Aisaia 15:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² Kamaghɨn amizɨ, Dibonɨn nguibar ekiamɨn itir gumazamiziba, mɨghsɨabar ghuavanabogha, asebar ziaba fer danganibar aziava ara iti. Moapia bar fo, Nebon nguibar ekiam ko, Medeban nguibar ekiam bar ikuvizɨma, kamaghɨn me aningɨn apangkuvigha azi. Me bar aning bagha osemegha, uan dapanir arɨziba ko, ghuamasɨzir arɨzibagh ise.

Aisaia 15:2 ပူးပေါင်းရင်းမြစ်များ

Jeremaia 48:1

Ikiavɨra Itir Godɨn Gavgaviba Bar Itim, Israelian God, a Moapɨn kantri gɨnɨghnɨgha kamaghɨn mɨkeme: “Iavzika, Nguibar ekiam Nebon gumazamiziba. Apaniba Nebo bar a gasɨghasigham. Me Kiriataim dɨkabɨragham, a nguibar dɨvazir gavgavim itim. Me a gasɨghasɨgham. Eghtɨ nguibar kamɨn gumazamiziba bar aghumsigham.

Ofa Gami 21:5

“Eghtɨ ia ofa gamir gumaziba, aghuimazir arazimɨn gɨn mangɨva, uan dapanir arɨzir akuatabagh isan markɨ. Egh ghuamasɨzibar mɨriabagh isan markɨ. Egh aghuimazir arazim bagh tintinibar uan mɨkarzibar ghoran markɨ.

Jeremaia 48:18

“Gumazir Moap gasɨghasɨghamin ingangarim itim, a ia batogh ian dɨvazir gavgavibagh asɨghasigham. Kamaghɨn amizɨ, ia Dibonɨn nguibar ekiamɨn gumazamiziba, ia mati atrivimɨn guivir dirim uan ziam fe, egh ia uan ziar ekiaba gɨn amadagh, gumazir kɨnibar mɨn nguazir mɨdiarim dapiagh.

Aisaia 3:24

Eghtɨ dughiar kamɨn, Saionɨn amiziba, fomɨra deragha kurti moghɨn ua kurukan kogham. Me borer mughuriar aghuim zuiba puvatɨgham, eghtɨ men mɨkarziba bar puvɨra mughagham. Me ua mɨteba uan ivariaba amɨghɨnan kogham, egh uan ivariaba pura benir kɨnibar uari amɨghɨnan. Me ua deraghvɨra uan dapanir arɨzibar akɨrigh da asɨngan kogham, eghtɨ men apaniba izɨ, men dapanir arɨziba bar dagh iseghtɨma, me onariba mɨsegh ikiam. Me korotiar bar diriba ua da aghuan kogham, egh me korotiar bɨbɨzir kurabar aghuam. Eghtɨ men guar bar aghuiba, men apaniba kalabuziabar dɨghoribar mɨn me aghor me tuegham. Eghtɨ me bar aghumsigham.

Godɨn Araziba 34:1

Egha Moses Moapɨn danganir zarim ategha, Nebon Mɨghsɨamɨn ghuavanabogha, ghua Pisgan Mɨghsɨamɨn orazimɨn ghuavanabo, kar Jerikon nguibamɨn aruem anadi nakɨn. Egha Moses danganir kamɨn tughav itima, Ikiavɨra Itir God, nguazir a Israelia danɨngamiba bar an aka. Nguazir kam, a Gileatɨn nguazimɨn ikegha ghua Danɨn anabamɨn nguazimɨn tu, a notɨn amadaghan iti,

Dɨboboniba 21:30

Ezɨ datɨrɨghɨn me ko men ovavir boriba ikufi. E me gasɨghasɨgha Hesbonɨn ikegha bar ghua nguibar ekiam Dibonɨn oto. Egha bar ghua Nofan nguibamɨn tu, nguibar kam, Medeban nguibamɨn boroghɨn iti.

Esekiel 7:18

Eghtɨ me azirakar korotiabar aghuigh, puvɨrama atiating akongɨva, bar aghumsigh, uan dapanir arɨziba bar dagh isegh dapanir tuziba ikiam.

Jeremaia 48:31

Kamaghɨn amizɨ, kɨ Moapia bar moghɨra me bagh azir akabar amuam. Kɨ Kirheresɨn gumazamizibar apangkuvam.

Jeremaia 47:5

Gasaba, men naviba bar oseme, ezɨ me uan dapanir arɨziba apɨri. Ezɨ Askelonɨn nguibam bar ikufi. Ia danganir zarir kamɨn ikiavɨra itir varazira, ian apangkuvim manadɨzoghɨn gɨvaghtɨ, ia tintinibar uan inivafɨziba aghorir arazim ategham?

Jeremaia 7:29

Jerusalemia, ia uan azirakar arazim akakagh uan dapanir arɨzibagh isegh da makunigh. Nɨn gumazamiziba Ikiavɨra Itir God gamizɨ, a bar anɨngagharir ekiam iti. Egha a gumazamizir kabar aghuagha akɨrim ragha me gasara. Kamaghɨn, ia mɨghsɨabar ghuavanegh azirakar ighiaba bangɨ.

Aisaia 22:12

Egha bizir kaba otivir dughiamɨn, Ikiavɨra Itir Godɨn Gavgaviba Bar Itim, nan Ekiam, a kamaghɨn ifonge, Ia aziv arang kuarkuv, egh uan dapaniba bar dagh isegh, egh azir korotiabar aghuigh.

Aisaia 16:12

Moapian gumazamiziba uan asebar ziaba fasa mɨghsɨabar ghuavanega, dar dɨpenibar aven dar dei. Me arazir kabagh amua pura uan gavgaviba agefi. Ezɨ men arazir kam tong men akurvazir puvatɨ.”

Aisaia 16:7

“Kamaghɨn amizɨ, e Moapian gumazamiziba ateghtɨ, me uan kantrin osɨmtɨzim ko mɨzazim bagh aziva arangam. Me fomɨra Kirheresɨn nguibar ekiamɨn ikia, wainɨn ovɨzir mɨdiarir me apuzizir aghuiba api. Men bizir aghuiba, da bar moghɨra ikuvigha gɨfa, kamaghɨn amizɨ, me datɨrɨghɨn dagher aghuir kabagh nɨghnɨgha, bar uarir apangkuvighav arai. Mevzika! Gumazamiziba bar men apangkuvigh me bagh aziam.

Aisaia 15:3

Egha azir korotiaba aghuigha, nguibar ekiabar tuavibagh arui. Marazi uan dɨpenibar avughsamin danganibar iti, ezɨ marazi uari akuva itir danganibar iti, Me bar puv azima, temeriba men damazibar izaghira, egha uaghira nguazim giri.

Aisaia 14:31

“Ia Filistian nguibar ekiaba ko, gumazamizir men itiba, ia bar moghɨram atiatingɨva, nɨghɨva akong puv aziva, pamtemɨn dɨm gan, mɨdorozir gumazir bar bɨzir dafam, notɨn amadaghan ikegha izi. Me izima, mati avir mɨturim men gɨrakɨrangɨn otifi. Mɨdorozir gumazir kaba, me mɨdorozir gumazir bar gavgaviba, ezɨ, men tav uabɨra gɨn izir puvatɨ, me bar moghɨra uari inigha izi.”

Jopɨn Akɨnafarim 1:20

Ezɨ Jop kamaghɨn oregha bar osemegha, dɨkavigha uan korotiar ruarim abigha uan dapanim gise. Egha Godɨn damazimɨn tevimning apɨrigha, uan guam nguazim mɨtuagha Godɨn ziam fe.

Godɨn Araziba 14:1

Moses kamaghɨn Israelia mɨgei, “Ikiavɨra Itir God, ian God, a ua baghavɨra ia ginabazɨ ia an boriba. Kamaghɨn amizɨ, ian gumazitam aremeghtɨ ia a bagh aziva, ikɨzir igharaziba ami moghɨn, uan mɨkarzibar ghor, egh mɨnedevir arɨzibagh isan markɨ.

Dɨboboniba 32:38

ko Nebo, ko Balmeon, me dar ingari. Egha me nguibar ekiam Balmeon, ziar igharazim a gatɨ. Me uaghan nguibar ekiam Sipman ingari. Egha nguibar ekiar me ua ingariziba, me ziar igiaba dagh arɨki.

Dɨboboniba 32:3

“Nguazir Ikiavɨra Itir God Israelia en akurazɨ, e inizir kam, nguibar ekiar kaba an iti, Atarot, ko Dibon, ko Jaser, ko Nimra, ko Hesbon, ko Eleale, ko Sipma, ko Nebo, ko Beon. Kar bulmakauba ikiamin nguazir bar aghuim. Ia fo, e bulmakaun bar avɨriba iti.

Ofa Gami 13:40

“Eghtɨ gumazimɨn dapanir arɨziba asighiregh, onarim mɨsegh, a Godɨn damazimɨn mɨzezir puvatɨ. A zue.

Dɨboboniba 21:28

Fomɨra, Atrivim Sihonɨn mɨdorozir gumaziba Hesbonɨn ikia dɨkavigha, mati avimɨn mɨn mɨsoghasa ghue. Egha Moapian nguibar ekiam Ar gasɨghasɨki. Me Arnonɨn Fanemɨn boroghɨn mɨghsɨaba itir gumazir aruaba kuavareme.

2 Samuel 10:4

Ezɨ Hanun akar kam baregha, Devitɨn abuir gumazibar suigha, men ghuamasɨziba vaghvagha dar vuebagh isegha vueba ataki. Egha uaghan men korotiar ruariba arɨghara da aghorezɨ da bar otefe, ezɨ men mɨtiarakaba azenimra iti. Egha me amadazɨ me ghue.

Jeremaia 3:21

Gumazamiziba orazi, nɨgɨnir dafam mɨghsɨabagh isɨn otifi. Kar Israelian gumazamizir arazir kurabagh amiba puvɨram arava azia ikia, uarir apangkuvighasa azangsɨghavɨra iti. Me fo, me Ikiavɨra Itir God, men God, me anetegha tuavir kurar igharazimɨn ghue. Kamaghɨn me pamtem azi.

Jeremaia 47:2

Ikiavɨra Itir God kamaghɨn mɨkeme: “Ia gan! Apaniba notɨn ikia uari akuvasava ami, mati notɨn amadaghan itir dɨpaba bar ekefe. Egha da bar puvɨra ivemara, dar aperiaba bar gavgafi. Apaniba nguazir kam avaragham, mati aperiam nguazim ko an itir biziba bar ada avegham. A nguibaba ko dar itir gumazamiziba saram avaragham. Kamaghɨn nguibar kabar gumazamiziba bar atiatingɨva, pamtemɨn dɨmɨva, bar puvɨram arangam.

Jeremaia 48:35

Kɨ Ikiavɨra Itir God, kɨ guizbangɨra mɨgei, Moapian adarazir ghua mɨghsɨabar pɨn itir danganibar ghua, ofan mughuriar aghuim zuiba ko ofan igharazir maba sara uan aseba bagha dagh amiba, kɨ bar me agɨvagham.

Esekiel 27:31

Me nɨ bagha uan dapanir arɨzibar suigha da asiagharɨgha, azirakar korotiar bɨbɨziba aghui. Me nɨ bagha arava men navir averiaba bar ikufi.

Esekiel 30:2

“O nguazir kamɨn gumazim, nɨ nan akaba inigh dar gun mɨkɨm: “Kɨ Ikiavɨra Itir Godɨn Ekiam, kɨ kamaghɨn mɨgei: Iavzika! Dughiar kuram a izi.

Amos 8:10

Ia isar ekiabagh amua bar akongezir dughiaba, kɨ dagh iraghtɨ, da mati gumazim ovengezɨ, ia an aghuimazimɨn iti moghɨn ikiam. Kɨ ian onger akabagh iraghtɨ, da azir onger akabar mɨn otivigham. Kɨ ia damutɨ ia azirakar korotiabar aghuigh, egh uan osɨmtɨzim akakaghsɨ, bar moghɨra uan dapanir arɨzibagh isegham. Kɨ ia damutɨ ia mati poroghamimning borir vamɨrara itima, an areme, ezɨ aning a bagha osemezɨ moghɨn, ia azi bar osemegham. Dughiar kurar kamɨn osɨmtɨzim, mati ia dagher mɨsozim amezɨ a ia mɨsozi moghɨn, a mangɨvɨra ikɨ mangɨ gɨvagham.

1 Eghaghaniba 19:4

Ezɨ Hanun akar kam baregha, Devitɨn abuir gumazibar suigha men ghuamasɨzibagh ise. Egha uaghan men korotiar ruariba arɨghara da aghorezɨ da bar otefe, ezɨ men mɨtiarakaba azenimra iti. Egha a me amadazɨ me ghue.

Jeremaia 49:3

“Ain nguibar ekiam ikuvigha gɨfa, kamagh amizɨ, Hesbonɨn nguibar ekiamɨn gumazamiziba, ia pamtemɨn azi. Ia Raban gumazamiziba, ia uaghan azi. Apaniba izɨ asem Milkom a inigh, mangɨ kantrin igharazimɨn kalabus datɨgham, egh an ofa gamir gumaziba ko Amonian gumazir dapaniba sara iniam. Kamaghɨn amizɨ, ia azirakar korotiar pɨzibar aghuigh, apangkuvir onger akaba bangɨ. Egh arɨ mangɨ uan dagher azenibar mongegh.