Aisaia 26:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ O Ikiavɨra Itir God, gumazamizir nɨn apengan itiba, me zurara nɨ baghavɨra iti. Kamaghɨn amizɨ, nɨ me gamima, navir amɨrizimɨn arazim me gizɨfa.

Aisaia 26:3 ပူးပေါင်းရင်းမြစ်များ

Filipai 4:7

Eghtɨ kamaghɨn God ia damutɨ ia navir amɨrizimɨn ikiam. Egh ia Krais Iesus ko porogh deragh ikiam, eghtɨ tuavir kamɨn Godɨn navir amɨrizim deravɨra ian naviba ko nɨghnɨzibagh eghuvtɨ da bar deravɨra ikiam. God navir amɨrizir e ganɨngizir kam, a bar bizir aghuim, ezɨ navir amɨrizir kam gumazibar fofozim bar a gafira.

Jon Osirizir Akar Aghuim 16:33

Ia nan poroghɨv ikɨva egh ia navir amɨrizim ikiasa kɨ ifonge. Kamaghsua kɨ akar kam ia mɨkeme. Eghtɨ ia nguazir kamɨn ikɨtɨ, osɨmtɨziba ia bativam. Eghtɨ ian naviba gavgavigh ikɨ! Kɨ nguazir kamɨn gavgavim dɨkabɨragha anegɨfa!”

Jon Osirizir Akar Aghuim 14:27

“Kɨ ia ataghɨraghasa, egha kɨ navir amɨrizim ia ganɨdi. Ezɨ nan navir amɨrizir kɨ ia ganɨdim, a nguazimɨn gumazamiziba anɨdi moghɨn puvatɨ. Kamaghɨn amizɨma, ia nɨghnɨzir avɨribar amuva egh osɨman markɨ, egh atiatingan markɨ.

Onger Akaba 9:10

O Ikiavɨra Itir God, gumazamizir nɨ bagha iziba, nɨ akɨrim giragha me gasir puvatɨ. Kamaghɨn gumazamizir nɨ gɨfoziba, me nɨghnɨzir gavgavim nɨn iti.

Akɨnafarir Pol Romɨn Nguibar Ekiamɨn Itir Sios Bagha Osirizim 5:1

E nɨghnɨzir gavgavim Godɨn itima, tuavir kamɨn God ghaze, e an damazimɨn dera. Kamaghɨn, en Ekiam Krais Iesus an e gamizɨ, e navir vamɨra God ko iti.

Aisaia 31:1

Ia abuir gumaziba, ia kantri Isipɨn ghuava uarir akurvaghasa, men azangsɨsi, iavzika! Ia bar ikuvigham. Ia Isipian hoziaba ko men karisɨn avɨriba ko karisɨn suizir gumazir bar gavgaviba, ia nɨghnɨzir gavgavim dar iti. Ia ti ghaze, Isipia ian akuragham. Egha ia Israelian Godɨn Bar Zuezim, nɨghnɨzir gavgavim an itir puvatɨ. Egha ia uarir akurvaghasa Ikiavɨra Itir Godɨn azangsɨzir puvatɨ. Kamaghɨn amizɨ, ia bar ikuvigham. Iavzika!

Maika 5:5

Eghtɨ a navir amɨrizim ko, dabirabir aghuim isɨ uan gumazamizibar anɨngam. Eghtɨ Asirian mɨdorozir gumaziba izɨ, en nguibar ekiar gavgavibar dɨvaziba akartɨ, e uan mɨdorozir gumazir faragha zuir gavgaviba amɨseveghtɨ, me mangɨ me ko mɨsogham.

2 Eghaghaniba 16:8

Nɨ kamaghɨn fo, Itiopian kantri ko Libian kantrin mɨdorozir gumaziba iza nɨ ko mɨsoke. Me mɨdorozir gumazir bar avɨriba ko mɨdorozir karisɨn bar avɨriba ko mɨdorozir gumazir bar avɨrir hoziabagh apiaghira mɨsoziba iti. Ezɨ dughiar kamɨn, nɨ nɨghnɨzir gavgavim Ikiavɨra Itir Godɨn ikiava, an azarazɨma, a nɨn akura. Ikiavɨra Itir God gavgavim nɨ ganɨngizɨ, nɨ me abɨra.

2 Eghaghaniba 13:18

Dughiar kamɨn, Judaba kamaghɨn fo, Ikiavɨra Itir God, a men inazir afeziabar God, a mɨdorozimɨn men akurvagham. Me nɨghnɨzir gavgavim Godɨn iti, kamaghɨn amizɨ, me Israelia gafiragha bar me abɨra.

1 Eghaghaniba 5:20

Ezɨ mɨdorozimɨn dughiamɨn, Israelia uarir akurvaghasa Godɨn diagha an azai. Ezɨ God men akurazɨ me uan apanir kaba abɨra. Me bar uarir akurvaghasa nɨghnɨzir gavgavir ekiam Godɨn itima, God men akura.

Aisaia 48:2

Egha ia uarira uan ziaba fa ghaze, ia God baghavɨra itir nguibar ekiar kamɨn gumazamiziba. Egha ia Israelian Godɨn akurvazim iniasa a mɨzua iti. An ziam, Ikiavɨra Itir Godɨn Gavgaviba Bar Itim.

Aisaia 50:1

Egha Ikiavɨra Itir God kamaghɨn Israelian gumazamizibav gei: “Jerusalemɨn nguibar ekiam, mati ian amebam. Ia ti ghaze, gumazim uan amuim batuegha bar anemadazɨ a ghuzɨ moghɨn, kɨ akɨrim ragha bar a gasara, a? Egh ia mamaghɨn nɨghnɨghtɨ, akɨnafarir poroghamiba uari ataghɨrazimɨn akam, a managh iti? Egha kɨ uaghan gumazitamɨn bizitam inizir puvatɨgha, uam a ikarazir puvatɨ. Ezɨ ia tizim bagha kamaghɨn nɨghnɨgha ghaze, ia nan boriba, kɨ uan ikarvazim akɨrmɨghsɨ, dagɨaba bagh pura ingangarir gumazir kɨnibar mɨn gumazir igharazibar ingarsɨ, ia amadagham? Kamaghɨn puvatɨ. Ian arazir kurar avɨribara na gamima, kɨ ian anɨngaghegha, akɨrim ragha Jerusalem gasaragha, a isa gumazir igharazibar agharim gatɨ.

Onger Akaba 119:165

Gumazamizir nɨn Arazibagh ifongeziba, me navir amɨrizimɨn ikia bar deraghavɨra iti. Eghtɨ bizitam me damightɨ me asaghporegh ireghan kogham.

Aisaia 12:2

“Ia oragh! God nan akuragha ua na ini. Eghtɨ kɨ nɨghnɨzir gavgavim an ikɨva atiatingan kogham. Ikiavɨra Itir God, a Godra, a na gamima, kɨ gavgavigha iti. Guizbangɨra, a nan Akurvazir Gumazim, ezɨ kɨ an ziam fava onger akam gami.”

Aisaia 26:12

O Ikiavɨra Itir God, nɨ en ingangariba akɨrmigha dagh amizɨ, da deravɨram otifi. Kamaghɨn amizɨ, nɨ dabirabir aghuim ko navir amɨrizim isɨ e danɨngigh.

Aisaia 27:5

Egh apanir kaba, kɨ men gansɨ, me na bagh izɨ na ko deragh ikɨsɨ, me akar dɨkɨrɨzir tam damigham.”

Aisaia 32:18

Ezɨ Ikiavɨra Itir God ghaze, Nan gumazamiziba, me dabirabir aghuim ikiam, egh me deravɨra ikɨ avughsɨ, uan nguibabar aven navir amɨrizimɨn ikɨ, egh bizitamɨn atiatingan kogham.

Aisaia 42:6

“Kɨ Ikiavɨra Itir God, nɨ nan arazir aghuimɨn bizibar amuasa kɨ nɨn dia. Egh nɨn agharimɨn suiragh, deragh nɨ geghuv nɨn ganam. Egh nɨ bangɨn, kɨ Akar Dɨkɨrɨzir Gavgavim nguazir kamɨn gumazamiziba ko a damuam. Egh nɨ damutɨ, nɨ kantribar gumazamiziba, bar men angazangarimɨn mɨn ikiam.

Aisaia 42:19

Ia nan ingangarir gumazamiziba, kɨ ua bagha ia amɨsefe, eghtɨ ia na baghvɨra ikɨ, nan abuir gumazibar mɨn ikɨ nan akam inigh mangam. Egha ia gumazir damazir okavɨrɨziba ko, kuarir onganibar mɨn iti, egha bar damazir ikuviziba ko kuarir onganiba, bar me gafira.

Aisaia 49:8

Egha Ikiavɨra Itir God kamaghɨn uan ingangarir gumazim mɨgei, “Kɨ uabɨ ua nɨ inigh, deragh nɨ damuasa dughiam amɨsefe. Dughiar kɨ ian akurvaghasa atɨzir kam, an otozɨ, kɨ nɨn ararem baregha nɨn akura. Egha kɨ bar deravɨra nɨ geghufi. Egh nɨ bangɨn, kɨ nguazimɨn itir gumazamiziba ko Akar Dɨkɨrɨzir Gavgavim damuam. Egh kɨ Israelɨn nguazim damightɨ, a ua deragh otogham. Eghtɨ Israelian adarazi uamateghtɨ, nɨ me bagh men nguazir datɨrɨghɨn pura itim tuiragh, ua me danɨngtɨ, me a dapiam.

Aisaia 66:12

Egha Ikiavɨra Itir God kamaghɨn mɨgɨa ghaze, “Ia oragh! Kɨ Jerusalemɨn nguibar ekiam damightɨ, a zurara bar deravɨra ikiam. A kantrin igharazibar bizir aghuir avɨriba iniam. Mati faner zurara emɨra ivemara gevir puvatɨzɨ moghɨn, bizitamɨn oteveghan kogham. Ia bizir kaba iniva bar akuegham, mati borim amebamɨn otem apava bar akongezɨ, amebam a ifiragha aruima a bar akonge. Egha amebam a isa uan apozim gatɨgha a gikararaima, a bar akonge.

Daniel 3:17

E guizɨn Godɨn ziam fe. Nɨ mɨkemezɨ moghɨn e damigh, eghtɨ en Godɨn gavgavim itim, an en akuraghtɨ, nɨn gavgavim ko danganir ekiar avir bar pamten isim, e a gitagham. God en akuragham.

Daniel 3:28

Ezɨ atrivim kamaghɨn mɨgei, “E bar Satrak, Mesak, ko Abetnego, men Godɨn ziam fam. God uan ensel amadazɨ a 3plan gumazir an ziam fa egha nɨghnɨzir gavgavim an itibar akura. Me nan akam batuegha ovengan atiatingizir puvatɨ. Egha godɨn igharazitam tevimning apɨrigha an ziam feir puvatɨ. Me uan Godɨn ziamra fe.

Daniel 6:23

Ezɨ atrivim bar akuegha laionbar mozimɨn Daniel gekuigh azenim darɨghasa gumazibav gei. Me mozimɨn a gekuigha azenim gatɨgha gɨvagha, an garima, Daniel guizbangɨra nɨghnɨzir gavgavim Ikiavɨra Itir Godɨn iti, kamaghɨn amizɨ, laionba duatam a gatɨzir puvatɨ.

Onger Akaba 125:1

Gumazamizir nɨghnɨzir gavgavim Ikiavɨra Itir Godɨn itiba, me Saionɨn Mɨghsɨamɨn mɨn iti. Mɨghsɨar kam bar gavgavigha mozoroziba puvatɨ, a ikɨ kamaghɨra ikiam.

Aisaia 32:17

Gumazamiziba arazir aghuim damutɨ, tuavir kamɨn dabirabir aghuim otogham. Eghtɨ gumazamiziba uam atiatingan kogh, nɨmɨra ikɨ nɨghnɨzir gavgavimɨn aven tugh gavgavigh kamaghɨra ikiam.

Aisaia 50:10

Ia Ikiavɨra Itir Godɨn atiatia an apengan ikia, an ingangarir gumazimɨn akabar gɨntɨziba, ia atiatingan markɨ. Ia angazangarim puvatɨgha mɨtarmemɨn arui darasi, ia nɨghnɨzir gavgavim Ikiavɨra Itir Godɨn ikɨva a mɨzuam ikɨ.

Jeremaia 39:18

Kɨ deraghvɨra nɨn akurvagh nɨn ganam, eghtɨ me nɨ mɨsueghtɨ nɨ aremeghan kogham. Nɨ nɨghnɨzir gavgavim nan iti, kamaghɨn nɨ aremeghan kogham. Kɨ Ikiavɨra Itir God, kɨ mɨkemegha gɨfa.”