Aisaia 48:12 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹² Ezɨ Ikiavɨra Itir God kamaghɨn mɨgei, “Ia Israelia, ia gumazamizir kɨ diaziba, ia Jekopɨn anabamɨn adarasi, ia nan akam baragh! Kɨ uabɨra kɨ God. Kɨrara, kɨ bar faraghavɨra iti, egh kɨ ikɨvɨra ikɨ mangɨ bar gɨn dughiar abuananamɨn uaghan ikiam.

Aisaia 48:12 ပူးပေါင်းရင်းမြစ်များ

Aisaia 41:4

Tinara bizir kabagh amizɨ da otifi? Kɨ Ikiavɨra Itir Godra, kɨ dagh ami. Kɨ nguazim gamizɨ an otozir dughiamɨn, kɨ zurara bizibagh amima, da nan ifongiamɨn nguazir kamɨn otifi. Kɨ Ikiavɨra Itir God, kɨ bar faraghavɨra iti. Egh kɨ ikɨvɨra ikɨ mangɨ bar gɨn dughiar abuananamɨn, uaghan ikiam.

Akar Mogomem 22:13

Kɨrara kɨ bar faraghavɨra ikia egh abuan ikɨvɨra ikiam. Egha kɨ biziba bar dar mɨngarim, egha ingangarir kɨ amiba kɨ uaghan bar a da gefi.

Akar Mogomem 1:8

Ekiam, a Godɨn Gavgaviba Bar Itim, a kamaghɨn mɨgei, “Kɨrara kɨ faraghavɨra ikia, egh abuan ikɨvɨra ikiam.” Kar Godɨn kamnangra, a datɨrɨghɨn ikia, fomɨra ikia, egh gɨn uamategh izam.

Aisaia 44:6

Ikiavɨra Itir God, a Israelian atrivim, a men Akurvazir Gumazim, a Ikiavɨra Itir Godɨn Gavgaviba Bar Itim, A kamaghɨn mɨgei, “Kɨ Ikiavɨra Itir God, kɨrara kɨ bar faraghavɨra ikia, egh bar gɨn ikɨva abuan ikɨvɨra ikiam. Ezɨ godɨn tam ua itir puvatɨ. Kɨrara, kɨ God.

Aisaia 55:3

Ia nan gumazamiziba, ia izɨ kuariba arigh na baragh, ian ikɨrɨmɨrim deragham. Eghtɨ kɨ Atrivim Devit ganɨngizir apangkuvir arazim ia danɨngɨsɨ, Akar Dɨkɨrɨzir Gavgavim ia ko a damigham, eghtɨ a gavgavigh ikɨvɨra ikiam.

Aisaia 43:11

Kɨ uabɨra, kɨ Ikiavɨra Itir God, egha ian Akurvazir Gumazim, ezɨ ian akurvazir gumazitam ua itir puvatɨ.

Aisaia 49:1

Ia saghon itir arighatɨzibar gumazamiziba ko, saghon itir kantriba, ia nan akam baragh. Nan amebam tɨghar na batamin dughiamɨn, Ikiavɨra Itir God, na amɨsevegha gɨvagha ziam na gatɨ.

Aisaia 46:3

“Ia Israelɨn ikiavɨra itir varazira ia oragh, ia Jekopɨn anabamɨn adarasi, ian amebaba ia batezir dughiamɨn, ian gumazamizir ikɨzir igiamɨn otivizir dughiamɨn ikegha iza datɨrɨghɨn, kɨ ia inigha ia atera, bar deravɨra ian gari.

Godɨn Araziba 32:39

Ia oragh. Ia kamaghɨn fogh, kɨ uabɨra, kɨ guizbangɨra God. Ezɨ godɨn tam ua itir puvatɨ. Kɨ uabɨ, kɨ ikɨrɨmɨrir angamɨra itim gumazamizibagh anɨga, egha men duaba isi me ovei. Kɨ gumazim gasɨghasigh ua anekɨrightɨ a deragham. Egh kɨ bizitam damutɨ gumazitam nan anogoreghan kogham.

Akar Mogomem 17:14

Egh me Sipsipɨn Nguzim ko mɨsogham, eghtɨ Sipsipɨn Nguzim me gasɨghasɨgh me abɨragham. Gumazamizir Sipsipɨn Nguzim ko itiba, God me amɨsevegha, men diazɨma me guizɨn akamɨn gɨn ghua tuivigha gavgavigha mɨdorozir kam gami. Sipsipɨn Nguzim, a guizbangɨra Gumazamizir Ekiabar Gumazir Ekiam ko Atrivibar Atrivir Ekiam. Kamaghɨn amizɨ, a me abɨragham.”

Akar Mogomem 2:8

Gumazir kam ua kamaghɨn mɨgei, “Nɨ Smernan nguibar ekiamɨn itir siosɨn garir ensel bagh akataba osirigh. Akar kaba kamakɨn: “Kɨ gumazir bar faraghavɨra ikia, egh abuan ikɨvɨra ikiamim. Kɨ fomɨram areme, egha ua dɨkavigha datɨrɨghɨn kɨ angamɨra iti. Egha kɨ nɨ bagha akar kam amadazɨma a izi.

Akar Mogomem 1:11

Tiarir kam kamaghɨn mɨgei, “Bizir nɨ garir kaba bar, nɨ akɨnafarimɨn ada osirigh, egh 7plan siosba bagh da amangigh. Siosɨn Efesusɨn nguibamɨn itim, ko Smernan nguibamɨn itim, ko Pergamum ko Taiataira ko Sardis ko Filadelfia ko Laodisian nguibamɨn itiba.”

1 Pita 2:9

Ezɨ God ia mɨsevegha gɨvazɨma ia an adarazir otifi. Egha ia atrivimɨn ofa gamir gumazamizibar mɨn otifi. Ia bar guizbangɨra Godɨn gumazamizibara, egha God baghavɨra iti. Egh ia Godɨn gumazamizibar ikɨva, an arazir aghuir a ia gamizibar gun mɨkɨmasa, ia mɨsefe. Ia faragha mɨtarmemɨn ikezɨ, a ian diagha uan angazangarir aghuimɨn ia atɨ.

1 Korin 1:24

Ezɨ e gumazamizir God diaziba, Juda ko Kantrin Igharazibar Gumazamiziba uaghara, e fo, Kraisra a Godɨn gavgavim ko Godɨn fofozim.

Akɨnafarir Pol Romɨn Nguibar Ekiamɨn Itir Sios Bagha Osirizim 8:28

E fo, God bizibagh amima da vɨrara uari inigha ingara, gumazamizir bar God gifongezibagh amima, me dera. Kar gumazamizir God ua me iniasa mɨkemegha gɨvaziba, a men dia.

Akɨnafarir Pol Romɨn Nguibar Ekiamɨn Itir Sios Bagha Osirizim 1:6

Ezɨ ia uaghan, Krais Iesus ian diagha ghaze, ia nan adarasi, ezɨ ia an gɨn zui. Egha ia Iesusɨn aven itir marasi.

Matyu 20:16

Egha Iesus ghaze, “Kamaghɨra gumazir gɨn izeziba faragh ikiam, eghtɨ faragha itiba me gɨn mangam.”

Aisaia 51:7

“Ia arazir aghuim deragha a gɨfogha uan navir averiabar aven nan akamɨn suiragha gavgavizir darasi, ia gumazir ian atarava akar kurabar ia gamua, ia gasɨghasɨzibar atiatingan markɨ.

Aisaia 51:4

“Ia nan gumazamiziba, ia deraghvɨra nan akam baragh. Kɨ dabirabir aghuimɨn arazim bagh gumazamiziba bar men sure damuam, eghtɨ nan guizɨn arazim, angazangarimɨn mɨn kantriba bar dar ikiam.

Aisaia 51:1

Ikiavɨra Itir God kamaghɨn mɨkeme: “Ia arazir aghuimɨn gɨntɨghasa a bagha pamten ingara, Ikiavɨra Itir Godɨn ifongiam buria a baghavɨra itir darasi, ia nan akam baragh! Ia uan inazir afeziam Abraham ko amebam Sara gɨnɨghnɨgh. Aning mati dagɨam, kɨ aning abigha ia ini. Kɨ Abrahamɨn diazir dughiamɨn, a boriba puvatɨ. Ezɨ kɨ deragha aning gamizɨma, aningɨn ovavir borir bar avɨrim otifi.

Aisaia 34:1

Ia nguazir kamɨn itir kantriba bar dar gumazamiziba, ia izɨ. Ia ikɨziba bar izɨ uari akuvagh akar kam baragh. Nguazim ko an itir biziba bar moghɨra, ia uaghan kuariba arigh deraghvɨram oragh.

Aghuzir Akaba 8:32

Ezɨ nɨghnɨzir aghuim ua kamaghɨn mɨgei, “Nan boriba, ia deraghvɨra nan akam baragh egh nan arazibar gɨn mangɨ. Ia kamaghɨn damuva, ia bar akuegham.

Aghuzir Akaba 7:24

O nan boriba, ia oragh, ia deraghvɨra nan akam baragh.

Aisaia 40:26

Ia pɨn overiamɨn gan! Tinara mɨkoveziba ko overiamɨn itir bizibar ingarizɨ, da otifi? Bizir kaba, Godɨn mɨdorozir gumazibar mɨn iti. A ziaba dagh arɨgha dar pone. An adar dɨbobonim gɨfogha, vaghvagha dar ziabagh fo. A gavgaviba bar iti, kamaghɨn amizɨ, bizir pɨn itir katam ovengan kogham.

Aisaia 43:10

Ikiavɨra Itir God ghaze, “Israelia, ia na ko ikia uan damazibar nan gara na gɨfo, egh ia kotɨn aven nan gun mɨkɨm. Ia nan ingangarir gumazamizibar otivasa, kɨ ua baghavɨra ia amɨsefe. Kɨ ghaze, ia na gɨfogh nɨghnɨzir gavgavim nan ikɨ, deragh na gɨfogh suam, kɨ bar uabɨra kɨ guizbangɨra God. Fomɨra godɨn tam nan faragha ikezir puvatɨ, egh godɨn tam uam otogh nan danganim inighan kogham.

Aisaia 46:4

Kɨ ian God, kɨ ian ganvɨra ikɨ mangɨ, ia bar ghurigh dapanir arɨzir ghurghuriba otivighamin dughiam otogham. Kɨ fomɨra uabɨ ian ingara ia gamizɨ, ia gumazamizir ikɨzir vamɨran oto, egh kɨ zurara ia aterɨva, ian gan ian akurvagham.

Aisaia 44:1

Ikiavɨra Itir God ghaze, “Ia Israelia, ia Jekopɨn anabamɨn adarasi, ia oragh! Kɨ uabɨ ia amɨsevezɨ, ia nan ingangarir gumazamizibar iti.