Aisaia 41:13 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹³ Kɨ Ikiavɨra Itir God, ian God, kɨ ian boroghɨra ikia, gavgavim isa ian agharir guvim ganɨga kamaghɨn ia mɨgɨa ghaze, Ia atiatingan markɨ. Kɨrara, kɨ ian akurvagham.

Aisaia 41:13 ပူးပေါင်းရင်းမြစ်များ

Aisaia 41:10

Kɨ ian God, egha kɨ ia ko iti, kamaghɨn amizɨ, ia atiatingan markɨ. Kɨ ia damutɨ ia gavgavightɨ, kɨ ian akuragham. Kɨ bar deravɨra ian ganɨva, uan gavgavir ekiamɨn ian apaniba abɨnam.

Onger Akaba 73:23

Bar guizbangɨra, kɨ nɨ ko zurara iti, ezɨ nɨ nan dafarimɨn suira.

Onger Akaba 63:8

Nan duam nɨ ko poroghav iti, ezɨ nɨn agharim deragha na avara.

Onger Akaba 109:31

Guizbangɨra, apaniba gumazamizir onganaraziba isɨ kot datɨgh kamagh mɨkɨm suam, me arɨmɨghiram. Ezɨ, God gumazamizir onganarazibar gara men akurvasi.

Aisaia 42:6

“Kɨ Ikiavɨra Itir God, nɨ nan arazir aghuimɨn bizibar amuasa kɨ nɨn dia. Egh nɨn agharimɨn suiragh, deragh nɨ geghuv nɨn ganam. Egh nɨ bangɨn, kɨ Akar Dɨkɨrɨzir Gavgavim nguazir kamɨn gumazamiziba ko a damuam. Egh nɨ damutɨ, nɨ kantribar gumazamiziba, bar men angazangarimɨn mɨn ikiam.

2 Timoti 4:17

Ezɨ Ekiam uabɨ nan boroghɨn ikia gavgavim na ganɨdi. Kamaghɨn amizɨ kɨ Akar Aghuim bar anekurima, Kantrin Igharazibar Gumazamiziba, me bar a barasi. Ezɨ kɨ ovengasava amima God nan akura, mati a laionɨn akamɨn ua na ini.

Aisaia 45:1

Ikiavɨra Itir God, a Sairus atrivimɨn ikiasa anemɨsevegha gɨvagha, gavgavim a ganɨngi. Eghtɨ a kantrin igharazibav sogh, men atrivibar gavgaviba agɨvaghtɨ, me aghumsɨgham. Eghtɨ kɨ pura Sairus bagh men nguibabar dɨvazibar tiar akaba kutɨ, gumazitam ua da dukuman koghtɨ, Sairus aven mangɨ, uan apaniba dɨkabɨnam. Egha Ikiavɨra Itir God kamaghɨn Sairus mɨgɨa ghaze:

Aisaia 43:6

Kɨ not ko sautɨn itir gumazamizibav kemeghtɨ, me ia ateghtɨ, ia uamategh izam. Kɨ kantrin bar saghuiamɨn itiba, me mɨkɨmtɨ, me nan otariba amadaghtɨ, me uamategh uan nguibamɨn izam. Kɨ gumazamizir nguazir kamɨn oteviba bar dar itiba, me mɨkɨmtɨ, me nan guiviba amadaghtɨ, me uamategh uan nguibamɨn izam.

Aisaia 51:18

Jerusalemɨn nguibar ekiam, nɨn borir tuavim nɨn akakagh, nɨn dafarimɨn suiragh mangamiba puvatɨ. Boritam nɨn dafarimɨn suiragh, nɨ damutɨ, nɨ deragh daruan kogham.

Ua Me Ini 14:13

Moses kamaghɨn me ikaragha ghaze, “Ia atiatingan markɨ, ia tuivigh gavgafigh. Ia datɨrɨghɨn, Ikiavɨra Itir Godɨn gavgavimɨn ganightɨ, a ian akuragh ua ia inian. Ia datɨrɨkɨn Isipian gari, ia ua men ganan kogham.

Ua Me Ini 20:20

Ezɨ Moses me mɨgei, “Ia atiatingan markɨ. God kamaghsua ifonge, ia bar an atiatigh an apengan ikɨ, egh arazir kurabar amuan kogham. Kamaghɨn a iza ian navir averiabagh foghasa, da guizbangɨra a baghavɨra iti, o puvatɨ.”

Jeremaia 30:10

Ikiavɨra Itir God kamaghɨn mɨgei: “Ia Israelia, ia Jekopɨn ovavir boriba, ia nan ingangarir gumazamiziba, ia atiatingɨva dɨgavir kuram damuan markɨ. Bar guizbangɨra, ia kantrin saghon itir kamɨn kalabusɨn iti. Eghtɨ kɨ ua ia inightɨ, ia ua uan nguazimra izegh, deraghvɨra dapiagham. Eghtɨ tarazi ua ia damutɨ ia atiatingan kogham.

Jeremaia 46:27

Ikiavɨra Itir God kamaghɨn mɨkeme: “Ia Israelia, ia Jekopɨn ovavir boriba, ia nan ingangarir gumazamiziba, ia atiatingɨva dɨgavir kuram damuan markɨ. Bar guizbangɨra, ia kantrin saghon itir kamɨn kalabusɨn iti. Eghtɨ kɨ ua ia inightɨ, ia ua uan nguazimra izegh, deraghvɨra dapiagham. Eghtɨ tarazi ua ia damutɨ ia atiatingan kogham.

Hagai 2:5

Ia fomɨra Isip ategha azenan izasava amima, kɨ ia ko Akar Gavgavim akɨra ghaze, kɨ ia ko zurara ikiam. Guizbangɨra nan Duam ian tongɨn ikiavɨra iti. Kamaghɨn amizɨ, ia atiatingan markɨ.

Onger Akaba 118:7

Ikiavɨra Itir God uabɨ nan akurvasi. Kɨ Ekiamra gantɨ, a nan apaniba abɨnigh me gasɨghasigham.