Aisaia 32:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² Gumazamiziba akurvazim bagh izɨtɨ, gumazir dapanir kaba deravɨra vaghvagh bar deravɨra men akurvagham. Gumazir dapanir kaba, gumazamizibar danganir mogomemɨn mɨn ikiam, eghtɨ dughiar amozir ekiaba ko amɨnir ekiaba izɨtɨ, me mangɨ men uari mongam. Eghtɨ me mati dɨpaba puvatɨzir danganimɨn, dɨpam ivemara an zui moghɨn ikɨ, egh mati dagɨar ekiam aruem apazagha, danganir orangtɨzimɨn mɨn iti. Aruem bar gavgavightɨ, gumazamiziba mangɨ an apazangɨn dapiagh ikɨ avughsam.

Aisaia 32:2 ပူးပေါင်းရင်းမြစ်များ

Aisaia 25:4

Gumazamizir biziba puvatɨziba, nɨ deravɨra me geghuva men gari. Gumazamizir onganarazibagh amiba, osɨmtɨzibar dughiamɨn itima, nɨ men mogomer danganir bar gavgavimɨn mɨn iti. Atrivir kurabar adariba ko anɨngaghariba, mati amɨnir gavgavim iza dɨpenir bɨrim ginifi. Ezɨ nɨ mati averpenim me avarazɨ, amɨnir gavgavim izɨva me gɨnobaghan kogham. Ezɨ gumazir kurabar adariba, mati aruemɨn fefem dɨpaba puvatɨzir danganimɨn ikegha pamtem me gisira. Ezɨ nɨ mati, me tememɨn dughuazimɨn apengan ikia, aruemɨn fefemɨn uari apasi. Ezɨ amɨnim ko amozimɨn dughiamɨn, nɨ biziba puvatɨzir gumazamiziba avarazɨ me deravɨra iti, ezɨ aruer gavgavim me gapongezir puvatɨ, mati overiamɨn ghuariaba aruemɨn fefeim avarazɨ, nguibam bar orangi. Nɨ ifaghatir apanibar akaba dukumizɨ, atrivir kurabar dɨmdiaba pura gefi.

Aisaia 44:3

Kɨ mati gumazim dɨpam isɨ nguazir dɨpaba puvatɨzibagh ingɨva, egh dɨpam damightɨ, a nguazir mɨdiaribar ivemaram. Kamaghɨra, kɨ uan Duam isɨ ian boribagh ingɨva, ian ovavir boriba deragh me damuam.

Aisaia 9:6

Bar guizbangɨra, otarir mam amebam e bagha a bate, a borir God e ganɨngizir mam. Eghtɨ an e gativagh en ganamin arazir kam, mati gumazim dɨpenir akɨnir dafam uan dɨpɨzim gatɨgha aneteri. Kar an ziaba, Gumazir Nɨghnɨzir Bar Aghuiba Anɨdim, ko Godɨn Gavgaviba Bar Itim, ko Afeziar Zurara Ikiavɨra Itim, ko Atrivir Dabirabir Aghuim ko Navir Amɨrizim Anɨdim.

Sekaraia 13:7

Ezɨ Ikiavɨra Itir Godɨn Gavgavim Bar Itim kamaghɨn mɨgei, “O nan mɨdorozir sabam, dɨkavigh na bagh uan namakam, a sipsipbar garir gumazim, a mɨsueghtɨma, sipsipba tintinimɨn aregham. Kamaghɨra, mati gumazim sipsipɨn nguzibav sosi moghɨn, kɨ uan gumazamizibav sogham.

Aisaia 43:20

Nan gumazamizir kɨ ua bagha mɨseveziba, me dɨpabar amɨ, kɨ dɨpam damightɨ, a danganir mɨsɨngizimɨn otoghtɨ, bizir kam bangɨn asɨzir atiaba, ko afiar atiaba, ko poneba ziar ekiam na danɨngam.

Aisaia 41:18

Kɨ fanebar amutɨ, dɨpaba mɨghsɨar temeba aghuir puvatɨzibar otiv afor dar izighiram. Egh kɨ dɨpar emɨmɨribar amutɨ, da danganir zaribar otiv monmoniba anangam. Egh kɨ dɨpar akarebar amutɨ, da danganir dakɨrtɨzibar otivam. Egh kɨ dɨpaba puvatɨzir daghuribar amutɨ, dɨpaba dar otiv dagh izɨvam.

Aisaia 7:14

Kamaghɨn, Ekiam uabɨ ababanir tam nɨn akagham. Ababanir kam kamakɨn. Amizir gumazitam ko akuizir puvatɨzim navim asegh, otaritam bategham. Eghtɨ me ziar kam Emanuel a darɨgham.”

Onger Akaba 143:9

O Ikiavɨra Itir God, nɨ nan akurvaghasa kɨ nɨ bagha zui, nɨ na modogh. Nɨ nan apanibar dafaribar uam na inigh.

Akar Mogomem 22:1

Ezɨ ensel faner mam nan aka, faner kamɨn dɨpam ikɨrɨmɨrir zurara itim anɨdima, an angazangarim glasɨn mɨn taghtasi. Faner dɨpar kam God ko Sipsipɨn Nguzimɨn atrivir dabirabimɨn apengan ikegha ivemara ghua,

1 Timoti 3:16

E guizbangɨra fo, Godɨn Arazibar akar mogomem, a bar bizir ekiam. Ezɨ akar God en akazir kam, a kamakɨn: A guizɨn gumazimɨn oto, ezɨ gumazamiziba an gani. Ezɨ Godɨn Duam kamaghɨn en aka, an araziba bar dera, Ezɨ enselba an gani. Ezɨ gumaziba ghua an akamɨn gun bar gumazibav kɨri. Ezɨ nguazimɨn itir gumazamiziba nɨghnɨzir gavgavim an iti. Ezɨ God a inigha uan Nguibamɨn ghuavanabozɨ a ziar ekiam ini.

Jon Osirizir Akar Aghuim 7:37

Ezɨ isar ekiamɨn dughiar abuananam, a dughiar bar ekiam. Ezɨ dughiar kamɨn Iesus tugha egha pamten diagha kamaghɨn mɨgei, “Gumazitam o amizitam kuarim an pɨrtɨ, a na bagh izɨ egh dɨpam amam.

Aisaia 28:17

Kɨ Godɨn guizɨn arazim damightɨ, a mati gumazir mam bizimɨn ruarimɨn ababanim tuisɨghsɨ, benim amɨkɨrɨvagh bizimɨn ruarimɨn dɨbobonim gɨfogham, egh men araziba tuisɨgham. Eghtɨ arazir aghuim, mati gumazir mam bizibar osɨmtɨziba gan dagh foghsɨ, a skelɨn mɨn otogh ian akaba tuisɨgham. Ia ti ghaze, ian arazir ifavariba ian akuraghtɨ, ia deravɨra ikiam. Ezɨ puvatɨ. Kɨ bar dughiar kuram damightɨ a ia batogham. Egha ia, mati aperiar dafam otogha gumazamizibagh asɨghasɨghizɨ moghɨn, ia bar ikuvigh mangɨ mongamin danganiba puvatɨgham.

Onger Akaba 63:1

O God, nɨ nan God, kɨ nɨn ganasa nɨ baghavɨra mɨzua iti. Kɨ mati, dɨpaba puvatɨzir danganimɨn ikia dɨpam bagha ariaghiri moghɨn, nan duam nɨ ko ikiasa ifongezɨ, kɨ bar uabɨ isa nɨ ganɨngi.

Onger Akaba 32:7

Nɨrara nan mogomer danganim, kɨ nɨn aven modima osɨmtɨziba na abɨrir puvatɨ. Kɨ osɨmtɨzibar aven itima, nɨ na ekɨarugha nan akurvasi. Kamaghɨn kɨ pamten dia ighiabagh amua nɨn ziam fe. (Ighiam gamua an suiam atugha avughsegha ua ighiam gami.)

Onger Akaba 91:1

Gumazim, Godɨn Bar Pɨn Itim, deragh an gansɨ an a bagh mangɨtɨ, God deragh an ganam. A Godɨn Gavgaviba Bar Itimɨn boroghɨn ikɨtɨ, God dughuazimɨn mɨn anevaragham.

Aisaia 12:2

“Ia oragh! God nan akuragha ua na ini. Eghtɨ kɨ nɨghnɨzir gavgavim an ikɨva atiatingan kogham. Ikiavɨra Itir God, a Godra, a na gamima, kɨ gavgavigha iti. Guizbangɨra, a nan Akurvazir Gumazim, ezɨ kɨ an ziam fava onger akam gami.”

Aisaia 16:3

Ezɨ, e kamaghsua, ia en akaba tuisɨghɨva, kotɨn aven guizɨn arazimɨn gɨn mangɨ en akuragh. E kamaghɨn ifonge, ia en danganir mogomemɨn mɨn otogh. E mati gumaziba temer ekiamɨn apengan mangɨ aruer dafamɨn mɨzazimɨn uari muegh, an orangtɨzimɨn ikiam moghɨn, e izɨ ian kantri uari mongam. En apaniba en nguibabar en agɨrazɨma, e datɨrɨghɨn pura guighav iti. Kamaghɨn, ia ua e isɨ, apanibar agharim datɨghtɨ, me izɨ pazɨ e damuan markɨ.

Aisaia 43:19

Ia gan! Kɨ bizir igiam damuasava ami. Ezɨ bizir kam a datɨrɨghɨn otifi, ezɨ ia ti an ganiz, o puvatɨ? Kɨ danganir mɨsɨngizibar tuavibar ingarɨva, egh kɨ dɨpabar amutɨ, da gumazamiziba puvatɨzir danganir kamɨn ivemaram.

Jeremaia 33:14

Egha Ikiavɨra Itir God ghaze: Dughiar kɨ mɨsevezim izɨtɨ, kɨ faragha Israelia ko Judaba, me ko dɨkɨrɨzir akam, a guizbangɨram otivam.