Aisaia 3:14 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁴ Egha Ikiavɨra Itir God uan gumazamizibar gumazir dapaniba ko gumazir aruaba ko kotiam gamua kamaghɨn me mɨgei, “Nan gumazamiziba mati, nan wainɨn azenim, ezɨ iarara azenir kam gasɨghasigha, an itir biziba bar da okeme. Ia gumazamizir biziba otevezibar apangkuvir puvatɨ. Bar puvatɨ. Men bizir muziariba, ia me da da isava uan dɨpenibar da pozibav kɨri.

Aisaia 3:14 ပူးပေါင်းရင်းမြစ်များ

Jopɨn Akɨnafarim 22:4

Egh nɨ Godɨn apengan ikɨva an ziam fɨtɨ, a nɨn atarɨva, nɨ isɨ kotiam darɨgham, o? Bar puvatɨ.

Jems 2:6

Ezɨ ia akar aghumsɨziba onganarazibagh anɨdi. Ia nɨghnɨgh! Tina ia dɨkabɨra egha osɨmtɨziba ia garɨsi, egha ia mɨkɨrvagha kotiabar zui? Kar gumazamizir dagɨaba bar izɨvaziba arazir kabagh ami.

Amos 4:1

Ia Samarian amiziba, ia akar kam baragh: Ia mati bulmakaun aghuibar mɨn grazir avɨrim apava ian mɨkarziba bar dera. Gumazamizir gavgaviba puvatɨziba, ia bar pazavɨra me gami. Egha ia osɨmtɨziba isa onganarazibagh amir gumazamizibagh anɨga, tong men apangkuvir puvatɨ. Egha ia uaghan uan pabar dia uari bagh wainɨn dɨpaba inigh izasa me mɨgɨa ghaze, “Ia wainɨn dɨpar avɨriba inigh izɨtɨ, e dar amɨ onganam.”

Jeremaia 5:27

Me ifavarir arazibagh amua gumazir igharazibar bizir avɨriba puram ada isi. Mati gumazim ivem aguragha kuarazir avɨriba inizɨ an akɨram izɨfa. Egha arazir kamɨn me gavgavigha ikia, dagheba ko bizir avɨriba iti.

Aisaia 5:7

Ikiavɨra Itir Godɨn Gavgaviba Bar Itimɨn wainɨn azenim, a Israelian gumazamiziba. Bar guizbangɨra, Judan gumazamiziba, an oparizir wainɨn agharir aghuir a bar ifongeziba. Me guizɨn arazir aghuibara damu ikiasa a ifonge, ezɨ puvatɨ. Me gumazibav sozi me ariaghiri. Me arazir aghuibar igharaz darazir amuasa a ifonge, ezɨ puvatɨ. Ararer kuram men danganibar otiva ghuavɨra iti.

Onger Akaba 143:2

Gumazitam bar zuegha nɨn damazimɨn itir puvatɨ. Kamaghɨn, nɨ uan ingangarir gumazim isi kotiam datɨgh a tuisɨghan markɨ.

Onger Akaba 14:4

Ikiavɨra Itir God kamaghɨn mɨgɨa ghaze, “Gumazamizir arazir kuram gamiba, nɨghnɨzir aghuitam men itir puvatɨ. Me bret apa anegevi moghɨn, me nan gumazamiziba agefi. Egha me tong na ko mɨgeir puvatɨ.”

Jopɨn Akɨnafarim 24:9

“Gumazir kurar kaba ghua, amizir paba ovengezibar, borir iririvir oteba apiba, me me da dagh etui. Me amizir kabar amamangarɨzima, me pura dagɨaba isi. Dughiar kamra, me ua me ikarvaghamin ababanimɨn mɨn, men borir kabar suirazɨ me iti. Egha gɨn borir kabagh amima, me pura men ingangarir gumazir kɨnibar otifi.

Matyu 21:33

Egha Iesus gumazir dapaniba ua kamaghɨn me mɨgei, “Ia akar isɨn zuir igharazir kam baragh. Gumazir mam wainɨn azenimɨn ingarigha, an dɨvazim aghui. Egha wainɨn ovɨziba mɨrmɨramin itarim gɨkuigha azenir dɨpenimɨn ingari, eghtɨ ingangarir gumaziba an ikɨ azenimɨn ganam. Egha azenir kam isa gumazir mabar agharim gatɨgha ghaze, me gɨn wainɨn dɨpataba uam a ikaragham. Egha dɨkavigha nguibar saghon itimɨn ghu.

Maika 6:10

Ia gumazir arazir kurabagh amiba, ia bizir aghuiba uan dɨpenibar aven da mongezɨ da ikiavɨra iti, ezɨ bizir ia itir kaba, kar ia arazir kuram gamua inizir biziba. Ia uan biziba gumazir igharaziba bagha da amadir dughiam, ia ifara deragha dar osɨmtɨziba tuisɨgha dar ivezibar abarir puvatɨ. Kɨ arazir kurar kam bar an aghua.

Maika 2:2

Ia gumazamizibar azenibar gara dagh ifuegha purama da isi darasi. Egha ia men dɨpenibar gara dagh aguava pura da isi. Ia ifavaribagh amuva, gumazamizibar nguaziba ko, biziba ko, dɨpenibar okei darasi.

Jopɨn Akɨnafarim 34:23

God en arazir kurabagh fogha gɨfa, kamaghɨn amizɨ, a da tuisɨghamin dughiatam amɨsɨvan markɨ.

Jopɨn Akɨnafarim 24:14

Bar mɨzaraghara, amɨnim tɨghar tiam, gumazir kuraba dɨkavigh mangɨ biziba puvatɨzir gumazamizibav soghtɨ me arɨmɨghirasa zui. Egha dɨmagaribar me biziba okɨmasava arui.

Onger Akaba 10:9

A laionɨn mɨn uan torimɨn modogha gara iti. A modogh ikɨ egh gumazir onganarazibagh amibar suighasa. A uan iver ekiamɨn men pɨgha men suigha me amɨkɨrvagha zui.

Aghuzir Akaba 30:14

Ezɨ gumazamizir maba bar pazavɨra onganarazibagh amir gumazamizibagh ami. Men atariba mati sababa ko afuaba men akabagh izɨvazɨma, me onganarazibagh amir gumazamizibagh amua bar me agɨvasa.

Aisaia 10:1

Iavzika! Ia gumazamizir kamagh amiba, ia bar ikuvigham. Ia gumazir onganarazibagh amibagh ifar men biziba iniasa arazir igiar igharagha garir avɨriba arigha, da osirigha me gasɨghasɨsi. Ia arazir kurar kaba arigha dar gɨn zuima, nan gumazamizir onganaraziba kotɨn aven, uan biziba bagha mɨkɨmasa izima, ia guizɨn araziba ategha arazir kurar ia arɨzir kabar, me dɨkabɨrima, me bizir me iniamba isir puvatɨ. Egha arazir kamra, ia amizir paba oveaghuezibar biziba okɨava, borir ameboghfeziaba oveaghuezibar biziba saram okei.

Aisaia 11:4

A kotɨn aven guizɨn arazir aghuimɨn gɨn mangɨ, onganarazibar mɨgɨrɨgɨaba baragh, deraghvɨra me tuisɨgham. A nguazir kamɨn itir gumazir uari abɨra aghumra itiba, a men osɨmtɨziba baragh, me tuisɨgh men akurvagham. An akam me danɨngtɨ, nguazir kamɨn gumazir kuraba, ivezir kuram iniam. A mɨkɨmtɨ, gumazir kurar akaba batoziba arɨmɨghiram.

Aisaia 14:30

Gumazamizir onganarazibagh amiba, me deravɨra ikiam. Gumazamizir biziba puvatɨziba, me navir amɨrizim iniam. Eghtɨ ia Filistiaba, kɨ mɨtɨriba azir dughiar bar ruarim amadaghtɨ, a izam. Eghtɨ mɨtiriar azir kam, ian ikiavɨra itir varazira damutɨ, me bar mɨtiriam bangɨn arɨghirɨ bar gevegham.

Aisaia 26:6

Nguibar nguazim girezir kaba, gumazir onganaraziba ko gumazamizir gavgaviba puvatɨziba, datɨrɨghɨn iza uan suebar me dɨkabɨra me gisɨn arui.

Aisaia 29:19

Eghtɨ gumazamizir uari abɨriba, me Ikiavɨra Itir God bagh bar akuegham. Eghtɨ gumazamizir biziba puvatɨziba, me uaghan Israelian Godɨn Bar Zuezim bagh bar akuegham.

Aisaia 30:12

Ezɨ Israelian Godɨn Bar Zuezim, a kamaghɨn mɨgei, “Ia nan Akar Gavgavim munasava akɨrim ragha na gasara. Egha ia kamaghɨn nɨghnɨzir gavgavim ikia ghaze, Ifavarir arazim ko igharaz darazi dɨkabɨrir araziba ian akuragham.

Aisaia 58:4

Ia oragh! Ia ti ghaze, ia dagheba tagh na ko mɨkɨmam. Ezɨ ian araziba guizbangɨra bar igharagha ghu. Ia atara mɨsogha, dafariba apɨra gumazir igharaziba me mɨsoghavɨra iti. Egh ia dagheba ataghɨraghamin dughiamɨn arazir kurar kabar amutɨ, kɨ bar ian dɨmdɨatam bareghan kogham.

Esekiel 18:12

Egha a gumazamizir onganaraziba abɨra arazir kurabar me gami. Egha gumazir igharazibar biziba okei. Eghtɨ namakatam an dagɨar a iniziba ikarvaghsɨ izɨtɨ, gumazir kurar kam ua namakamɨn ababanir bizim a danighan kogham, a pura ua bagha a ini. Egha marvir guabar ziaba fe. Egha arazir kurar kɨ aghuazir igharazibagh ami.

Esekiel 20:35

Kɨ ia inighɨva, Kantrin Igharazibar Gumazamiziba Puvatɨzir Danganimɨn mangɨghɨva, egh kɨ munagh ikɨva ian damazibar ian arazir kuraba bagh ia tuisɨgham.

Esekiel 20:36

Kɨ arazir kamra, ian inazir afeziaba Isipɨn kantrin boroghɨn gumazamiziba puvatɨzir danganimɨn itir dughiamɨn, kɨ men arazir kuraba tuisɨki. Eghtɨ kamaghɨra, kɨ gɨn uaghan ia tuisɨgham. Kɨ Ikiavɨra Itir Godɨn Ekiam, kɨ kamaghɨn mɨkeme.

Maika 3:3

Ian arazir kaba mati ia nan gumazamizibar iniba mɨsa men aghariba apɨragharɨgha dagh asegha, men tuziba aghoraghsua da api. Ia mati, me mɨnem daghuasa asɨzir tuzir agharibar itiba aghoraghsuegha da mɨnem gaghui.

Ofa Gami 25:14

Kamaghɨn, ia nguazim isa gumazir igharazimɨn amadazɨ, o a da nguazim givese, egh ia uarigh ifaran kogham. Ia nɨghnɨgh, azeniba manmaghɨn ikiavɨra iti, eghtɨ bar akongamin azenim otoghtɨ ia ua bizir kaba ikarvagham, egh manmaghɨn dughiabar an oparɨva dagheba iniam. Ia bar deraghvɨra nguazir kamɨn dagheba iniamin azenir ikiavɨra itibar ivezim givesegh.

Ofa Gami 25:17

Ia uari uan namakatam gifaran bar markɨ. Ia uan Godɨn atiating, egh arazir aghuibara damu. Kɨ Ikiavɨra Itir God, kɨ kamaghɨn mɨkeme.”

Jeremaia 12:10

“Kantrin Igharazibar Gumazamizibar gumazir dapanir avɨriba iza, nan wainɨn azenir dirim gasɨghasɨki. Me azenir dirir kam dɨkezɨ, a danganir mɨdiarimɨn mɨn iti. Ezɨ gumazamiziba uam an itir puvatɨ.

Amos 2:7

Me gumazir gavgaviba puvatɨziba dɨkabɨra, onganarazibagh amir gumazamiziba batosi. Egha afeziar maba uan otariba ko me amizir vamɨra ko akua arazir kurabar a gami. Me kamaghɨn amua nan ziar aghuim gasɨghasɨsi.

Maika 2:1

Ia gumazir dɨmagaribar akui puvatɨgha, arazir kurabar amuasa nɨghnɨgha itiba, amɨnim tirazɨ arazir kurar kam damuamin tuavim otozɨ, ia zuamɨrama a gami. Ia kamaghɨn amir gumazamiziba iavzika! Ia bar ikuvigham.