Aisaia 12:4 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁴ Dughiar kamɨn ia kamagh mɨkɨmam: “E Ikiavɨra Itir God, an ziam dɨpon, egh a mɨnabɨva, uarir akurvaghsɨ an dɨmam. Egh ingangarir ekiar an amizibar gun kantribar gumazamiziba bar moghɨra me mɨkɨmɨva, an ziar ekiamɨn gun mɨkɨm.

Aisaia 12:4 ပူးပေါင်းရင်းမြစ်များ

Onger Akaba 105:1

E bar Ikiavɨra Itir Godɨn ziam dɨponɨva a mɨnabaka. Egh ingangarir ekiar an amizibar gun Kantrin Igharazibar Gumazamiziba bar me mɨkɨmam.

1 Eghaghaniba 29:11

Nɨ gavgavir bar ekiam ikia, ziar ekiam ikia, bar pɨn mar iti, nɨ bar faragha iti. Bar guizbangɨra, overiam ko nguazimɨn itir bizir kaba bar nɨn biziba. Kamaghɨn amizɨ, nɨ biziba bar dagh ativagha dar atrivir ekiam.

Aisaia 25:1

O Ikiavɨra Itir God, nɨ nan God, ezɨ kɨ nɨn ziam fasa. Nɨ nan akurvaghasa bizir aghuir igharagha garibagh ami. Nɨ fomɨra damuasa mɨkemezir biziba, nɨ guizbangɨra dagh amigha gɨfa. Kamaghɨn amizɨ, kɨ ziar ekiam nɨ ganɨdi.

Jon Osirizir Akar Aghuim 17:26

Kɨ kamaghɨn ifonge, me igharaz darazigh ifongezir arazim inigham, mati nɨ na gifongezɨ mokɨn. Eghtɨ kɨ uaghan men aven ikiam. Kamaghɨn kɨ nɨ isa men aka, egh kɨ kamaghɨn damu mamaghɨra ikiam.”

Jeremaia 50:2

“Nɨ Kantrin Igharazibar Gumazamiziba bagh mangɨ, akam me mɨkɨn. Nɨ nir avɨzim fegh ghuanang, eghtɨ gumazamiziba an ganigh, izɨ akam baragh. Egh akam mongan markɨ. Nɨ mangɨ kamaghɨn me mɨkemegh, ‘Apaniba Babilonɨn nguibam inigha gɨfa. Babilonɨn aser kam, Bel, a bar aghumsɨki. Ezɨ asem Marduk dɨgavir kuram gami. Ezɨ Babilonɨn asebar marvir guaba bar aghumsɨki, ezɨ dar nedazir kuriba dɨgavir kuram gami.’ ”

Onger Akaba 57:5

O God, nɨ overiamɨn uan gavgavim akaghtɨ, nguazimɨn gumazamiziba ganigh fogh suam, nɨn gavgavim bar ekevegha me gafiragha pɨn iti.

Onger Akaba 18:46

Ikiavɨra Itir God, a zurara ikia mamaghɨra iti. A dagɨar ekiamɨn mɨn na modozɨ kɨ an apazangɨn itima a na geghufi, kamaghɨn amizɨ, kɨ ziar ekiam a danɨngam. God nan akurvazimɨn ikia ua na inizɨ, kamaghɨn, kɨ an ziam fam.

Nehemia 9:5

Livain marasi, men ziabar kara: Jesua, Katmiel, Bani, Hasapnea, Serebia, Hodia, Sebania, ko Petahia, me Ikiavɨra Itir God ko mɨkɨmasa gumazamizibav gɨa ghaze, “Ia dɨkavigh Godɨn ziam fɨ, a ian Ikiavɨra Itir God, e zurara an ziam fɨ mamaghɨra ikiam.”

Ua Me Ini 33:19

Ezɨ Ikiavɨra Itir God kamaghɨn Mosesɨn akam ikaragha ghaze, “Kɨ nɨn guamɨn uan arazir aghuim akagham. Egh kɨ uan ziamɨn gun nɨ mɨkɨmtɨ, nɨ fogham, nan ziam, Ikiavɨra Itir God. Kɨ gumazamizitabar kuarkuvighsɨ, kɨ men kuarkuvam. Kɨ gumazamizitabar apangkuvsɨ, kɨ men apangkuvam.

Ua Me Ini 15:2

Ikiavɨra Itir God uabɨ na gamizɨma, kɨ gavgavigha, onger akam bangava an ziam fe. A zurara ua na isi, ezɨ kɨ an ziam fasa. A nan God, egha nan akurvazim. Kamaghɨn amizɨ, kɨ an ziar ekiam fasa. Nan afeziamɨn God, kɨ an ziar ekiam fɨ, a isɨ bar pɨn anerɨgh ighiam damuam.

Aisaia 66:19

Eghtɨ kɨ men tongɨn ababanitam asaragh men akagham. Egh kɨ gumazamizir ikiavɨra itir varazira amangɨtɨ, me saghon itir arighatɨzibar gumazamizir igharaziba bagh mangam. Egh nan ziar ekiam ko gavgavimɨn gun gumazamizir tong oraghizir puvatɨzibav kɨmam. Kɨ kantrin kaba bagh me amangɨtɨ, me mangam, Tarsisɨn kantri ko, Pulɨn kantri ko, Lidian kantri, me barir pibar asir fofozir aghuim itir gumaziba. Egh Tubalɨn kantri, ko Grikɨn kantri, ko nguibar arighatɨzir ongarir torir saghon itiba, me bagh mangam. Gumazamizir ikiavɨra itir varaziran kabanang, kantrin kaba bagh mangegh nan ziar ekiam ko gavgavimɨn gun me mɨkɨmam.

Aisaia 33:5

Ikiavɨra Itir God, ziar ekiam ikiava, bar pɨn uan Nguibamɨn iti. Egh a uan guizɨn arazim ko arazir aghuim amadaghtɨ, a izɨ Jerusalemɨn mɨkebaba bar da avaragham.

Aisaia 24:15

Kamaghɨn amizɨ, ia aruem anadi naghɨn itir gumazamiziba, Ikiavɨra Itir Godɨn ziam fɨ. Ia ongarimɨn arighatɨzibar itir gumazamiziba, ia bar moghɨra ziar ekiam a danɨng, a Israelian God, Ikiavɨra Itir God.

Aisaia 12:1

Eghtɨ gɨn izamin Dughiam otoghtɨ, ia Israelia kamaghɨn igham damuam: “O Ikiavɨra Itir God, kɨ nɨn ziam fe. Nɨ nan anɨngaghe, ezɨ nɨn anɨngagharim gɨfa, ezɨ nɨ bar deraghavɨra nan asughasugha gavgavim na ganɨdi. Ezɨ datɨrɨghɨn nan navim deraghavɨra iti.

Aisaia 2:17

Ikiavɨra Itir God otivamin dughiamɨn, a gumazamizir uarira uari feba bar me abɨragham, eghtɨ me bar aghumsigham. Eghtɨ marvir guaba uaghan bar gɨvagham. Eghtɨ Ikiavɨra Itir God uabɨra dughiar kamɨn ziar ekiam iniam.

Aisaia 2:11

Ikiavɨra Itir God otivamin dughiamɨn, a gumazamizir uarira uari feba bar me abɨragham, eghtɨ me bar aghumsigham. Eghtɨ a uabɨra dughiar kamɨn ziar ekiam iniam.

Onger Akaba 113:5

Ikiavɨra Itir God, a en God, gumazitam an mɨraram amir puvatɨ. An atrivir bar ekiamɨn ikia bar pɨn iti. Egha bar pɨn ikia overiam ko nguazim vɨrara vɨn beragha aningɨn gari.

Onger Akaba 107:22

Me a mɨnamamin ofabar amuva, an amizir bizir aghuibar gun gumazamizibav kɨmsɨ bar akongegh onger akabar amu.

Onger Akaba 97:9

O Ikiavɨra Itir God, Nɨ Godɨn Bar Pɨn Itim, nɨ nguazimɨn gumazamiziba bar me gativagha men gari. Nɨ ziar ekiam ikia, bar asebagh afira.

Onger Akaba 96:3

Ia, an gavgavim ko ingangarir aghuir an amibar gun kantriba bar dar gumazamizibav kɨm.

Onger Akaba 73:28

O God, kɨ nɨn boroghɨra itir arazir kam, a bar dera. Ekiam, nɨ Ikiavɨra Itir God, nɨ guizbangɨra nan dɨvazir gavgavim, ezɨ kɨ nɨn aven modi. Bizir nɨ amiba, kɨ bar adar gun mɨkɨmam.

Onger Akaba 46:10

A kamaghɨn mɨgɨa ghaze, “Ia uarir asugh nɨmɨra ikɨ. Egh deragh na gɨfogh, kɨ guizbangɨra God. Kantriba bar nan ziam fɨ. Nguazir kamɨn itir gumazamiziba bar kamaghɨn mɨkɨm suam, Kɨrara kɨ ekevegha bar pɨn iti.”

Onger Akaba 40:5

O Ikiavɨra Itir God, nɨ nan God, nɨ bizir aghuir bar avɨriba e bagha dagh ami. Gumazitam nɨn mɨn amir puvatɨ, nɨ bar me gafira. Nɨ e bagha bizir aghuir avɨribagh ami. Dar dɨbobonim bar ghuavanabozɨ, kɨ da mengan ibura.

Onger Akaba 34:3

E bar moghɨra an ziar ekiamɨn gun mɨkɨmɨva, egh an ziam fam!

Onger Akaba 22:31

Gumazamizir men amebaba tɨghar me batamiba, me gɨn otivightɨ, me me mɨkɨm suam, “God uabɨ uan gumazamizibar akuragha ua me ini.”

Onger Akaba 21:13

O Ikiavɨra Itir God, nɨ dɨkavigh uan gavgavim sara izɨtɨ, e ighiaba bangɨ nɨn gavgavir ekiam fam.

Onger Akaba 9:11

Ikiavɨra Itir God, Saionɨn nguibamɨn ikia uan atrivir dabirabim gaperaghav iti. E a bagh ongɨva an ziam fam! E Kantrin Igharazibar Gumazamizibar tongɨn ikɨ, arazir an amizibar gun mɨkɨmɨva an ziam fam.

1 Eghaghaniba 16:8

Asapɨn adarazi ighiar kam bati: E bar Ikiavɨra Itir Godɨn ziam dɨponɨva a mɨnabaka. Egh ingangarir ekiar an amizibar gun Kantrin Igharazibar Gumazamiziba bar me mɨkɨmam.

Onger Akaba 148:13

Bar guizbangɨra, Ikiavɨra Itir God, an ziam bar ekevegha gumazamizibar ziaba bar dagh afira, egha an ziar ekiam bar pɨn ikia nguazim ko overiam gafira. Kamaghɨn amizɨ, biziba bar moghɨra an ziam fɨ.

Aisaia 26:8

O Ikiavɨra Itir God, e nɨn Akar Gavgavibar gɨn zui, egha e nɨ baghavɨra gara, nɨrara mɨzua iti. Egha uan navir averiabar aven nɨn ziar ekiam bar a gifongegha ghaze, gumazamiziba bar nɨ gɨfogh zurara nɨ gɨnɨghnɨgham.

Aisaia 42:12

Ia gumazamizir roghɨra itiba, ziar ekiam Ikiavɨra Itir God danɨng. Ia saghon itir arighatɨzibar gumazamiziba, ia bar moghɨra an ziam fɨ.

Aisaia 48:20

Ia kantri Babilon ategh, nguibar kamɨn gumazamizibar arɨmangɨgh. Egh ia bar akuegh pamtemɨn tiariba akar, egh kamaghɨn akam amadaghtɨma a nguazir kamɨn ruaghatevibar mangɨ, “Ikiavɨra Itir God uamategha uan ingangarir gumazim Jekop, uam a ini.”

Malakai 1:11

“Kɨ Ikiavɨra Itir Godɨn Gavgaviba Bar Itim, kɨ ghaze, gumazamizir aruem anadi naghɨn itiba ko, aruem uaghiri naghɨn itir kantriba, me bar moghɨra ziar ekiam na ganɨdi. Nguibaba bar dar gumazamiziba mughuriar aghuim zuir ofaba ko, ofan igharazir guar avɨriba sara na danɨngam. Gumazamizir kaba me bar moghɨra ziar ekiam na ganɨdi.

Onger Akaba 68:5

God uan Nguibamɨn ikia, borir ameboghfeziaba ariaghireziba deragha men gara, paba ariaghirezir amiziba deragha men gari.