Aisaia 14:2 - Godɨn Eghaghanim: Akar Gavgavir Dɨkɨrɨzir Ghurim ko Igiam2 Guizbangɨra, Kantrin Igharazibar Gumazamiziba, Israelia inigh men aku uamategh Israelian nguazimɨn izam, kar Ikiavɨra Itir Godɨn nguazim. Eghtɨ Israelia, gumazamizir kabar amutɨ, me pura Israelian ingangarir gumazamizir kɨnibar otivigham. Fomɨra Israelia kalabus gatɨzir darasi, me datɨrɨghɨn, Israelian kalabuziabar aven ikiam. Me fomɨra Israelia dɨkabɨragha paza me gami, me datɨrɨghɨn Israelian apengan ikɨtɨ, me me gativagham. အခန်းကိုကြည့်ပါ။ |
Aisaia 14:2
34 ပူးပေါင်းရင်းမြစ်များ
Egha fomɨra paza nɨ gamua bar nɨ gifongezir puvatɨzir darasi, men ovavir boriba uan dapaniba avigh nɨ bagh izɨ, nɨn apengan ikiam. Egh me nɨn suemɨn boroghɨn, uan teviba apɨrigh, nɨn ziam fam. Egh me kamaghɨn nɨ dɨponam, ‘Ikiavɨra Itir Godɨn Nguibar Ekiam’ ko, ‘Saion, Israelɨn Godɨn Bar Zuezimɨn Nguibar Ekiam.’
Atriviba ko atrivir amiziba uan boribar gari moghɨn, nɨn boribar ganam. Me nɨn ziam fɨsɨ, nɨn suemningɨn boroghɨn uan teviba apɨrigh, dapaniba avigh nguazim ginivigham. Eghtɨ nɨ fogh suam, kɨ uabɨra, kɨ Ikiavɨra Itir God. Gumazamizir nɨghnɨzir gavgavim nan ikia, nan akurvazim bagha mɨzua itiba, me na mɨzuam ikɨ aghumsɨghan kogham.”
Me uan ifongiamra an gɨn ghua kamaghɨn ami. Kar guizbangɨra, Kantrin Igharazibar Gumazamiziba, me Israelɨn gumazamizir onganarazibar akurvaghamin ingangarim iti. Guizbangɨra, Israelia fomɨra Godɨn bizir aghuir avɨriba isa Kantrin Igharazibar Gumazamizibagh anigha men duabar akura. Kamaghɨn amizɨ, Kantrin Igharazibar Gumazamiziba ikarvaghamin bizim iti, me nguazir kamɨn bizir aghuiba isɨ Israelia danɨngɨva me ikarvagham.
Dughiar kamɨn, Itiopian kantrin gumazamiziba bizir bar aghuiba inigh mangɨ Ikiavɨra Itir Godɨn Gavgaviba Bar Itim danɨngam. A kantrin gavgavim. A kantrin dɨpar bar avɨriba itim. Kantrin kamɨn itir gumazamiziba bar ruarigha, mɨkarziba bar dera. Egha kantrin kam, mɨdorozimɨn ziar ekiam iti, ezɨ kantrin igharaziba bar an atiatingi. Eghtɨ me uan bizir aghuiba inigh izɨ Saionɨn Mɨghsɨamɨn izam. Ikiavɨra Itir God, ua bagha danganir kam amɨsefe, eghtɨ gumazamiziba an izɨ, an ziam fam.
Nan adarasi, ia fɨrighɨrasa God ifonge, egha kamaghɨn a ian dia. Eghtɨ ia ua Moses Osirizir Arazibar apengan ikian kogh kamaghɨn nɨghnɨghan markɨ suam, “Moses Osirizir Araziba e ikiagharɨghizɨ, e arazir kaba ategha fɨriaghɨre. Egh e navir ghurimɨn arazibar amuam.” Moses Osirizir Arazibar mɨgɨrɨgɨaba, da bar uari inigha akar vamɨran iti, “Nɨ uabɨra uabɨ gifongezɨ moghɨn, gumazamizir igharazibagh ifongegh.” Ia bar Godɨn gumazamizibar ingangarir gumazamizibar mɨn ikɨ, uarira uarigh ifongegh. Egh ia uarir atar pura tintinibar uariv sogh, egh deravɨra nɨghnɨgh. Ia uarigh asɨghasɨgham.
Ikiavɨra Itir God kamaghɨn mɨgɨa ghaze, “Mɨdorozir sabar tam Asirian kantri mɨsogh egh bar me agɨvagham. Mɨdorozir sabar kam, a gumazibar sabam puvatɨ, kɨ uabɨ anemadaghtɨ a mangam. Asiriaba mɨdorozir sabar kam gitavɨraghsɨ aregham, eghtɨ men mɨdorozir gumazir igiaba kalabusɨn mangɨ pura ingangarir gumazir kɨnibar mɨn otivigham.
Ikiavɨra Itir God kamaghɨn mɨgei, “Kantri Isip ko Itiopian dagɨaba ko biziba, da Israelia ian biziba. Eghtɨ apaniba kantri Sabean itir gumazir ruariba kalabus datɨgh, ia bagh me amadaghtɨ me izɨ, pura ian ingangarir gumazir kɨnibar mɨn ikiam. Egh me ian guabar uan teviba apɨrigh kamaghɨn mɨkɨm suam, ‘Bar guizbangɨra, God ia ko iti. A uabɨra bar guizbangɨra God, ezɨ godɨn tam ua itir puvatɨ!’ ”
Ikiavɨra Itir God, en Ekiam, kamaghɨn Jerusalemɨn gumazamizibav gei, “Kɨ uan inir avɨzim asaraghtɨ, an ababanimɨn mɨn ikiam, eghtɨ kɨ uan dafarim, ababanimɨn mɨn uaghan a ghufegham. Eghtɨ Kantrin Igharazibar Gumazamiziba an ganigh nɨn boriba uam ada inigh izam. Me nɨn otariba uan evaribar arigh me inigh izam. Me nɨn guiviba isɨ uan dɨpɨzibar afegh me inigh izam.
Kɨ Ikiavɨra Itir God, kɨ mɨkeme: Bar guizbangɨra kɨ dughiar mam amɨsefe, egh dughiar kamɨn kɨ apaniba ameghtɨ me izɨ, Raban nguibam mɨsogham, kar Amonɨn kantrin nguibar ekiam. Me nguibar kam gasɨghasigham, eghtɨ a pura mɨnezir akuvazibar mɨn ikiam. Eghtɨ apaniba nguibar ekiamɨn boroghɨra itir nguibabar apongam. Eghtɨ, Israelia gɨn ua Amonia inizir nguazir kam iniam. Kɨ Ikiavɨra Itir God, kar nan akam.
Egh me ua 7plan azenir kabar ua ruariba ko, tuzibar dazibar kuan kogham. Me avibar arɨghsɨ mɨdorozir bizir kabar ikɨziba ater mangɨ dar avibar arɨgham. Gumazir men biziba okemeziba, Israelia kamaghɨra, me ikaragh men biziba okemegham. Apanir men bizibagh asɨghasɨghiziba, Israelia uaghan me ikaragh men bizibagh asɨghasɨgham. Kɨ Ikiavɨra Itir Godɨn Ekiam, kɨ kamaghɨn mɨkeme.”
Egha Ikiavɨra Itir God kamaghɨn mɨgɨa ghaze, “Ia oragh! Kɨ Jerusalemɨn nguibar ekiam damightɨ, a zurara bar deravɨra ikiam. A kantrin igharazibar bizir aghuir avɨriba iniam. Mati faner zurara emɨra ivemara gevir puvatɨzɨ moghɨn, bizitamɨn oteveghan kogham. Ia bizir kaba iniva bar akuegham, mati borim amebamɨn otem apava bar akongezɨ, amebam a ifiragha aruima a bar akonge. Egha amebam a isa uan apozim gatɨgha a gikararaima, a bar akonge.
ကြော်ငြာတွေ