Aisaia 50:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² “Egha kɨ iza ia bagha rui gari, ezɨ manmaghɨn amizɨ gumazitam itir puvatɨ? Egha kɨ ian deir dughiamɨn, ia tizim bagha nan dɨmdiam ikarvaghan aghua? Ia ti ghaze, kɨ ua ia inian gavgaviba puvatɨ. Ia ghaze, kɨ ian akurvaghamin gavgaviba puvatɨ. Kɨ mɨkɨmtɨ, ongarim bar dakegham. Kɨ mɨkɨmtɨma, faner ekiaba bar dakegh gigir kɨnibar otivigham. Eghtɨ dar osiriba arɨmɨghiregh kuram.

Aisaia 50:2 ပူးပေါင်းရင်းမြစ်များ

Aisaia 59:1

Ia oragh! Ia kamaghɨn nɨghnɨghan markɨ, Ikiavɨra Itir God ian akurvaghamin gavgaviba puvatɨ. Egh ia kamaghɨn nɨghnighan kogham, an kuariba pɨrizɨ, e an deir dɨmdiaba, an ada barazir puvatɨ.

Dɨboboniba 11:23

Ezɨ Ikiavɨra Itir God Moses ikaragha ghaze, “Kɨ ti gavgaviba puvatɨghama? Nɨ kɨran oveghangɨn ganigh fogham, nan mɨgɨrɨgɨam ti daghem otogham, o puvatɨgham.”

Aisaia 66:4

Eghtɨ kɨrara, kɨ me amir arazir kam baghvɨra osɨmtɨzim amɨseveghtɨ me aneteram, kar osɨmtɨzir me ateran bar atiatingizɨm. Guizbangɨra, kɨ men dei, ezɨ me nan dɨmdiam ikarvaghan aghua. Kɨ uaghan uan akam me mɨkɨri, ezɨ me an gɨntɨghan aghua. Puvatɨ. Me nan akaba munasi. Egha arazir kurabara nan damazimɨn dagh ami, kar arazir kurar kɨ bar aghuaziba.

Josua 3:16

Ezɨ dɨpam bar pɨrigha ivemari puvatɨgha, buigha mɨghsɨar mamɨn mɨn tughav iti. Fanem bua ghuavanaga Adamɨn nguibar ekiamɨn tu, a Saretan nguibar ekiamɨn boroghɨn itir nguibam. Ezɨ fanemɨn dɨpar ivemara Amangsɨzim Itir Dɨpar Akaremɨn zuim, a bar mɨsɨngi. Ezɨ gumazamiziba fanemɨn vongɨn ghua Jerikon nguibamɨn boroghɨn oto.

Jenesis 18:14

Abraham, nɨ orakigh, Ikiavɨra Itir God bizitam damusɨ iburaghan kogham. Azenir munamɨn iakɨnir kamran, dughiar kɨ dɨborozimɨn kɨ uamategham. Eghtɨ dughiar kamra Sara otarim ikiam.”

Hosea 11:7

Me zurara akɨrim na gasi, kamaghɨn ivezir kurar kɨ me danɨngamim, me a gitaghan kogham. Me uarir akurvaghsɨ asebar dɨmam. Eghtɨ aser kɨnir kaba men akuraghan kogham.

Aghuzir Akaba 1:24

Ia na bagh izasa kɨ uan agharim amadagha ian dei. Ezɨ ia aghuagha izezir puvatɨ.

Jon Osirizir Akar Aghuim 1:11

A uan nguibamra ghuzɨma an anababa an aghuagha a inizir puvatɨ.

Nahum 1:4

An ongarim dagarvagh an atartɨ, ongarim dakegham. Egha uaghan fanebagh ami da dati. Egh a suam, biziba ikuvigham, eghtɨ azeniba ko, grazir aghuariba mɨsɨngigh arɨmɨghiregham. Basanɨn nguazir aghuimɨn itir azeniba ko, Karmelɨn Mɨghsɨamɨn itir temeba ko, Lebanonɨn kantrin itir akɨmariba, da bar mɨdiava ariaghiri.

Hosea 11:2

Ezɨ dughiar avɨribar gɨn, nan akam inigha izir gumaziba nan gɨn mangasa Israelian gumazamizir kabar dei. Ezɨ akam inigha izir gumaziba men deima, me dughiabar zurara akɨribagh igha me gasi. Nan gumazamiziba asem Bal bagha ofabagh ami. Me mughuriar aghuim zuir ofaba marvir guaba bagha dagh ami.

Daniel 3:29

Ezɨ kɨ fo, Satrak, Mesak ko Abetnego, men God men akurazɨ moghɨn, godɨn igharaz tam uan gumazamizibar akuraghan kogham. Kamaghɨn amizɨ, kɨ mɨgɨrɨgɨar kam damuasa, ia gumazamiziba bar Godɨn kam a dɨpova, akar kuratamɨn a mɨkɨman kogham. Egh nguibaba bar dar gumazamiziba ko kantriba bar dar gumazamiziba ko nguibabar akaba bar, me arazir kam damutɨ, kɨ mɨdorozir gumazibav kemeghtɨ me men sueba ko aghariba asightɨ, me aremegham. Egh me men dɨpeniba akararɨgh bar dagh asɨghasɨgham.”

Daniel 3:15

Ezɨ datɨrɨghɨn, ia sɨghaba ko mariviba ko gitaba ko buaba ko ighiar igharaziba baraghɨva, teviba pɨrighɨva avigh marvir guar kamɨn ziam fɨ. Ia kamaghɨn damuan koghtɨ, kɨ datɨrɨghɨra gumazibav kemeghtɨ me ia isɨ danganir ekiar avir bar pamten isimɨn aven ia kunigham. Eghtɨ godɨn manam ian akuragh nan gavgavim da ua ia inigham?”

Jeremaia 35:15

Nan akam inigha izir gumaziba, kɨ dughiar avɨribar me amadima, me ia bagha izi, me nan ingangarir gumaziba. Me kamaghɨn mɨgɨa ghaze: Ia vaghvagh uan nɨghnɨzibagh ira uan arazir kuraba ategh, uan araziba akɨrigh. Egh ia asebar gɨn mangɨva, dar ziaba fan markɨ. Ia nan akar kamɨn gɨn mangɨva, nguazir kɨ ian ovaviba ko ia ganɨngizir kam, deraghvɨram an ikiam. Nan akam inigha izir gumaziba akar kamɨn gun ia mɨkeme, ezɨ ia nan akam barazir puvatɨgha, an gɨn zuir puvatɨ.

Aisaia 65:12

Ezɨ kɨ ia bagha dughiar igharagha garim amɨsevegha gɨfa. Ian apaniba izɨ, uan mɨdorozir sababar ia mɨsoghtɨ, ia arɨmɨghiregham. Ia uan teviba apɨrigh, avigh dapaniba nguazimɨn gantɨ, apaniba ian fɨriba aghoram. Ia fo, kɨ ian deima, ia nan dɨmdiam ikarazir puvatɨ. Kɨ uaghan uan akam ia mɨkeme, ezɨ ia an gɨn zuir puvatɨ. Ia nan akaba batogha, arazir kurar kɨ bar aghuaziba nan damazimɨn dagh ami. Kamaghɨn amizɨ, dughiar kurar kam ia bativam.

Aisaia 59:16

A garima, gumazamiziba paza gumazir igharazibagh amima, men akuraghamin gumazitam itir puvatɨ. Ezɨ a kamaghɨn ganigha dɨgavir kuram gami. Egha uabɨ uan gavgavim ko uan arazir aghuimɨn, a ua me inigha, me gamizɨ me deravɨra iti.

Aisaia 43:16

Ikiavɨra Itir God ghaze, “Kɨ fomɨra ongarir bar ekiam tongɨram anebigha tuavim atɨ.

Aisaia 42:15

Kɨ mɨghsɨaba bar dagh asɨghasigh, egh temeba ko grazibar amightɨ, da mɨsigham. Egh kɨ faner ekiaba ko dɨpar akarebar amightɨ, da bar dakegham.

Ua Me Ini 14:21

Moses uan agharim ghufegha, ongarim gisɨn anemada. Ezɨ dɨmagarimɨn Ikiavɨra Itir God, amɨnir gavgavim gamizɨ, an aruem anadi naghɨn oto. Egha dɨmagarir kamɨn amɨnim ongarim gɨva ghuavti amɨnim tira. Ezɨ ongarim tongɨra biaghirɨgha, akuar pumuningɨn irɨgha nguazir dakɨrtɨzimɨn oto.

Ua Me Ini 7:21

Ezɨ osirir dɨpamɨn itiba bar ariaghirezɨ, dɨpam puvɨra mughuasi. Ezɨ Isipian gumazamiziba an dɨpatam raman ibura. Ezɨ ghuzim bar Isipɨn danganibar iti.

Ua Me Ini 7:18

Eghtɨ osiriba bar arɨmɨghireghtɨ, Nailɨn Fanem kurigh mɨghuaghtɨ, Isipia an dɨpamra aman iburagham.’ ”

Jon Osirizir Akar Aghuim 3:19

Ezɨ Godɨn kotiamɨn mɨngarimɨn arazim kamakɨn, Godɨn angazangarim nguazimɨn izegha gɨfa. Ezɨ gumazamiziba, me amir araziba bar ikufi, kamaghɨn amizɨ, me mɨtatem bagha bar ifonge, me angazangarimɨn aghua.

Mak Osirizir Akar Aghuim 4:39

Ezɨ Iesus dɨkavigha akar gavgavim amɨnim ganɨga, egha kamaghɨn ongarim mɨgei, “Gua amɨragh, nɨmɨra ikɨ!” A mɨgeima, amɨnim amɨrazɨ, dɨpam pura nɨmɨra irɨghav iti.

Daniel 6:20

Ana otogha gɨvagha, bar osemegha kamaghɨn dei, “Daniel, nɨ Godɨn Ikia Mamaghɨra Itimɨn ingangarir gumazim! Nɨn Godɨn nɨ nɨghnɨzir gavgavim an ikia zurara teviba apɨra an ziam fer kam, a nɨn akuragha laionbar akabar kuazɨ, da nɨ amezɨ o puvatɨ?”

Jeremaia 5:1

Ikiavɨra Itir God, kamaghɨn mɨgɨa ghaze: “Ia Jerusalemɨn gumazamiziba, ia uan tuaviba bar dar aru, uan biziba amadir danganibar ganigh fogh suam, gumazamizir aghuitam iti, o puvatɨ. Egh ia gantɨ, gumazamizir arazir aghuim ko guizɨn arazimɨn gɨn zuitam ikɨtɨ, kɨ nguibar ekiar kamɨn arazir kuraba gɨn amadagham.

Aisaia 63:13

A men faragha zuima, me tuavir ongarir bar konimɨn itimɨn aruava an gɨn zui. Egha me ghua dɨpaba puvatɨzir danganimɨn itir, hoziar atiabar mɨn pamtemɨn dɨka ghua daghirezir puvatɨ.

Aisaia 51:10

Egha nɨrara, gumazamiziba fɨrighɨrɨgh daru mangasa ongarir konim gamizɨma, a mɨsɨngizɨ tuavim oto.

Aisaia 41:28

“Kɨ aser kabar garir dughiamɨn, me mɨgɨrɨgɨatam gamizir puvatɨ. Egh me nɨghnɨzir aghuitam damuan kogham. Egh men tav nan azangsɨziba ikaraghan kogham.

Aisaia 36:20

Kantrin kaba me aser avɨravɨriba iti, ezɨ e me ko mɨsosi. Ezɨ men aseba men akurazɨ, me e mɨsogha e abɨrazir puvatɨ. O Jerusalemia, ia manmaghsua nɨghnɨgha ghaze, Ikiavɨra Itir God ian akuraghtɨ, e ia mɨsogh ia abɨraghan kogham? Bar puvatɨgham!”

Aisaia 19:5

Eghtɨ Nailɨn Fanem bar dakegh magɨrɨtɨ, nguazim otogh bar mɨsɨngigham.

Onger Akaba 107:33

Ikiavɨra Itir God faner ekiaba ko dɨpar atuibagh ami, da dati.

2 Eghaghaniba 32:15

Ia Hesekia ateghtɨ a ia gifaran markɨ, egh ia an akam baraghan markɨ. Bar guizbangɨra, kantrin igharazitamɨn asetam an akuragha gavgavim a ganɨngizɨ, a nan ovaviba ko mɨsogha me abɨrazir puvatɨ. Bar guizbangɨra, ian God uaghan ian akuraghan kogham.”

Ua Me Ini 14:29

Ongarim dɨvazim mɨn, vong ko vongɨn akuvagha itima, Israelia nguazir dakɨrtɨzimɨn zui.

Jeremaia 8:6

Kɨ kuarim atɨgha me barazi, me deragha guizɨn akatam na mɨgeir puvatɨ. Egha men tav uan arazir kuraba gɨn amangasa mɨgeir puvatɨ. Egha nan azangsɨgha ghaze, kɨ arazir kurar manamrama ami? Me vaghvagha uan ifongiabar gɨrara ghua, mati hoziaba mɨdorozim bagha ghuaba arigha ivemara ghuavɨra iti.

Onger Akaba 106:9

An Akar Gavgavim Ongarir Aghevim ganɨngi, ezɨ a dakegha mɨsɨngi. Ezɨ a gumazamiziba inigha ongarir torir kamɨn apengan itir nguazimɨn tuavir dakɨrtɨzimɨn zui.

Daniel 6:27

A gumazamizibar akurvagha ua me isi; an arazaraziba ko mirakelba overiam ko nguazimɨn dagh ami. Bar guizbangɨra, a Danielɨn akurazɨ laionba a gasɨghasɨghizir puvatɨ.”

Jeremaia 7:13

Ezɨ ia uaghan arazir kurar kabagh amuavɨra ikia zuima, kɨ dughiar avɨribar ia arazir kurar kaba ataghɨragh navim giraghasa ia mɨkemezɨ, ia oraghan aghua. Kɨ ian deima, ia nan dɨmdiam ikarazir puvatɨ.

Aisaia 11:15

Ikiavɨra Itir God, Ongarir Aghevim damightɨ a bar dakegham. Egh amɨnir fefer bar puvɨra ivaim damightɨ a izam, eghtɨ amɨnir kam, Yufretisɨn Fanem damightɨ a dakɨ mangɨ suvigham. Egh a 7plan dɨpar eghuravibar emɨr mangam. Kamaghɨn amizɨ, dughiar kamɨn tuavim, tuavir ekiamɨn mɨn bar ekevegh aruegham, eghtɨ gumazamiziba Asiria ategh daru izɨtɨ, men dagarir asuaba tong kumkumighan kogham. Tuavim Israelia bagha kuiaghirɨzɨ me Isip ategha izezɨ moghɨn, bizir kam uaghan kamaghɨram otivam.

Aisaia 23:11

Ikiavɨra Itir God uan agharim ghufegha gɨfa, an ongarim gisɨn an amadagha, kantrin ongarir mɨriamɨn itir kabagh asɨghasɨghasava ami. Kamaghɨn amizɨ, kantrin kabar itir gumazamiziba atiatiava agoi. A Kenanɨn nguazimɨn nguibar ekiar gavgavir kabagh asɨghasɨghasa akam anigha gɨfa.

Aisaia 44:27

Kɨ kamagh mɨkɨm suam, ongarim nɨ dakegh, eghtɨ a dakegham. Egh kɨ uaghan faner uaghira ongarim ginivizibar amightɨ, da mɨsigham.

Aisaia 54:6

“Guizbangɨra Ikiavɨra Itir God ghaze, kɨ nɨn diaghtɨ nɨ uam na bagh izam. Nɨ mati amizir igiam uan pamɨn ikezɨ, an pam gɨn anetaghizɨ, an navim bigha bar oseme. Kamaghɨn amizɨ, kɨ ghaze, nɨ ua izɨ.

Jeremaia 7:27

“Jeremaia, nɨ Israelian gumazamiziba akar kabar me mɨkɨmtɨ, me da bareghan kogham. Nɨ men dɨmtɨ, me nɨn dɨmdiam ikaraghan kogham.

Jeremaia 14:9

Manmagh amizɨ, nɨ gumazir okam nɨghnɨzimɨn mɨn, en akurvaghamin gavgaviba puvatɨ? Manmagh amizɨ, nɨ mati, mɨdorozir gumazim uan apaniba abɨnamin gavgaviba puvatɨ? Ikiavɨra Itir God, e bar fo, nɨ kamaghɨn amir puvatɨ. E fo, nɨ en tongɨn itima, e nɨn gumazamizibara iti. Kamaghɨn, nɨ e ataghɨraghan markɨ.”

Jeremaia 35:14

Fomɨra Rekapɨn otarim Jonadap, uan adaraziv gɨa ghaze, me wainɨn dɨpabar aman kogham. Ezɨ fomɨra ikegha iza datɨrɨghɨn tugha zui, Rekapia uan ovavimɨn akaba deravɨram dar gɨn ghua, egha wainɨn dɨpaba apir puvatɨ. Ezɨ kɨ dughiar avɨribar akaba ia ganɨdi, ezɨ ia nan akam barazir puvatɨ.

Habakuk 3:8

O Ikiavɨra Itir God, nɨ amɨnir ekiam amadazɨma, a iza faneba ko, ongarim gamizɨma, da dɨkavigha puvɨra ingari. Nɨ ti men atara kamaghɨn ami, o? Nɨ dɨkavigh izɨ uan gumazamizibar akuragh men apaniba abɨnamin dughiar kamɨn, amozimɨn ghuariar ekiaba mati, nɨn mɨdorozir hoziaba ko karisba.

Aisaia 64:6

E nɨn damazimɨn arazir kurabagh amigha, bar mɨze. E amir arazir kaba e ghaze, da ti derazɨ e dagh ami, arazir kaba nɨn damazimɨn bar ikuvigha, mati inir avɨzir bar pughpurizim. En arazir kurar kabara e gamima, e amɨnim ter afarir mɨdiaribagh ivarazɨ da ghuezɨ moghɨn, e bar mɨsigha atam ariaghire.