar, a men asebar amutɨ da pura bizir kɨnibar mɨn otivam. Eghtɨ gumazamizir ongarimɨn mɨriamɨn itiba ko, gumazamizir ongarir arighatɨzimɨn itiba, me uan nguibabara ikɨva uan teviba apɨr dapaniba avighɨva an ziam fam.

Joel 3:12

Ezɨ God kamaghɨn mɨgei: “Kantribar gumazamiziba bar, dɨkavigh danganir zarir kamɨn izɨ. Me danganir zarir kam kamaghɨn a dɨbori, God Gumazamiziba Tuisɨsi. Kɨ danganir kam daperagh, Israelɨn boroghɨn itir kantribar gumazamiziba bar men arazir kuraba tuisɨgham.

Aisaia 63:5

Kɨ garima, nan akurvaghamin gumaziba puvatɨ, kamaghɨn amizɨ, kɨ dɨgavir kuram gami. Ezɨ nan gavgavim ko nan anɨngagharimra na gamima, kɨ uan gumazamizibar apaniba abɨra.

Aisaia 56:1

Ikiavɨra Itir God kamaghɨn mɨgɨa ghaze: “Ia nan gumazamiziba, kɨ ian akurvaghamin dughiam, a bar roghɨra ize. Gumazamiziba gantɨ, kɨ ua ia iniam. Kamaghɨn amizɨ, nan gumazamiziba, ia nan guizɨn arazibar gɨn mangɨ arazir aghuibar amu.

Aisaia 49:1

Ia saghon itir arighatɨzibar gumazamiziba ko, saghon itir kantriba, ia nan akam baragh. Nan amebam tɨghar na batamin dughiamɨn, Ikiavɨra Itir God, na amɨsevegha gɨvagha ziam na gatɨ.

Aisaia 40:10

Ia gan. Ikiavɨra Itir God, ian Ekiam, a uan gavgavir ekiam sara izi. A uan apaniba dɨkabɨragha gɨfa. Egha a uan gumazamiziba, ua me inigha izi, mati bizir aghuir a mɨdorozimɨn me dɨkabɨragha inizir biziba.

Onger Akaba 98:9

Ikiavɨra Itir God izɨ nguazim gativagh an ganam. An atrivimɨn ikɨ, guizɨn arazimɨn gumazamizibar araziba tuisɨgham. Kamaghɨn amizɨ, ia a bagh bar akuegh onger akabar amu.

Onger Akaba 85:9

Bar guizbangɨra, an akurvazim, an gumazamizir an ziam fava an atiatia an apengan itiba, bar men boroghɨra iti. An angazangarim e gisiragha en akura, a uabɨ e ko en nguazir kamɨn ikɨ mamaghɨra ikiam.

Onger Akaba 67:4

Nɨ guizbangɨra gumazamizibar araziba tuisɨgha, tuavir aghuim men akazɨ, me nɨn ifongiamɨn gɨrara zui. Kamaghɨn amizɨ, gumazamizibar naviba bar akueghɨva, ighiaba bangɨ nɨn ziam fam. (Ighiam gamua an suiam atugha avughsegha ua ighiam gami.)

1 Samuel 2:10

“Ikiavɨra Itir God uan apaniba bar me gasɨghasigham. A uan Nguibamɨn ikia arariba dagarvazi moghɨn a me dagarvasi. Ikiavɨra Itir God nguazimɨn mɨkebaba bar dar itir gumazamiziba, a bar me akuvagh kotiamɨn men araziba tuisɨgham. Egh a gavgavim isɨ uan atrivir a inabazim danigham, eghtɨ gumazamiziba bar, men tongɨn, atrivir kam ziar ekiam iniam.”

Godɨn Araziba 30:14

Ezɨ puvatɨ. Godɨn akam bar nɨn boroghɨra iti, a nɨn akatorim ko nɨn navir averiamɨn aven iti. Kamaghɨn amizɨ, ia dughiabar zurara an gɨn mangɨ.

Onger Akaba 110:6

A nguazimɨn gumazamizibar arazir kuraba ikarvagh, egh mɨdorozir danganibar a gumazir avɨribav soghtɨ me arɨmɨghiram. An atrivir avɨriba ko mɨsogh me abɨnam.

Onger Akaba 96:13

Ia bar moghɨra izɨ, Ikiavɨra Itir Godɨn damazimɨn ighiam damu. A izɨ nguazimɨn gumazamiziba bar me gativagh men ganam. Ikiavɨra Itir God, uan arazir aghuimɨn gɨn mangɨ, gumazamiziba bar me gativagh, uan guizɨn akamɨn men araziba tuisɨgham.

Aisaia 11:11

Egh gɨn ua izamin dughiamɨn, Ekiam uamategh uan agharim ghufegh uan gavgavim akagh, uan gumazamiziba inigh uamategh izɨ, men nguibabar me arɨgham. Kar gumazamizir ikiavɨra itir varazira, me kantri Asiria ko, Isip ko, Itiopia ko, Elam ko, Babilonian kantri ko, Hamat ko, Mediterenianɨn Ongarir Ekiamɨn arighatɨzibar ikiavɨra itiba.

Aisaia 24:15

Kamaghɨn amizɨ, ia aruem anadi naghɨn itir gumazamiziba, Ikiavɨra Itir Godɨn ziam fɨ. Ia ongarimɨn arighatɨzibar itir gumazamiziba, ia bar moghɨra ziar ekiam a danɨng, a Israelian God, Ikiavɨra Itir God.

Aisaia 26:4

Ikiavɨra Itir God, en God, a en mogomer danganir gavgavim, mati dagɨar gavgavir ekiam. Egh a zurara kamaghɨra ikiam. Kamaghɨn e guizbangɨra nɨghnɨzir gavgavim Ikiavɨra Itir Godɨn ikɨva, zuraram an apengan ikiam.

Aisaia 33:2

O Ikiavɨra Itir God, en nɨghnɨzim nɨrara iti. Nɨ en apangkuvigh zurara dughiabar e ekɨarugh uan gavgavimɨn deragh en gan. Egh osɨmtɨzibar dughiamɨn en akurvagh e damutɨ, e uan apaniba dɨkabɨraka.

Aisaia 33:22

Bar guizbangɨra, Ikiavɨra Itir God uabɨ, jasɨn mɨn ikɨ, egh en atrivimɨn ikɨ, en gumazir deravɨra en ganamim mɨn ikɨ, egh en Akurvazir Gumazimɨn ikiam.

Aisaia 54:17

Eghtɨ mɨsoghamin bizir katam nɨ gasɨghasighan kogham. Eghtɨ nɨ mɨtɨgh gavgavigh gumazir pura mɨgɨrɨgɨaba nɨ gasibar mɨgɨrɨgɨaba ikarvagham, eghtɨ men mɨgɨrɨgɨaba gavgaviba bar puvatɨgham. Ezɨ arazir kamra kɨ deravɨra uan ingangarir gumazamizibar garava, me gamizɨ, me uan apaniba dɨkabɨri. Nan arazir kam, a ivezir aghuimɨn mɨn, kɨ a isa uan ingangarir gumazamizibagh anɨdi. Kɨ Ikiavɨra Itir God, kɨ mɨkemegha gɨfa.”

Aisaia 59:16

A garima, gumazamiziba paza gumazir igharazibagh amima, men akuraghamin gumazitam itir puvatɨ. Ezɨ a kamaghɨn ganigha dɨgavir kuram gami. Egha uabɨ uan gavgavim ko uan arazir aghuimɨn, a ua me inigha, me gamizɨ me deravɨra iti.

Aisaia 62:11

Ia oragh! Ikiavɨra Itir God, kamaghɨn nguazir kamɨn gumazamiziba bar me mɨkemegha ghaze: “Ia Saionɨn nguibamɨn gumazamiziba bagh mangɨ kamaghɨn me mɨkɨm suam, ‘Ia gan, ian Akurvazir Gumazim, a izi! A faragha mɨdorozim gamua apanibagh afiragha, gumazamiziba bizir aghuibar mɨn me inizɨ, me a ko izi.’