Aisaia 3:5 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁵ Egh gumazamiziba uarigh afighafighsɨ, igharaz darazi dɨkabɨnam. Namakaba uaghan uari dɨkabɨnam. Eghtɨ gumazamizir igiaba, me uan gumazamizir ghuribar akaba munasɨ, me batogham. Eghtɨ gumazamizir nɨghnɨzir kuraba itiba, me gumazamizir nɨghnɨzir aghuiba itibar akaba batogham.

Aisaia 3:5 ပူးပေါင်းရင်းမြစ်များ

Malakai 3:5

Egha Ikiavɨra Itir Godɨn Gavgaviba Bar Itim ghaze, “Kɨ izɨ ian araziba tuisɨgham. Kɨ bar zuamɨra kotɨn aven gumazamizir kabar arazir kurabar gun me mɨkɨmam. Gumazamizir kabar kara: imezibagh amir gumazamiziba ko, kukunir gumaziba ko, gumazamizir poroghamibagh asɨghasɨziba ko, gumazamizir kotɨn akabagh ifariba ko, gumazir dapanir deragha uan ingangarir gumaziba ivezir puvatɨziba ko, gumazir amizir odiaribagh ifara pura men biziba isiba ko, gumazamizir afeziaba ariaghirezir boribar biziba isiba ko, gumazamizir Kantrin Igharazibar Gumazamizir men tongɨn itibar akurvazir puvatɨziba. Gumazamizir arazir kaba bar dagh amiba me nan apengan itir puvatɨ.”

Jems 5:4

Ia deravɨra oragh, ingangarir gumazamiziba ian azenibar dagheba isi, ezɨ ia me gifaragha men ivezir mabar anogoroke. Ezɨ ingangarir gumazamizir kaba me uan ivezibagh nɨghnɨgha, Godɨn dɨa ghaze, a ian arazir kuraba ikarvagham. Ezɨ ingangarir gumazamizibar dɨmdiam, Ekiar Gavgaviba Bar Itim, a baraki.

Jems 2:6

Ezɨ ia akar aghumsɨziba onganarazibagh anɨdi. Ia nɨghnɨgh! Tina ia dɨkabɨra egha osɨmtɨziba ia garɨsi, egha ia mɨkɨrvagha kotiabar zui? Kar gumazamizir dagɨaba bar izɨvaziba arazir kabagh ami.

Luk Osirizir Akar Aghuim 22:64

Egha me inir avɨzimɨn an damazimning ikegha kamaghɨn a mɨgei, “Godɨn akam inigha izir gumazim, nɨ e mɨkɨm! Tina nɨ mɨsoke?”

Mak Osirizir Akar Aghuim 14:65

Egha marazi a gipari. Egha me an damaziba avaragha, uan agharibar a mɨsogha kamaghɨn mɨgei, “Nɨ mɨkɨm. Tinara nɨ mɨsosi?” Ezɨ ganganir gumaziba a inigha a mɨsoghavɨra iti.

Matyu 26:67

Egha me Iesusɨn guam giparava a mɨsogha, marazi dafariba onegha a mɨsosi.

Maika 3:11

Ezɨ Jerusalemɨn gumazir dapaniba kotɨn dughiamɨn, gumazamizibar amamangatɨzɨ, me modogha dagɨaba me givezegha me gakaghorima, me paza kotiaba tuisɨsi. Ezɨ ofa gamir gumaziba, gumazibar amamangatɨghtɨ me dagɨaba me danɨngtɨ, me Godɨn Akar Gavgavibar mɨngariba abɨgh me mɨkɨmam. Ezɨ akam inigha izir gumaziba uaghan ghaze, me dagɨaba inighɨva, akar mogomebar mɨngariba deragh da abɨgham. Jerusalemɨn gumazir ekiar kaba bar, me kamaghɨn amua ghaze, “Ikiavɨra Itir God e ko iti. Ezɨ bizitam e gasɨghasighan kogham.”

Amos 4:1

Ia Samarian amiziba, ia akar kam baragh: Ia mati bulmakaun aghuibar mɨn grazir avɨrim apava ian mɨkarziba bar dera. Gumazamizir gavgaviba puvatɨziba, ia bar pazavɨra me gami. Egha ia osɨmtɨziba isa onganarazibagh amir gumazamizibagh anɨga, tong men apangkuvir puvatɨ. Egha ia uaghan uan pabar dia uari bagh wainɨn dɨpaba inigh izasa me mɨgɨa ghaze, “Ia wainɨn dɨpar avɨriba inigh izɨtɨ, e dar amɨ onganam.”

Esekiel 22:12

Ezɨ ian gumazamizir maba, iveziba isa ghua igharaz daraziv suagharɨsi. Ezɨ marasi, uan namakabar dagɨaba pura da inigha ua da ikarvaghsɨ an dagɨar an anɨngizim gisɨn ua dagɨaba ini. Ezɨ marasi, uan namakar gumazibagh ifara me gami me atiatima, me me da dagɨaba isa bizir avɨriba iti. Ia bar na gɨn amadagha na gɨnɨghnɨzir puvatɨ. Kɨ Ikiavɨra Itir Godɨn Ekiam, kɨ kamaghɨn mɨkeme.

Jeremaia 22:17

Ezɨ nɨ uabɨra uabɨ gɨnɨghnɨgha, egha zurara bizir igharagha gariba iniasa puv a dagh ifuegha, ifavarir arazim gamuava bizir kaba isi. Egha nɨ pura gumazir arazir kurabagh amir puvatɨzibav sozi me ariaghiri. Egha nɨ gumazamiziba dɨkabɨra paza me gami.”

Aisaia 11:13

Eghtɨ gɨn kantri Israel ua navir kuram kantri Judan ikian kogham. Eghtɨ kantri Juda, uam kantri Israelɨn anɨngagheghan kogham. Puvatɨ. Aning uaning inigh deraghvɨra dapiam.

Aisaia 1:4

Iavzika! Ia gumazamizir bar kuraba, ian araziba uaghan ikufi. Ia zurara arazir kurabagh amuavɨra itima, ian arazir kuram ia gekua ghuaghiri. Ia Israelia, ia uan Ikiavɨra Itir God ategha gɨfa. Guizbangɨra, ia akɨrim ragha Israelian Godɨn Bar Zuezim gasara.

2 Atriviba 2:23

Ezɨ gɨn Elisa Jeriko ategha Betelɨn ghu. Ezɨ nguibamɨn otarir igiar maba nguibamɨn azenan iza an gani, egha me kamaghɨn Elisa dɨpova ghaze, “O gumazir onarim mɨsezim, nɨ kamatɨgh! Gumazir onarim mɨsezim, nɨ danganir kam gitagh.”

Ofa Gami 19:32

“Ia gumazamizir ghuribar apengan ikɨ, egh deraghvɨra me damu. Egh ia nan atiating nan apengan ikɨ. Kɨ Ikiavɨra Itir God, ian God, kɨ kamaghɨn mɨkeme.

Aisaia 9:18

Gumazamizibar arazir kurabara me gasɨghasɨsi. Mati avim benir ataghatariba ko ogher kurabar isia ghua, temer dafaribagh irɨgha ghua, ruarir ekiam girɨzɨ a isi. Ezɨ maburan mɨgharim dɨkavigha ghuavanadi.

Aisaia 19:2

Egha Ikiavɨra Itir God kamaghɨn mɨgei, “Kɨ Isipian navibagh inivtɨ, me uarira uariv sogham. Aveghbuaba uarira uariv soghtɨma, namakaba uarira uariv sogham. Isipian nguibar ekiaba uarira uariv soghtɨma, provinsba uaghan uarira uariv sogham.

Maika 7:2

Gumazir aghuitam nan kantrin aven itir puvatɨ. Gumazitam guizbangɨra Godɨn gɨn zuir puvatɨ. Bar puvatɨ. Dughiabar zurara gumazamiziba uarira uarir apanibagh amua uarigh asɨghasɨghasa uari bagha tuaviba buri, mati gumazim asɨzibav soghasa, azuazim agura.

Sekaraia 11:6

Ikiavɨra Itir God kamaghɨn mɨgei, “Kɨ nguazimɨn gumazamizibar apangkuvighan kogham. Kɨ uabɨ vaghvagh me isɨ men atriviba ko, men adarazir agharibar arɨgham. Eghtɨ me pazavɨra me damuam, mati sipsipɨn ghuaviba uari pazavɨra me gami. Atriviba ko, men adarazi pazavɨra me damutɨ, kɨ men akuraghan kogham.”