Aisaia 4:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Jerusalemɨn ikiavɨra itir gumazamizir kaba, me Saionɨn ikiavɨra itir varazira, God angamɨra ikiasa me amɨsevegha gɨfa, egha uan akɨnafarimɨn men ziaba osiri. Egh a datɨrɨghɨn me dɨpon suam, me an gumazamizibara.

Aisaia 4:3 ပူးပေါင်းရင်းမြစ်များ

Luk Osirizir Akar Aghuim 10:20

Eghtɨ duar kuraba ian akam mɨrara ghuzir bizim bagh akongan markɨ. God uan Nguibamɨn ian ziaba osirizir bizim baghɨva ia akong.”

Akar Mogomem 21:27

Eghtɨ bizir mɨzɨrɨziba ko gumazamizir arazir kurigha mughazibagh amiba ko, gumazamizir ifavariba, me nguibar ekiar kamɨn aven mangan kogham. Bar puvatɨgham, gumazamizir ziaba akɨnafarir zurara itimɨn aven itiba, akɨnafarir kam a Sipsipɨn Nguzimɨn akɨnafarim, merara nguibar ekiar kamɨn aven mangam.

Aisaia 60:21

Nɨn gumazamiziba bar moghɨra arazir aghuibara damu, egh kɨ me bagha mɨsevezir nguazim me a inigh, a dapiagh zurara ikiam. Guizbangɨra, nan dafarimɨn, kɨ men ingarigha me gamizɨ me ikɨzir vamɨran gumazamizibar otogha, mati kɨ temer ovɨziba oparizɨ, da biar avɨriba otifi. Kɨ kamaghsua, kɨ kamaghɨn damightɨ, ikɨzir igharazibar gumazamiziba ganɨva, ziar ekiam na danɨngam.

Aisaia 52:1

O Saion, nɨ dɨkavigh tugh gavgavigh! O Jerusalem, nɨ God baghavɨra itir nguibar ekiam! Nɨ kurkazir bar aghuiba uabɨn kurkegh ganganir bar aghuim damuam. Guizbangɨra, Ekiam gɨfozir puvatɨziba, me gumazir uan mɨkarzir mogomer iniba aghorezir puvatɨziba, ko Godɨn damazimɨn zuezir puvatɨziba, me uam nɨn aven izan kogham.

Onger Akaba 69:28

Nɨ gumazamizir kabar ziaba, akɨnafarir zurara itimɨn aven da angarigh. Egh men ziaba, nɨn damazimɨn zuezir gumazamizibar ziaba koma ada osiran markɨ.

Akar Mogomem 20:15

Eghtɨ gumazamizibar ziaba, akɨnafarir God gumazamizir ikɨrɨmɨrir zurara itim iniamin ziaba osirizim, men ziaba aven itir puvatɨ, me uaghan me isɨ danganir avim bar puvɨra isim, me akunam.

Akar Mogomem 17:8

Asɨzir atiar nɨ faragha ganizir kam, a faragha ike, egha datɨrɨghɨn ua itir puvatɨ. Egh a mozir bar konezim ategh azenan izɨtɨ, God a gasɨghasɨgham. God tɨghar nguazimɨn ingaramin dughiam, a gumazamizir mabar ziaba akɨnafarir zurara itimɨn aven da osirizir puvatɨ. Gumazamizir kaba asɨzir atiar kamɨn ganigh dɨgavir kuram damuam. Me fo, a fomɨra ike, egha datɨrɨghɨn itir puvatɨ, egh a gɨn uamategh otivam.

Akar Mogomem 13:8

Eghtɨ nguazimɨn itir gumazamiziba asɨzir atiar kamɨn ziam fam. Fomɨra, nguazir kam tɨghar otivamin dughiamɨn, God gumazamizir ikɨrɨmɨrir zurara itim iniamin ziaba akɨnafarimɨn aven da osiri. Akɨnafarir kam, kar me fomɨra mɨsoghezɨ aremezir Sipsipɨn Nguzimɨn akɨnafarim. Eghtɨ gumazamizir kabara, me asɨzir atiamɨn ziam fan kogham.

Akar Mogomem 3:5

Gumazamizir mɨdorozim gamua apaniba abɨriba, korotiar ghurghurir kamagh garitam arughtɨ, akɨnafarir God gumazamizir ikɨrɨmɨrir zurara itim iniamin ziaba osirizim, kɨ men ziaba angarighan kogham. Puvatɨ. Kɨ uan afeziam ko an enselbar damazibar gumazir kamɨn gun mɨkɨm suam, me konanaba.

Hibru 12:14

Ia, gumazamiziba bar me ko, dabirabir aghuim damuva, navir amɨrizimɨn arazim baghɨva mɨghɨghvɨra ingar aghariba kɨnkɨn. Egh ia uari isɨ God danɨngɨsɨ, Godɨn damazimɨn zuezir arazim bagh mɨghɨghvɨra ingar. Gumazir Godɨn damazimɨn zuezir araziba puvatɨzim, an Ekiamɨn ganan kogham.

Kolosi 3:12

God ua baghavɨra ia mɨsevezɨ, ia an gumazamizibar otivigha gɨfa, ezɨ a bar ia gifonge. Kamaghɨn amizɨ, ia arazir kabar amu: Ia gumazamizibar apangkuv, egh arazir aghuibar gumazamizir igharazibar amu, egh uari dɨkabɨragh, egh gumazamizibar asughasugh, egh dɨghorim amɨrazir arazim damu.

Filipai 4:3

Ezɨ nɨ bar guizɨn na ko ingarir gumazim, kɨ nɨ mɨgei, nɨ amizir kamningɨn akuragh. Aning na ko, e Akar Aghuimɨn ingangarim ateri. Ezɨ Klemen ko, na ko ingarir gumazir maba, me uaghan e ko ingari. Gumazamizir kabar ziaba, akɨnafarir God gumazamizir ikɨrɨmɨrir zurara itim iniamin ziaba osirizim, da an aven iti.

Akɨnafarir Pol Romɨn Nguibar Ekiamɨn Itir Sios Bagha Osirizim 11:5

Kamaghɨra, dughiar kamɨn uaghan Israelian tongɨn ikiavɨra itir varazira, God men apangkuvigha, ua bagha me amɨsefe.

Esekiel 43:12

“Kar Godɨn Dɨpenimɨn Akar Gavgavim: Mɨghsɨar orazir Godɨn Dɨpenim aperaghav itim, an danganiba bar anevɨnigha itir danganiba, da bar moghɨra zuegh na baghvɨra ikiam. Guizbangɨra, kar Godɨn Dɨpenimɨn Akar Gavgavim.”

1 Pita 2:9

Ezɨ God ia mɨsevegha gɨvazɨma ia an adarazir otifi. Egha ia atrivimɨn ofa gamir gumazamizibar mɨn otifi. Ia bar guizbangɨra Godɨn gumazamizibara, egha God baghavɨra iti. Egh ia Godɨn gumazamizibar ikɨva, an arazir aghuir a ia gamizibar gun mɨkɨmasa, ia mɨsefe. Ia faragha mɨtarmemɨn ikezɨ, a ian diagha uan angazangarir aghuimɨn ia atɨ.

Efesus 1:4

Dughiar God tɨghar nguazir kamɨn ingaramim, a kamaghɨn ifonge, e a baghvɨra itir gumazamizibar ikɨva, an damazimɨn arazir kuratam ikian kogham, egha a fomɨra e ginaba. Egha ghaze, e Krais ko poroghɨv ikɨ, egh tuavir kamɨn e an gumazamizibar mɨn otogham. A fomɨra bar e gifongegha e ginabagha ghaze, a Krais Iesusɨn ingangarimɨn tuavimɨn e damightɨ, e an boribar otivigham. God uan bar akongezir arazim ko uan ifongiamɨn gɨn ghua bizir kam gami.

Aposel 13:48

Ezɨ Kantrin Igharazibar Gumazamiziba, me akar kam baregha, bar akuegha ghaze, akar kam bar dera. Ezɨ gumazamizir God ikɨrɨmɨrir aghuir zurara ikiam bagha mɨseveziba, me bar nɨghnɨzir gavgavim an iti.

Esekiel 13:9

Ia akam inigha izir gumazir ifavariba irebamɨn mɨn garir bizibar gara akar ifavaribagh amua, egha gɨn otivamin biziba deraghavɨra gumazamizibagh eghari puvatɨ. Kamaghɨn amizɨ, kɨ pazɨvɨra ia damigham. Nan gumazamiziba uari akuvagh ikɨtɨ, ia men tongɨn ikeghan kogham. Eghtɨ ian ziaba uaghan Israelɨn ikɨzimɨn osirizir ziabar aven ikian kogham. Eghtɨ ia ua Israelɨn nguazimɨn izeghan kogham. Egh ia kamaghɨn fogh suam, kɨrara kɨ Ikiavɨra Itir Godɨn Ekiam.

Aisaia 1:27

Ikiavɨra Itir God, kotiamɨn aven uan guizɨn arazimɨn gɨn mangɨ Jerusalemɨn araziba bar deravɨram da tuisɨgh, egh gɨn uam a iniam. Arazir aghuir kamra, a ua Jerusalemɨn gumazamiziba iniam. Kar gumazamizir navibagh iragha uan arazir kuraba ataghiziba.

Akɨnafarir Pol Romɨn Nguibar Ekiamɨn Itir Sios Bagha Osirizim 11:4

Ezɨ God manmaghɨn an akam ikara? A ghaze, “Kɨ ua bagha Israelian tongɨn itir gumazir 7,000ɨn varazira amɨsevezɨ, me Israelɨn ikiavɨra iti. Me asem Baal bagha teviba apɨrizir puvatɨ.”

Onger Akaba 87:6

Ikiavɨra Itir God, uabɨ Kantrin Igharazibar Gumazamizibar ziaba osirigh, men ziaba isɨ Jerusalemɨn gumazamizibar ziaba sara me akuvagham. (Ighiam gamua an suiam atugha avughsegha ua ighiam gami.)

Aisaia 28:5

Eghtɨ dughiar kamɨn, gumazamizir ikiavɨra itir vabara, me Ikiavɨra Itir Godɨn Gavgaviba Bar Itim bagh bar akuegham. A uabɨ atrivimɨn dapanir asuar aghuimɨn mɨn ikiam, egh mati akɨmarir bɨzim me uan dapanibagh aghui.

Aisaia 35:8

Eghtɨ tuavir ekiam kagh ikɨtɨ, me kamaghɨn a dɨpon suam, kar “God Ua Baghavɨra Inabazir Tuavim.” Eghtɨ Godɨn damazimɨn arazir kurabagh amir gumazitam an daruan kogham, kar Godɨn gumazamizibar tuavimra. Eghtɨ gumazamizir nɨghnɨzir aghuiba itiba ko gumazamizir nɨghnɨzir aghuiba oteveziba, me an atam akuighan kogham, me a gɨfogh an mangam.

Aisaia 46:3

“Ia Israelɨn ikiavɨra itir varazira ia oragh, ia Jekopɨn anabamɨn adarasi, ian amebaba ia batezir dughiamɨn, ian gumazamizir ikɨzir igiamɨn otivizir dughiamɨn ikegha iza datɨrɨghɨn, kɨ ia inigha ia atera, bar deravɨra ian gari.

Aisaia 62:12

Me gumazamizir kaba kamaghɨn me dɨponam, ‘God Baghavɨra Itir Gumazamiziba’ ko, ‘Ikiavɨra Itir God, ua Inizir Gumazamiziba.’ Egh me kamaghɨn ian nguibam dɨponam, ‘Nguibar God Bar Ifongezim’ ko, ‘Nguibar Ekiar God ua Izegha Itim.’ ”

Joel 3:17

A kamaghɨn mɨgei, “Dughiar kamɨn ia Israelia fogham, kɨrara kɨ Ikiavɨra Itir God, ian God. Saion, nan mɨghsɨamra, kɨ danganir kamɨn iti. Kɨ Jerusalem damightɨ, a nan nguibar ekiamra ikiam, eghtɨ azenan itir darazi uam an aven mangan kogham.

Obadia 1:17

Egha Ikiavɨra Itir God ua kamaghɨn mɨgɨa ghaze: “Gumazamizir Saionɨn Mɨghsɨamɨn itiba, me ikuvighan kogham, eghtɨ Saionɨn Mɨghsɨam Nan Nguibamɨn mɨn zuegh ikiam. Eghtɨ Jekopɨn ovavir boriba, kɨ me ganɨngizir nguazir kam, me uam a iniam.

Malakai 3:16

Ezɨ gɨn gumazamizir Ikiavɨra Itir Godɨn atiatiava an apengan itiba uarira uariv gei, ezɨ Ikiavɨra Itir God men mɨgɨrɨgɨam barasi. Egha Ikiavɨra Itir God mɨkemezɨ, enselba an Nguibamɨn ikia akɨnafarir rɨghizir mam isa Godɨn damazimɨn an gumazamizir kabar ziaba osiri. Kar gumazamizir Ikiavɨra Itir Godɨn atiatiava an apengan ikiava, zurazurara an ziam feba. Akɨnafarir rɨghizir kam, kar otivizir biziba gɨn dagh nɨghnɨghamin akɨnafarim.

Aisaia 6:13

Eghtɨ gumazamizir vaghvazir taba nguazir kamɨn ikɨvɨra ikɨ, me uaghan gevegham. Eghtɨ kantrin gumazamiziba bar kuavaremegham, eghtɨ gɨn nan gumazamizir bɨzir igiam otivigham, mati temem me an okegha a gaborozɨ a isigha gɨvazɨ, ghuzir igiaba an otoghav aghui.”

Sekaraia 14:2

Eghtɨ Ikiavɨra Itir God uabɨ kantrin igharazibar mɨdorozir gumaziba bar da inightɨ, me izɨ Jerusalem mɨsogham. Me Jerusalemia abɨnigh bizir dɨpenimɨn itiba bar ada inigham. Egh arazir otuaribar amizibar amuam. Egh gumazamizir kabar nar mam inigh mangɨtɨ, me kantrin igharazibar kalabusɨn ikiam. Eghtɨ men akuar mam Jerusalem ateghan kogham, me an ikɨvɨra ikiam.