Aisaia 14:9 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁹ “Gumazamizir Oveaghuezibar Nguibamɨn, me nɨ iniasa bar akuegha biziba akɨra iti. Danganir kam ti kamaghɨn mɨgɨa ghaze, Ia gumazir aruaba, dɨkav. Ezɨ ia atriviba, ia uan atrivir dabirabiba ataghɨragh. Ia bar izɨ gumazir izir kam batogh.

Aisaia 14:9 ပူးပေါင်းရင်းမြစ်များ

Jeremaia 50:8

Ikiavɨra Itir God kamaghɨn mɨkeme: “Ia Israelia ko Judaba, ia Babilon ategh arɨ mangɨ. Mati memen apurim memen mabar faragha zui moghɨn, ia kalabuziar gumazamizibar faragh mangɨ.

Aghuzir Akaba 15:24

Gumazim nɨghnɨzir aghuim ikia tuavir isɨn zuimɨn ghua, an ikɨrɨmɨrim ikɨ mangɨvɨra ikiam. Kamaghɨn a uamategh Gumazamizir Oveaghuezibar Nguibamɨn magɨrɨghan kogham.

Aisaia 5:14

Jerusalemɨn itir darasi, ia datɨrɨghɨn isabagh amua bar akuegha iti, ezɨ bar guizbangɨra, Gumazamizir Oveaghuezibar Nguibamɨn, uan akam bar anekarigha, gumazir aruaba ko gumazamiziba tuasa me mɨzua iti. Iavzika, ia bar ikuvigham.”

Esekiel 26:20

Kɨ nɨn amadaghtɨ, nɨ Oveaghuezibar Nguibamɨn magɨrɨ gumazamizir bar fomɨra ikeziba ko ikiam. Kɨ nɨ damightɨ, nɨ nguazimɨn apengan magɨrɨ nguibar ekiar kɨ asɨghasɨghiziba ko zurara ikiam. Bizir kam bangɨn, gumazitam ua nɨn danganimɨn ikian kogham. Eghtɨ nɨ ua nguazir kamɨn nguibar aghuitamɨn mɨn otogham kogham.