Aisaia 16:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Ezɨ, e kamaghsua, ia en akaba tuisɨghɨva, kotɨn aven guizɨn arazimɨn gɨn mangɨ en akuragh. E kamaghɨn ifonge, ia en danganir mogomemɨn mɨn otogh. E mati gumaziba temer ekiamɨn apengan mangɨ aruer dafamɨn mɨzazimɨn uari muegh, an orangtɨzimɨn ikiam moghɨn, e izɨ ian kantri uari mongam. En apaniba en nguibabar en agɨrazɨma, e datɨrɨghɨn pura guighav iti. Kamaghɨn, ia ua e isɨ, apanibar agharim datɨghtɨ, me izɨ pazɨ e damuan markɨ.

Aisaia 16:3 ပူးပေါင်းရင်းမြစ်များ

Aisaia 32:2

Gumazamiziba akurvazim bagh izɨtɨ, gumazir dapanir kaba deravɨra vaghvagh bar deravɨra men akurvagham. Gumazir dapanir kaba, gumazamizibar danganir mogomemɨn mɨn ikiam, eghtɨ dughiar amozir ekiaba ko amɨnir ekiaba izɨtɨ, me mangɨ men uari mongam. Eghtɨ me mati dɨpaba puvatɨzir danganimɨn, dɨpam ivemara an zui moghɨn ikɨ, egh mati dagɨar ekiam aruem apazagha, danganir orangtɨzimɨn mɨn iti. Aruem bar gavgavightɨ, gumazamiziba mangɨ an apazangɨn dapiagh ikɨ avughsam.

1 Atriviba 18:4

Dughiar Atrivir Amizim Jesebel Ikiavɨra Itir Godɨn akam inigha izir gumazibav sozi me ariaghɨrimɨn, Obadia akam inigha izir gumazir 100pla inigha, me isa dagɨar torir ekiabar me monge. A 50pla isa torir mamɨn me muegha, egha 50pla isa torir mamɨn me monge. Egha a dagheba ko dɨpaba me ganɨga men gara iti.

Hibru 13:2

Nguibar igharazibar gumaziba ian bighan izamin dughiabar, ia me inigh uan dɨpenibar mangɨsɨ okɨnɨghnɨghan markɨ. Ia fo, fomɨra gumazamizir maba ghaze, me gumazir kɨniba isa uan dɨpenibar ghua egha men gari. Ezɨ gumazir me inigha izir kaba, me enselba. Me ghaze, me guizɨn gumazibar gari, ezɨ puvatɨ, me enselbara gari.

Matyu 25:35

Kɨ faragha mɨtiriam nan azima, ia dagheba na ganɨngi, ezɨ kuarim nan pɨrima, ia dɨpam na ganɨngi, ezɨ kɨ nguibar igharazimɨn gumazimɨn mɨn itima, ia na inigha uan dɨpenimɨn ghu,

Sekaraia 7:9

“Bar fomɨra, kɨ Ikiavɨra Itir Godɨn Gavgaviba Bar Itim, akar kam uan gumazamizibagh anɨga ghaze, ia arazir aghuibara damu gumazamizibar araziba akɨr. Egh ia uan adarazir apangkuv men akurvagh.

Daniel 4:27

Kamaghɨn amizɨ, atrivim, nɨ datɨrɨghɨn kɨ nɨ mɨkɨmamin akamɨn gɨn mangam: Nɨ arazir kurabar amuan koghɨva, arazir aghuibar amu, egh gumazamizir onganarazibar apangkuf. Nɨ kamaghɨn damuva, egh nɨ ti deraghvɨra ikɨtɨ, bizir nɨ amiba bar deravɨram otivam.”

Jeremaia 22:3

Ikiavɨra Itir God kamaghɨn mɨgei, ia arazir aghuibara damu. Eghtɨ gumazitam gumazir igharazimɨn bizim okemegha osɨmtɨzim a ganɨngi, ia gumazir osɨmtɨzim itir kamɨn akuragh an osɨmtɨzim agɨfagh. Ia borir afeziaba ariaghireziba, ko amizir paba ovengeziba, ko Kantrin Igharazibar Gumazamizir ia ko itiba, ia pazɨ me damuan markɨ. Egh ia uaghan uan nguazir kamɨn aven, gumazamizir osɨmtɨziba itir puvatɨziba, pura me mɨsoghtɨ me arɨghiram markɨ.

Aisaia 56:8

Kɨ Ikiavɨra Itir God, ian Ekiam ghaze, Kɨ Israelian gumazamizir apaniba inigha kalabus gatɨziba, kɨ uamategh me inigh izam. Egh gumazamizir kɨ kalabusɨn inigha iza akuvaziba, kɨ ua gumazamizir igharazir taba inigh me gɨfuragham.

Aisaia 25:4

Gumazamizir biziba puvatɨziba, nɨ deravɨra me geghuva men gari. Gumazamizir onganarazibagh amiba, osɨmtɨzibar dughiamɨn itima, nɨ men mogomer danganir bar gavgavimɨn mɨn iti. Atrivir kurabar adariba ko anɨngaghariba, mati amɨnir gavgavim iza dɨpenir bɨrim ginifi. Ezɨ nɨ mati averpenim me avarazɨ, amɨnir gavgavim izɨva me gɨnobaghan kogham. Ezɨ gumazir kurabar adariba, mati aruemɨn fefem dɨpaba puvatɨzir danganimɨn ikegha pamtem me gisira. Ezɨ nɨ mati, me tememɨn dughuazimɨn apengan ikia, aruemɨn fefemɨn uari apasi. Ezɨ amɨnim ko amozimɨn dughiamɨn, nɨ biziba puvatɨzir gumazamiziba avarazɨ me deravɨra iti, ezɨ aruer gavgavim me gapongezir puvatɨ, mati overiamɨn ghuariaba aruemɨn fefeim avarazɨ, nguibam bar orangi. Nɨ ifaghatir apanibar akaba dukumizɨ, atrivir kurabar dɨmdiaba pura gefi.

Aisaia 9:6

Bar guizbangɨra, otarir mam amebam e bagha a bate, a borir God e ganɨngizir mam. Eghtɨ an e gativagh en ganamin arazir kam, mati gumazim dɨpenir akɨnir dafam uan dɨpɨzim gatɨgha aneteri. Kar an ziaba, Gumazir Nɨghnɨzir Bar Aghuiba Anɨdim, ko Godɨn Gavgaviba Bar Itim, ko Afeziar Zurara Ikiavɨra Itim, ko Atrivir Dabirabir Aghuim ko Navir Amɨrizim Anɨdim.

Aisaia 1:17

Ia arazir aghuim ko, guizɨn arazimɨn fofozim inigh. Egh arazir aghuir kam bagh ingar bar gavgavigh ikɨ. Egh gumazir igharaz darazi dɨkabɨriba, men arazir kuram akɨrighɨva nɨghnɨzir aghuiba me danɨng. Egh ia borir ameboghfeziaba oveaghueziba ko, amizir paba oveaghueziba, deravɨra me damu. Egh uaghan gumazamiziba pazɨ me damutɨ, ia men akurvagh.

Gumazir Dapaniba 9:15

Ezɨ temer dozir dɨkoniba itim kamaghɨn mɨgei, ‘Kɨ ian atrivimɨn otivsɨ, ia guizbangɨra ifongegh, bar moghɨra izɨ nan aguabar apengan orangtɨzimɨn ikɨ. Ia aghuaghtɨ, avim nan aguabar otogh izɨva Lebanonɨn sidan temer ruariba bar dar isigham.’ ”

Aisaia 58:7

God kamaghɨn mɨgei, “Arazir kɨ ifongezim a kamakɨn: Ia dagheba isɨ mɨtiriaba azir gumazamizibar anɨng. Ia gumazir onganarazibar gantɨ, me dakuamin dɨpeniba puvatɨghtɨ, ia me inigh uan dɨpenibar mangɨ. Ia gumazimɨn gantɨ, a uan mɨkarzim avamin iniba puvatɨghtɨ, ia iniba a danɨng. Ia uan adarazir gantɨ me osɨmtɨziba initɨ, ia men akurvagh.