Aisaia 19:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Kɨ Isipia damightɨ men gavgavim gɨvaghtɨ, me okam nɨghnɨghɨva, bizir me damuasa nɨghnɨziba, me dar amuan kogham. Egh me uan asebar azangtɨ, da ti men akurvagham. Egh me mangɨ, gumazir oveaghuezibar duabar azangsɨgham, me bizir manam damuam. Me imezibagh amir gumaziba ko kukunir gumazibar nɨghnɨzibagh foghsɨ men azangsɨgham.

Aisaia 19:3 ပူးပေါင်းရင်းမြစ်များ

Aisaia 8:19

Eghtɨ gumazamiziba ia mɨkɨmtɨ, ia mangɨ gumazamizir oveaghuezibar duaba ko mɨkɨm, me da nɨghnɨziba iniam. Egha me kuarazibar mɨn imoba, sighsirir akabar mɨgei. Ezɨ gumazamizir oveaghueziba, me nɨghnɨziba gumazamizir angamɨra itibar anɨngan iburagham. Kamaghɨn amizɨ, e tizim bagh aseba ko gumazamizir oveaghueziba da nɨghnɨziba iniasa ivemara me bagha zui? Puvatɨ. Arazir kam ikufi. Me uan God bagh mangɨ.

Daniel 2:2

Kamaghɨn amizɨ, irebar mɨngaribagh fogha dar gun mɨgeir gumaziba ko, kukunir gumaziba ko, imezibagh amir gumaziba ko, akavsiar ifavaribagh amir gumaziba, me bagha akam amada. Eghtɨ me izɨ an irebamɨn mɨngarimɨn gun mɨkɨmam. Egha me iza atrivimɨn guamɨn tuivizɨ,

1 Eghaghaniba 10:13

Sol Ikiavɨra Itir Godɨn akam baraghizir puvatɨ. A Ikiavɨra Itir Godɨn Akar Gavgavim batoke. An oveaghuezibar duabar dia, nɨghnɨzim uabɨ danɨng tuavim uabɨn akakaghasa, dar azai. Kamaghɨn amizɨ, an areme.

Daniel 5:7

Ezɨ a kukunir gumaziba, ko imezibagh amir gumaziba, ko akavsiar ifavaribagh amir gumaziba, tav a bagh me inigh izasa a pamten dei. Me izegha gɨvazɨma, atrivim kamaghɨn me mɨgei, “Gumazitam akar kam dɨponegh an mɨngarimɨn gun na mɨkemeghtɨ, kɨ atrivimɨn korotiar aghevim a danightɨ aneghuam. Egh kɨ golɨn sen an fɨrimɨn daghtɨ, a ziar ekiam iniam. Eghtɨ kɨ a damightɨ a namba 3ɨn gavmanɨn gumazimɨn ikiam.”

Esekiel 22:14

Dughiar kɨ pazavɨra ia damuamin kamɨn, ia uan navir averiabar aven osɨmtɨzir kam aterɨva puvɨra atiatingam. Kɨ Ikiavɨra Itir God, kɨ mɨkemezɨ moghɨn, kɨ damuam.

Esekiel 21:7

Eghtɨ me ti nɨn azaragham, nɨ tizim bagha tiarim akarava arai? Eghtɨ nɨ kamaghɨn me mɨkɨm suam, ia bativamin bizimɨn mɨgɨrɨgɨam izegha gɨfa. Dughiar kurar kam, izɨ otoghtɨ, atiatim ian navibagh izɨvaghtɨ, ian agharapaniba ian amɨraghtɨ ia gavgaviba puvatɨghtɨ, ian sueba inɨghɨva akongam. Ia deraghvɨram oragh, dughiar kuram otivasav ami. Kɨ Ikiavɨra Itir Godɨn Ekiam kamaghɨn mɨkeme.”

Jeremaia 46:15

Manmaghsua Apis, an aser ia bulmakaun apurir ingarizim, an arav ghu, egha tugha gavgavizir puvatɨ? An mɨngarim kamakɨn, Ikiavɨra Itir God uabɨ anekunizɨ a iraghu.

Aisaia 57:16

Kɨ uan gumazamiziba zurara akam me gasɨ men ataran kogham. Kɨ men atar me damutɨ, men ikɨrɨmɨrim ikuvigh bar gɨvagham, men ikɨrɨmɨrir kam, kɨ uabɨ me ganɨngi.

Aisaia 47:12

“Kamaghɨn ti dera, nɨ igiamra ikia imeziba ko akavsiar gavgavibar fofoziba inigha dagh amua fozɨ moghɨn, nɨ pamtem dar amu ganigh. Da ti nɨn akuragham. Da ti nɨn apanibar amutɨ, me atiatigh aregham.

Aisaia 44:25

Bizir gɨn otivamibar gun mɨgeir gumaziba, kɨ me gamizɨ, me okam nɨghnɨgha, men mɨgɨrɨgɨaba paza zui. Ezɨ kukunir gumaziba, kɨ men nɨghnɨzibagh amima, me okam nɨghnɨsi. Ezɨ fofozir gumaziba, kɨ me gamizɨ, me ongani.

Aisaia 19:1

Isipia bar ikuvighasa, Ikiavɨra Itir God akar kam me bagha an anɨngi. “Ia gan! Ikiavɨra Itir God ghuariam gisɨn aperaghav ikia, ivegha akɨgha Isipɨn kantrin izi. A izɨ otoghamin dughiamɨn, Isipian aseba, bar puvɨra nɨghtɨ, Isipian gumazamiziba bar puvɨram atiatingɨva, gavgaviba amɨragh magɨrɨgh bar gɨvagham.”

Aisaia 15:2

Kamaghɨn amizɨ, Dibonɨn nguibar ekiamɨn itir gumazamiziba, mɨghsɨabar ghuavanabogha, asebar ziaba fer danganibar aziava ara iti. Moapia bar fo, Nebon nguibar ekiam ko, Medeban nguibar ekiam bar ikuvizɨma, kamaghɨn me aningɨn apangkuvigha azi. Me bar aning bagha osemegha, uan dapanir arɨziba ko, ghuamasɨzir arɨzibagh ise.

Aisaia 14:27

Ikiavɨra Itir Godɨn Gavgaviba Bar Itim, kamaghɨn damuasa nɨghnigha gɨfa, ezɨ tina an anogoregham? A uan agharim ghufegha gɨfa, eghtɨ tav an agharim medagh magɨran iburagham.

Aghuzir Akaba 21:30

Nɨ nɨghnɨzir aghuim ko fofozir aghuim ko bizibar amuamin fofozim ikɨ, egh nɨ Ikiavɨra Itir Godɨn apanimɨn ikɨtɨ, nɨn fofozir aghuir kam nɨn akuraghan kogham.

Onger Akaba 107:27

Me gumazir dɨpar onganiba amegha onganigha purama aruibar mɨn kurim gisɨn arui, egha kurimɨn akurvaghamin nɨghnɨziba bar puvatɨ.

Onger Akaba 76:12

An atrivir akaba batoziba abɨri. Egha nguazimɨn atrivibagh ami me bar an atiati.

2 Samuel 17:23

Ahitofel garima Apsalom an akabar gɨn zuir puvatɨ, ezɨ a ghua uan donki gaperagha uamategha uan nguibar ekiamɨn ghu. A ghua uan biziba ko amuim ko boriba akɨrigha gɨn ghua uabɨ aguraghava areme. Ezɨ an amuim ko boriba an kuam inigha ghua, an afeziabar kuaba afezir danganimɨn anefa.

2 Samuel 17:14

Husai mɨkemegha gɨvazɨma, Apsalom ko Israelian gumaziba bar kamaghɨn mɨgei, “Husain mɨgɨrɨgɨaba bar dera, egha Ahitofelɨn mɨgɨrɨgɨabagh afira.” Guizbangɨra, Ikiavɨra Itir God faragha Apsalom gasɨghasɨghasa nɨghnɨki. Kamaghɨn amizɨ, a uabɨ men nɨghnɨziba fezɨ, me Husain akabar gɨn zui. Guizbangɨra Ahitofelɨn mɨgɨrɨgɨaba da dera, ezɨ puvatɨ, Ikiavɨra Itir God me gamizɨ, me akar kamɨn gɨn ghuzir puvatɨ.

2 Samuel 15:31

Ezɨ Devit kamaghɨn oraki, “Ahitofel Apsalom ko an gɨn zuir darazir akurvaghasa ghu.” Ezɨ Devit kamaghɨn Ikiavɨra Itir God ko mɨgei, “O Ikiavɨra Itir God, ga uaning, nɨ Ahitofelɨn mɨgɨrɨgɨabagh iraghtɨ, da bar pazavɨram mangɨ.”

1 Samuel 25:37

Ezɨ amɨnim tirazɨma, Nabalɨn nɨghnɨzim uamategha izi, ezɨ an amuim Abigel iza bizir otivizibar gun a geghari. Nabal oregha gɨvagha, bar zuamɨra an dɨghorim an kozɨ, a irɨgha mɨkɨrɨ, egha a mati dagɨam pura irɨghav iti.

Onger Akaba 33:10

Kantrin Igharazibar Gumazamiziba damuasava nɨghnɨzir biziba, Ikiavɨra Itir God dagh amima da ghua puvarɨsi. Ikɨzir igharaziba damuasa akabav sozir mɨgɨrɨgɨaba, an adar tuaviba apɨri.

Daniel 1:20

Egha atrivim bizir avɨribar men azangsɨgha, me ko mɨgɨa gari, men fofozim Babilonɨn fofozir gumazibar fofoziba, bar moghɨra me gafira. Atrivimɨn irebar mɨngaribagh fogha dar gun mɨgeir gumaziba ko, kukunir gumaziba bar, me Judan gumazir 4plan kabagh afiraghan kogham. Bar puvatɨ.

2 Atriviba 1:2

Dughiar mamɨn, Israelian Atrivim Ahasia, uan dɨpenimɨn azuarim pɨn aperaghav iti. Azuarir kamɨn bɨrim akariaghɨrɨzɨ, Ahasia nguazim girɨgha bar kufi. Kamaghɨn amizɨ, a gumazir maba amada, eghtɨ me Filistian kantrin itir nguibar ekiam Ekronɨn mangɨ Ekronɨn asem Balsebup, an azangsɨgh fogh suam, a ua deragh otogham, o puvatɨgham.