Aisaia 40:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² Ia apangkuvim itir akar aghuir kam isɨ, Jerusalemɨn nguibamɨn gumazamiziba me mɨkɨm gavgavim me danɨng. Egh kamaghɨn nan gun me mɨkɨm suam, kɨ Ikiavɨra Itir God, kɨ uan dafarimɨn men arazir kuraba ikaragha bar dughiar ruarimɨn me ataghizɨ me kalabusɨn ike. Ezɨ datɨrɨghɨn kɨ men mɨzaziba ko ingangarir ekiam agɨvagha men arazir kuraba gɨn amadazɨ, me fɨriaghɨre.”

Aisaia 40:2 ပူးပေါင်းရင်းမြစ်များ

Sekaraia 9:12

Ia kamaghɨn fo, kɨ ian akuraghasa ifonge. Kamaghɨn amizɨ, ia uamategh uan nguibamɨn izɨ deravɨra ikiam. Ia osɨmtɨzir Bar ekiam ateri, ezɨ kɨ ia mɨgɨa ghaze, kɨ arazir aghuibar ia damuam. Eghtɨ arazir aghuir kam bar osɨmtɨzir kam gafiragham.

Aisaia 61:7

Ia faragha bar aghumsɨzir dafam inigha uan guaba monge. Egh gɨn ia uari uan nguazim inigh a dapiagh bizir bar avɨrim initɨ, da bizir ia faragha inizibagh afiragham. Eghtɨ ia bar akongegh ikɨ kamaghɨra ikiam.

Hosea 2:14

Egha Ikiavɨra Itir God uam akar isɨn zuimɨn kamaghɨn mɨgei: “Kɨ akar aghuimɨn amizir kam mɨkɨmɨva, egh uam a gekuigh gumazamiziba puvatɨzir danganimɨn mangɨgham. Egh an asughasugh anepezeperɨva, kamaghɨn a mɨkɨmam, ‘Kɨ bar nɨ gifonge.’

Akar Mogomem 18:6

Ia amizir kam gumazamizibagh amizir arazir kuraba bagh ivezir magh garimra a ikaragh. An arazir kuraba, da bar avɨraseme, kamaghɨra ia an arazir kurabar ivezim isafuraghɨva bar a danɨngigh. A dɨpar onganir gavgavimɨn kap isa gumazamiziba bagha a inge, kamaghɨra ia dɨpar gavgavir onganim uam a isafuragh a bagh kap gingegh a danɨngigh.

Jeremaia 16:18

Me nguazir kɨ me ganɨngizir kam, marvir guar kurar kaba isa nan nguazim garɨghizɨ, da nan damazimɨn mɨze. Kamaghɨn kɨ me amizir arazir kuramɨn ivezim givɨragh, ua a ikaragham.”

Aisaia 44:22

Ian arazir kuraba, kɨ da adegha da isa pɨn da akunizɨ, amɨnim da inigha ghu. Nɨn arazir kuraba gɨvagham, mati ghuariaba aruem mɨzaraghara anadi, da a sara ghuegha gɨfa. Kɨ ian akurvagha deravɨra ian gari, kamaghɨn amizɨ, ia uamategh na bagh izɨ.”

Aisaia 43:25

Kɨrara, kɨ God, kɨ uan ziar ekiam baghavɨra nɨghnɨsi, kamaghɨn kɨ ian arazir kuraba bar da gɨn amada. Egh kɨ ua ian arazir kurar kabagh nɨghnɨghan kogham.

Habakuk 2:3

Bizir kam otivamim dughiam, a tɨghar maghɨn izɨ guizɨn otivam. Kamaghɨn amizɨ, bizir kɨ nɨn akaghamin kaba, nɨ da osirightɨ da ikɨ. Bizir kɨ nɨn akakaghamiba, da bar guizbangɨra kɨran oveghangɨn otivigham. Nɨ ti ghaze, da zuamɨra otoghan kogham, puvatɨ, nɨ pura mɨzuam ikɨ, bizir kam bar aghumra izɨva otogham.

Jeremaia 29:11

Kɨ Ikiavɨra Itir God, kɨ bizir ian akurvaghsɨ damuamiba, kɨ adagh nɨghnigha dagh fogha gɨfa. Kɨ deraghvɨra ia damutɨ ia navir amɨrizim ko, dabirabir aghuim ikiasa kɨ ifonge. Kɨ pazɨ ia damuan aghua. Ia bizir kɨ damuamin kabagh nɨghnɨgh, dughiar kam mɨzuam ikɨtɨ, an otogham.

Aisaia 35:4

Ia gumazamizir atiatiba me mɨkɨm suam, “Ia tuivigh gavgavigh, egh atiatingan markɨ. Ian God izɨ ian akuragh, egh ivezir kuram isɨ ian apanibar anɨngɨva bar me gasɨghasigham.”

Aposel 1:7

Ezɨ Iesus kamaghɨn me mɨgei, “Biziba otivamin dughiaba, nan afeziam uabɨ uan gavgavimɨn da atɨ. Ezɨ ia tizim bagh dughiar an atɨzir kam gɨfoghasa. Kar ian bizim puvatɨ.

Daniel 11:35

Eghtɨ apaniba gumazir dapanir tabav soghtɨ me arɨghiram. Eghtɨ men osɨmtɨzir kam gavgavim gumazamizir mabar anɨngam. Me arazir aghuibar amuva, Godɨn damazimɨn bar zuegham. Eghtɨ arazir kam gɨvaghan kogham. A kamaghɨra ikɨ mangɨ God inabazir dughiar abuananamɨn tugham.

Aisaia 12:1

Eghtɨ gɨn izamin Dughiam otoghtɨ, ia Israelia kamaghɨn igham damuam: “O Ikiavɨra Itir God, kɨ nɨn ziam fe. Nɨ nan anɨngaghe, ezɨ nɨn anɨngagharim gɨfa, ezɨ nɨ bar deraghavɨra nan asughasugha gavgavim na ganɨdi. Ezɨ datɨrɨghɨn nan navim deraghavɨra iti.

Galesia 4:4

Ezɨ God kamaghɨn ifonge, e an boribar otivasa, egha Moses Osirizir Arazibar apengan itir gumazamiziba, a uam e givezasa. God fomɨra e givezasa dughiam ginaba. Ezɨ dughiar a fomɨra inabazim datɨrɨghɨn otozɨ, a uan otarim amadazɨma a ize. Ezɨ amizim a bate. Ezɨ a gumazir Moses Osirizir Arazibar apengan itimɨn mɨn oto. Egha e Moses Osirizir Arazibar apengan itir gumazamiziba, a ua e ini.

Aisaia 49:25

Ezɨ Ikiavɨra Itir God kamaghɨn Jerusalem mɨgei, “Kɨ guizbangɨra nɨn adarazi ko nɨn bizir aghuiba, apanir gavgaviba ko atrivir kuraba dam ada iniam. Nɨ mɨsozir gumaziba, kɨ nɨ bagh men mɨdoroziba ikarvagham, egh nɨn boribar akuragh ua me inigham.

Aisaia 33:24

Eghtɨ dughiar kamɨn, Jerusalemɨn itir gumazitam kamaghɨn mɨkɨman kogham, “Kɨ arɨmariam iti.” Eghtɨ Ikiavɨra Itir God Jerusalemɨn itir gumazamizibar arazir kuraba gɨnamangam.

Onger Akaba 32:1

Gumazamizir arazir kurabagh amiba, God men arazir kuraba gɨn amadagha da avara, eghtɨ gumazamizir kaba bar akuegham.

Sekaraia 1:15

Kɨ fomɨra uan gumazamiziba mong men atara, egha Kantrin Igharazibar Gumazamizibav mɨkemezɨ, me iza mɨzazim me gase. Me izava amɨraghavɨra me gasɨghasɨghizir puvatɨ. Me, me gasɨghasɨghamin mɨtaghniam gafiragha bar me gasɨghasɨki. Ezɨ kantrin igharaziba datɨrɨghɨn osɨmtɨziba puvatɨgha deraghavɨra iti. Ezɨ kɨ osɨmtɨzir ekiam men iti.

Daniel 12:9

Ezɨ a kamaghɨn nan akam ikaragha ghaze, “Daniel, nɨ mangɨ. Guizbangɨra, akɨnafarim nɨ a dukuagha gɨfa. Eghtɨ akar kamɨn mɨngarim modogh mamaghɨra ikɨ mangɨ dughiar abuananam otogham.

Daniel 12:4

Ezɨ datɨrɨghɨn a na mɨgɨa ghaze, ‘Nɨ Daniel, nɨ akaba itir akɨnafarir kam dukuagh, egh kendel gris a datɨghtɨ, an akaba modogh ikiam. Egh akɨnafarir kam dukuagh mamaghɨra ikɨ mangɨ dughiar abuananam otogham. Eghtɨ gumazamizir avɨrim pamtem akar kamɨn mɨngarim gɨfoghsɨ damuva avegham.’ ”

Daniel 9:12

Egha nɨ en gumazir dapaniba ko e damuasa mɨkemezɨ moghɨn, nɨ bizir kam gami. Egha nɨ Jerusalem puv a gamigha, bar pazavɨram a gasɨghasɨki. Jerusalem gasɨghasɨzir arazir kam, a nguazimɨn itir nguibar igharazibagh asɨghasɨzir arazim bar a gafira.

Daniel 9:2

An azenir farazim, ana atrivimɨn itima, kɨ Daniel, kɨ Godɨn akɨnafariba gara da dɨbori. Egha, Godɨn akam inigha izir gumazim Jeremaia, Ikiavɨra Itir God a ganɨngizir akam, kɨ a gɨnɨghnɨsi. A ghaze, Jerusalem 70plan azenibar ikuvighvɨra ikiam.

Jeremaia 17:18

Egh datɨrɨghɨn nɨ paza na gamir gumaziba, aghumsɨzim me danɨngightɨ, me dɨgavir kuram damightɨ, kɨ dɨgavir kuram damigh aghumsɨghan kogham. Nɨ men arazir kuram bangɨn dughiar kuram damightɨ, a me batogh bar me gasɨghasɨkigh.

2 Eghaghaniba 30:22

Isar kamɨn dughiamɨn, Livain maba Ikiavɨra Itir Godɨn ingangariba bar deraghavɨra dagh ami, kamaghɨn amizɨ, Atrivim Hesekia me mɨnabagha gavgavim me ganɨdir akabar me mɨgei. Dughiar kamɨn, gumazamiziba 7plan aruebar Ikiavɨra Itir Godɨn ziam fer isar ekiam gamua God ko navir vamɨran ikiamin ofabagh amua, egha Ikiavɨra Itir God, men ovavibar Godɨn ziam fava a mɨnabi.

Jenesis 34:3

Sekem, a Jekopɨn guivim Dainan gari, an ganganiba bar an derazɨma, a bar a gifuegha anepezepera mɨgɨrɨgɨar otevir bar isɨngtɨzibar a gamuavɨra iti.

Aisaia 6:7

Egha avir mɨkɨar kam nan akam gatɨgha uam a ini, egha kamaghɨn na mɨgei, “Nɨ oragh. Kɨ avir mɨkɨar kam nɨn akam gatɨ, ezɨ God datɨrɨghɨn nɨn arazir kuraba gɨn amadagha, nɨn osɨmtɨzim adangi, ezɨ nɨ zue.”

Aisaia 14:3

Ia Israelia, Ikiavɨra Itir God ian mɨzazim ko dughiar kuram agɨvaghtɨ, ia deravɨra ikiam. Igharaz darazi ia abɨrima, ia men ingangarir mɨtɨabagh ami, eghtɨ osɨmtɨzir kam, datɨrɨghɨn gɨvagham.

Aisaia 53:5

Ezɨ en akaba batozir arazim bagha, me an ekianim bɨra. Arazir kurar e amiba bangɨn, me a dɨkabɨragha a gasɨghasɨki. Egha me puv a mɨsozima an mɨkarzim tintinibar bɨaghire, mɨzazir a inizir kam e gamizɨ, e ghuamaghegha ua deragha bar deravɨra iti.

Aisaia 53:6

Guizbangɨra, e bar moghɨra sipsipbar mɨn tintinibar arua, vaghvagha uan ifongiabar gɨn arui. Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn, a kamaghɨn amizir puvatɨ. A uan ingangarir gumazim gamizɨ, a en danganim inizɨ, e iniamin mɨzaziba, an ada isa a ganɨngi.”

Aisaia 54:15

Eghtɨ gumazitaba nɨ ko mɨsoghsɨ izɨtɨ, nɨ kamaghɨn fogh suam, kɨ me amadazir puvatɨ. Me uan ifongiamɨn izi. Kamaghɨn amizɨ, tina nɨ mɨsoghasa izi, a uabɨ kuram iniam.

Aisaia 54:17

Eghtɨ mɨsoghamin bizir katam nɨ gasɨghasighan kogham. Eghtɨ nɨ mɨtɨgh gavgavigh gumazir pura mɨgɨrɨgɨaba nɨ gasibar mɨgɨrɨgɨaba ikarvagham, eghtɨ men mɨgɨrɨgɨaba gavgaviba bar puvatɨgham. Ezɨ arazir kamra kɨ deravɨra uan ingangarir gumazamizibar garava, me gamizɨ, me uan apaniba dɨkabɨri. Nan arazir kam, a ivezir aghuimɨn mɨn, kɨ a isa uan ingangarir gumazamizibagh anɨdi. Kɨ Ikiavɨra Itir God, kɨ mɨkemegha gɨfa.”

Aisaia 55:7

Eghtɨ gumazamizir arazir kurabagh amiba uan arazir kuraba ategh, uam adar amusɨ nɨghnɨghan kogham. Egh me uamategh Ikiavɨra Itir God, en God, a bagh izɨtɨ, a men apangkuvigh men arazir kuraba gɨn amangam.”

Aisaia 66:13

Ia Jerusalemɨn nguibar ekiamɨn gumazamiziba, amebam deravɨra uan borimɨn gara akar aghuimɨn a mɨgeima, a navir amɨrizim iti moghɨn, kɨ bar deraghvɨra ian gan navir amɨrizim isɨ ia danɨngtɨ, ia deraghvɨra ikiam.

Jeremaia 51:10

Ikiavɨra Itir God Babilon gasɨghasɨki, ezɨ arazir kamɨn a en gumazamizibar arazir aghuiba azenim gatɨ. Aria, e Saionɨn mangɨva, Ikiavɨra Itir God, en God amizir bizibar gun mɨkɨmam.”

Esekiel 16:42

Eghtɨ nan anɨngagharim gɨvaghtɨ kɨ amɨragham. Egh navim ua nɨ bagh ikuvan kogham. Egh kɨ navir amɨrizim ikɨ, ua nɨn ataran kogham.

Sekaraia 1:13

Ezɨ Ikiavɨra Itir God, apangkuvir akaba ko, gavgavim anɨdir mɨgɨrɨgɨaba enselɨn na mɨgeir kam ganɨdi.

Onger Akaba 85:3

Nɨ faragha men atara men anɨngazi. Nɨ arazir kam, datɨrɨghɨn uam a gamir puvatɨ.

Fofozir Gumazim 3:4

Egha e aziamin dughiaba iti, egh e akamɨn dughiaba iti. Egha e bizibagh nɨghnɨgh navim ikuvamin dughiaba iti, egh e bar akongegh ighiabar amuamin dughiaba iti.

Aisaia 27:9

Egh Israelia guizbangɨra mɨkɨm suam, Ikiavɨra Itir God men arazir kurabar osɨmtɨziba agɨvam, eghtɨ me uan asebar ofa gamir dakoziba apɨrighɨva, dar dagɨaba amsarɨraghitɨ da nguazir mɨnemniamɨn mɨn otogham. Egh me temer guarir aser amizim Aseran nedazim itiba okɨrarɨgh. Egh paura tuema a mughuriar aghuim zuir dakoziba, bar dagh asɨghasɨkigh. Tuavir kamɨn, Ikiavɨra Itir God men arazir kuraba gɨn amadagham.

Aisaia 51:17

O Jerusalemia, ia dɨkafigh. Ia dɨkavigh uamategh tugh gavgafigh. Ikiavɨra Itir Godɨn anɨngagharim, mati wainɨn kap a ia ganɨngi, egha a ia gamizɨ, ia bar anepava anegɨvagha, bar ongani.

Hosea 2:16

Egha Ikiavɨra Itir God kamaghɨn Israelia mɨgei: “Ia dughiar kamɨn, nan amuimɨn mɨn ikɨ kamaghɨn na dɨpon suam, ‘Nɨ nan pam.’ Egh ia ua kamaghɨn na gɨnɨghnɨghan kogh suam, ‘Nɨ aser kam Bal, nɨ nan Ekiam.’ Puvatɨ.

Sefanaia 3:15

Ikiavɨra Itir God, ia gasɨghasɨghasa mɨkemezir akar kam, a anegɨvagha ian apanibar agɨrazɨ me are. Ikiavɨra Itir God, a Israelian atrivim, a ian tongɨn iti. Kamaghɨn amizɨ, ia bizitamɨn atiatingan markɨ.