Aisaia 11:9 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁹ Dughiar kamɨn, nguazimɨn itir gumazamiziba bar deraghvɨra Ikiavɨra Itir God gɨfogham. Eghtɨ fofozir kam, nguazimɨn oteviba bar dagh izɨvagham, mati ongarim bar ghua uan danganimra tu. Kamaghɨn amizɨ, God baghavɨra itir mɨghsɨamɨn itir gumazamiziba ko, gumazamizir igharaziba bar moghɨra uari inigh deraghvɨra ikɨva, tav pazɨ tav damuan kogh, egh me gasɨghasɨghan kogham.

Aisaia 11:9 ပူးပေါင်းရင်းမြစ်များ

Habakuk 2:14

Eghtɨ nguazimɨn itir gumazamiziba bar deraghvɨra Ikiavɨra Itir God gɨfogham. Eghtɨ fofozir kam, nguazimɨn oteviba bar dagh izɨvagham, mati ongarim bar ghua uan danganimra tu.

Aisaia 52:10

Ikiavɨra Itir God uan gavgavim, kantribar gumazamiziba an ganasa, anekagha gɨfa. Eghtɨ a uan gumazamizibar akuragha ua me inizir gavgavir ekiam, nguazir kamɨn gumazamiziba bar an ganam.

Onger Akaba 72:19

E zurara an ziar aghuir kam fɨvɨra ikiam. Bar guizbangɨra. An ziar Ekiam nguazir kam bar a gizɨfagh.

Jopɨn Akɨnafarim 5:23

Egh nɨn azenir nɨ ingarim, dagɨatam an aven ikian kogham. Eghtɨ asɨzir atiaba nɨ ko navir amɨrizimɨn ikɨ deraghvɨra nɨ ko ikiam.

Sekaraia 14:9

Eghtɨ Ikiavɨra Itir God nguazir kamɨn kantriba bar dagh ativagh dar Atrivimɨn ikiam. Eghtɨ a bar uabɨra, gumazamiziba bar moghɨra ziar vamɨra a darɨgh, an ziam fam.

Aisaia 59:19

Ikiavɨra Itir God puv ingara, mati amɨnim iza dɨpam giverazɨ, dɨpam bar puvɨra ivemari moghɨn, Ikiavɨra Itir God izam. Eghtɨ nguazir kamɨn ruaghateviba bar dar itir gumazamiziba, aruem anadi naghɨn tugha ghua aruem uaghiri naghɨn, me Ikiavɨra Itir Godɨn ziar ekiam ko gavgavim gɨfogh, an ziamɨn atiating an apengan ikiam.

Aisaia 49:6

“Kɨ faragha ingangarir kam nɨ ganɨga ghaze, Nɨ Jekopɨn adarasi, Israelian ikiavɨra iti darasi, nɨ gavgavim me danɨng ua me inigh izɨ. Kar ingangarir ekiam puvatɨ. Ezɨ kɨ datɨrɨghɨn ingangarir ekiam nɨ danɨng, egh nɨ damightɨ, nɨ Kantrin Igharazibar Gumazamiziba bagh angazangarimɨn mɨn ikiam. Eghtɨ kɨ Kantrin Igharazibar Gumazamiziba bar men akuragh ua me iniam.”

Aisaia 45:6

Kɨ kamaghsua, nguazir kamɨn gumazamiziba, me aruem anadir naghɨn ikia ghua aruem ghuaghiri naghɨn tu, me bar moghɨra fogh suam, kɨrara kɨ Ikiavɨra Itir God, ezɨ ua godɨn tam itir puvatɨ. Kamaghɨn amizɨ, kɨ bizir kabagh ami.

Akar Mogomem 21:27

Eghtɨ bizir mɨzɨrɨziba ko gumazamizir arazir kurigha mughazibagh amiba ko, gumazamizir ifavariba, me nguibar ekiar kamɨn aven mangan kogham. Bar puvatɨgham, gumazamizir ziaba akɨnafarir zurara itimɨn aven itiba, akɨnafarir kam a Sipsipɨn Nguzimɨn akɨnafarim, merara nguibar ekiar kamɨn aven mangam.

Aisaia 35:9

Laionɨn tam ko, asɨzir kurar mɨsozitam tuavir kamɨn mangan kogham. Asɨzir anɨngazir taba tuavir ekiar kam daruan kogham. Gumazamizir Ikiavɨra Itir God akuragha ua inizibara, tuavir kamɨn daruam.

Aisaia 30:26

Eghtɨ dughiar kamɨn, iakɨnimɨn angazangarim aruemɨn angazangarimɨn mɨn siragham. Eghtɨ aruem isiragh gavgavightɨ an angazangarim bar ekevegh, a fomɨra garir angazangarim gafiragham. Mati nɨ 7plan aruebar aruer angazangariba inigha aruer vamɨra gisafura. Ikiavɨra Itir God uamategh uan gumazamiziba deravɨra me damu men mɨzaziba ko osɨmtɨziba adeghtɨ me ghuamagheghamin dughiamɨn, bizir kaba otivam.

Aisaia 11:13

Eghtɨ gɨn kantri Israel ua navir kuram kantri Judan ikian kogham. Eghtɨ kantri Juda, uam kantri Israelɨn anɨngagheghan kogham. Puvatɨ. Aning uaning inigh deraghvɨra dapiam.

Aisaia 2:4

A jasɨn mɨn ikɨ kantriba bar dar gumazamizibar araziba tuisɨgh, men osɨmtɨziba deragh da akɨrtɨ, me uari inigh deragh ikiam. Egh me uan mɨdorozir sababa inigh, dav soghtɨ, da baravigh nguazibagh tuir ainbar mɨn otivigham. Egh me uan afuzibav soghtɨ, da ikɨzɨrigh sabar azenibar ingaribagh ami moghɨn, otivigham. Egh danganiba bar dar itir gumazamiziba, uam uariv soghan kogh ikɨva, ua mɨdorozir arazibar sure damuan kogham.

1 Tesalonika 5:15

Ia deravɨra gan, gumazitam o amizitam arazir kurabar ia damutɨma, ia an arazir kuraba ikaravaghan markɨ. Ia zurara arazir aghuibar Godɨn gumazamizibar amusɨ gavgavigh, uaghan gumazamizir igharaziba sara.

Onger Akaba 78:54

A me inigha ghua uan nguazir a ua bagha inabazimra me atɨ. Nguazir mɨghsɨar kam, a uan gavgavimɨn a ini.

Aisaia 11:8

Eghtɨ borir dozir oteba apavɨra itiba, me kuruzir imeziba itibar mozibar boroghɨra ikararangam. Eghtɨ borir oteba ataghiziba, uan dafariba isɨ kuruzir kuraba itir mozibar aven dar arɨgh, egh deraghvɨra ikiam.

Aisaia 33:6

Egh ia Ikiavɨra Itir Godɨn gumazamiziba, a zurara deragh ian ganɨva, ia damutɨ ian dabirabim deragh gavgavigh ikiam. Egh a bizir aghuiba ia danɨngtɨ ia deraghvɨra ikiam. A nɨghnɨzir aghuiba ko, fofozir avɨriba ko, arazir an atiatiava an apengan itiba, da bizir bar aghuibar mɨn, an ada isa ia ganɨdi.

Aisaia 54:5

“Gumazir nɨn ingarizim, a nɨn pamɨn mɨn iti. An ziam kara, Ikiavɨra Itir Godɨn Gavgaviba Bar Itim, a Israelian Godɨn Bar Zuezim, a nɨn Akurvazir Gumazim, a nguaziba bar dagh ativagha dar garir God.

Aisaia 56:7

Ezɨ gumazamizir kaba, kɨ me inigh uan Mɨghsɨamɨn mavanangam. Me nan Dɨpenir na ko mɨgeimɨn ikɨtɨ, kɨ me damutɨ me bar akuegham. Me nan ofa gamir dakozim izɨ, asɨzim tuaghtɨ a bar isi mɨghɨrighamin ofa ko, ofan igharaziba na danɨngtɨ, kɨ da iniam. Guizbangɨra, nan Dɨpenimɨn ingangarimɨn mɨngarim kamakɨn, kar Nguaziba Bar Men Gumazamiziba na ko Mɨgeir Dɨpenim.

Aisaia 65:25

Eghtɨ afiar atiaba ko sipsipɨn nguziba uari inigh damam. Eghtɨ laionba, bulmakaubar mɨn oghebar amam. Eghtɨ kuruziba nguazimɨn mɨnezibar amam. Egh da nan mɨghsɨamɨn ikɨva, bar moghɨra bar deravɨra uari inigh ikɨva, egh pazɨ uarir amuan kogham. Kɨ Ikiavɨra Itir God, kɨ mɨkemegha gɨfa.”

Aisaia 66:18

Ikiavɨra Itir God ghaze, “Kɨ gumazamizibar nɨghnɨziba ko arazibar ganigha fo, kar dughiar kɨ gumazamiziba bar me akuvamim. Kantriba bar dar itir gumazamiziba ko akar igharazibav mɨgeir gumazamiziba, me bar moghɨra izam. Me izɨ uari akuvaghamin dughiamɨn, me nan angazangarir ekiam ko gavgavimɨn ganam.

Aisaia 66:20

Kɨ Ikiavɨra Itir God, kɨ ghaze, gumazamizir kaba mangɨ, ian namakar kantrin kabar aven itiba, me me isɨ Ikiavɨra Itir Godɨn ofan mɨn me inigh na bagh izam. Egh me isɨ hoziaba ko, karisba ko, dabirabir akuriaba ko, donkiba ko, kamelbar afegh, men aku na bagh nan mɨghsɨamɨn itir nguibar ekiam Jerusalemɨn izam. Israelia zurara witɨn ovɨziba ofabar mɨn, da isa itarir nan damazimɨn zuezibagh arɨgha, da atera na bagha nan Dɨpenim izi moghɨn, me men aku na bagh izam.

Jeremaia 31:34

Kɨ Ikiavɨra Itir God, kɨ guizbangɨra mɨgei, dughiar kamɨn gumazamiziba vaghvagh uan namakaba ko uan adarazir sure damuan kogh suam, ‘Ia Ikiavɨra Itir God gɨfogh.’ Puvatɨ. Me bar moghɨra na gɨfogham, gumazamizir kɨniba ko ziaba itir gumazamiziba. Eghtɨ kɨ men arazir kuraba gɨn amadaghɨva ua dagh nɨghnɨghan kogham.”

Esekiel 34:25

Me navir amɨrizimɨn ikɨ deragh dapiagh ikɨsɨ, kɨ me ko Akar Dɨkɨrɨzir Gavgavim damuam. Me mɨsoghɨrarɨghamin asɨzir atiaba, kɨ bar ada gɨvagham, eghtɨ da ua men nguazimɨn ikian kogham. Guizbangɨra, nan sipsipba deravɨra ikɨva ruarir ekiabar dakuam.

Esekiel 47:5

Ezɨ a ua dɨpamɨn mɨriamɨn sɨvagha an abarima, a 500 mitan tu. Dɨpam kagh faner ekiamɨn otogha bar kone. Ezɨ kɨ an aven daru vongɨn mangan ibura. Gumazir uabɨ afozofogh damuan fozitam, a ti tong an aven mangam. Kar faner ekiar gumazitam vongɨn mangan koghamim.

Daniel 11:45

Egh a ua bagh averpenir ekiaba, nguazir otevir mamɨn dar ingaram, nguazir kam a Mediterenianɨn Ongarir Ekiamɨn mɨriam ko Godɨn Dɨpenim itir mɨghsɨamɨn tɨzimɨn iti. Mɨghsɨar kam bar zuegha bar deragha taghtasi, kar Godɨn mɨghsɨam. Eghtɨ atrivir kam bar gɨvagham, eghtɨ tav an akuraghan kogham.”

Daniel 12:4

Ezɨ datɨrɨghɨn a na mɨgɨa ghaze, ‘Nɨ Daniel, nɨ akaba itir akɨnafarir kam dukuagh, egh kendel gris a datɨghtɨ, an akaba modogh ikiam. Egh akɨnafarir kam dukuagh mamaghɨra ikɨ mangɨ dughiar abuananam otogham. Eghtɨ gumazamizir avɨrim pamtem akar kamɨn mɨngarim gɨfoghsɨ damuva avegham.’ ”

Hosea 2:18

“Dughiar kamɨn, kɨ asɨzir atiaba ko, kuruziba ko, kuaraziba koma akar dɨkɨrɨzir gavgavim damigham. Eghtɨ da nan gumazamizibagh asɨghasɨghan kogham. Egh mɨdorozim gamir biziba, mati barir piba ko, afuziba, kɨ bar ada apɨrarigham. Eghtɨ nan gumazamiziba navir amɨrizimɨn ikɨ nguazir kamɨn ikiam, egh uam atiatingan kogham.

Joel 3:17

A kamaghɨn mɨgei, “Dughiar kamɨn ia Israelia fogham, kɨrara kɨ Ikiavɨra Itir God, ian God. Saion, nan mɨghsɨamra, kɨ danganir kamɨn iti. Kɨ Jerusalem damightɨ, a nan nguibar ekiamra ikiam, eghtɨ azenan itir darazi uam an aven mangan kogham.

Aisaia 32:16

Dughiar kamɨn, gumazamiziba nguazir kamɨn ruaghateviba bar dar ikɨ, arazir aghuiba ko guizɨn arazibara damuam.

Jeremaia 31:23

Ikiavɨra Itir Godɨn Gavgaviba Bar Itim, Israelian God, a kamaghɨn mɨkeme: “Kɨ gɨn Judan nguazim damightɨ, a deraghvɨra ikiam. Eghtɨ Judaba uan nguazim ko nguibar ekiabar ikiam. Egh me fomɨra mɨkemezɨ moghɨn ua mɨkɨm suam, ‘Nɨ Ikiavɨra Itir Godɨn mɨghsɨam, Ikiavɨra Itir God nɨn ikia, bar arazir aghuibagh ami! Ikiavɨra Itir God bar deraghvɨra nɨ damu!’

Sekaraia 8:3

Kɨ uamategh izɨ Saionɨn nguibamɨn aven ikiam, an ziar mam Jerusalem, a bar guizbangɨra nan nguibar ekiamra. Jerusalem, a kɨ Ikiavɨra Itir Godɨn Gavgaviba Bar Itimɨn mɨghsɨam, eghtɨ me kamaghɨn a dɨpon suam, Godɨn Mɨghsɨar Anogoroghezim. Eghtɨ ikɨzir igharazibar gumazamiziba Jerusalemɨn gumazamizibar gan suam, ‘Guizbangɨra, Jerusalemia deraghavɨra Ekiamɨn gɨn zui.’