Aisaia 11:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² Eghtɨ Ikiavɨra Itir Godɨn Duam izɨ gumazir kam gizɨvagh a ko ikɨ, egh fofozir aghuim ko nɨghnɨzir aghuim a danɨngam. Eghtɨ an atrivir gavgavimɨn ikɨva, deraghvɨra ingangarim damuamin fofozim ikiam. Egh a deraghvɨra Ikiavɨra Itir God gɨfogh, an atiatingɨva zurara an apengan ikiam.

Aisaia 11:2 ပူးပေါင်းရင်းမြစ်များ

Aisaia 61:1

Ikiavɨra Itir God, akar aghuim gumazamizibav kɨnasa na mɨsevegha, borem nan dapanim ginge, kamaghɨn amizɨ, Ikiavɨra Itir God, en Ekiamɨn Duam, a nan iti. Egha uaghan akam akunasa na amada, eghtɨ kɨ kamaghɨn me mɨkɨm suam, gumazir osɨmtɨzibar apengan itiba, men osɨmtɨziba gɨvagham, eghtɨ kalabusɨn itir gumazamiziba, me bagh kalabusɨn tiar akam kuightɨ, me kalabus ategh fɨrighɨregh mangam.

Jon Osirizir Akar Aghuim 16:13

Ezɨ Godɨn Duam, a guizɨn akam mɨgeir Duam, a izɨva, ian nɨghnɨzibar amutɨ ia guizɨn akaba bar dagh fogham. A uabɨ uan nɨghnɨzimɨn akatam mɨkemeghan kogham. Puvatɨ. Akar an oraghizim, akar kamra an an gun mɨkɨmam. Egh a bizir gɨn otivamibar gun ia mɨkɨmam.

2 Timoti 1:7

Nɨ fo, Duar God e ganɨngizir kam, an e damutɨ e atiatingan kogham. Godɨn Duam gavgavim e ganɨga, egha en akurvazima e igharaz darazigh ifonge. Egha e gamima, e uaghan deravɨra uan ikɨrɨmɨrimɨn gari.

Aisaia 42:1

Ikiavɨra Itir God ghaze: Ia gan! Kar nan ingangarir gumazim, kɨ uabɨ anemɨsefe, egha kɨ bar a gifuegha, a bagha bar akonge. Egha uan Duam isa a gatɨ. Eghtɨ a nguazir kamɨn kantribar gumazamiziba guizɨn arazimɨn gɨn mangɨsɨ me tuisɨgham.

Matyu 3:16

Ezɨ Iesus ruegha gɨvagha zuamɨra dɨpamɨn anagava oto. Ezɨ overiam kuiaghirɨzɨ a garima, Godɨn Duam bunbamɨn mɨn mɨghegha izaghira a gisɨn apera.

Jon Osirizir Akar Aghuim 3:34

Gumazir God amadazir kam, God uan Duam isa bar a ganɨngi. Kamaghɨn amizɨ, a Godɨn akam akuri.

Jon Osirizir Akar Aghuim 14:17

Ezɨ Akurvazir kam a Godɨn Duam, a guizɨn akabav geir Duam. Ezɨ nguazir kamɨn gumazamiziba me an ganighan koghɨva, egh a gɨfoghan kogham, kamaghɨn me a inighan kogham. Ezɨ iarara, a ia ko iti, egh a ian navir averiabar aven ikiam. Kamaghɨn ia a gɨfo.

Aisaia 48:16

“Ia nan boroghɨra izɨ nan akam baragh! Fomɨra iza datɨrɨghɨn, kɨ mogomer danganitamɨn ikia otivamin bizibar gun mɨgeir puvatɨ. Bar puvatɨ. Bizir kaba tɨghar otivamin dughiamɨn, kɨ faragha ikia dar garima da otifi.” Kamaghɨn amizɨ, Ikiavɨra Itir God, nan Ekiam, uan Duam na ganɨga na amadazɨma, kɨ an Duamɨn gavgavim sara izi.

1 Korin 1:30

God uabɨ ia gamizɨ, ia Krais Iesus ko poroghav iti. Ezɨ a Krais gamizɨ, a en nɨghnɨzir aghuimɨn mɨngarimɨn iti. Ezɨ Kraisɨn ingangarimɨn, God e gamizɨma, e Godɨn damazimɨn deragha, God baghavɨra iti. Ezɨ Kraisɨn ingangarimɨn, a uam e givezegha, arazir kuramɨn gavgavimɨn e fɨri.

Aisaia 59:21

Egha Ikiavɨra Itir God kamaghɨn mɨgei, “Kɨ me ko Akar Dɨkɨrɨzir Gavgavim gamigha kamaghɨn mɨgei, ‘Kɨ uan Duam ko uan Akaba ia ganɨngizɨ, da ia ko iti. Akar kaba, ia ko ikɨvɨra ikɨtɨ, ia dar gun mɨkɨmam. Eghtɨ gɨn ian boriba ko ian ovavir boriba, me uaghan zurara nan akam akunam. Nan Akar Dɨkɨrɨzir Gavgavir kam zurara ikɨ mamaghɨra ikiam.’ Kɨ Ikiavɨra Itir God, kar nan akamra!”

Godɨn Araziba 34:9

Bizir kabar gɨn, God fofozir avɨriba ko nɨghnɨzir aghuiba isa Nunɨn otarim Josua ganɨngi. Me bar fo, Moses faragha uan danganim iniasa anemɨsefe. Ezɨ gumazamiziba Josuan akam baragha, Akar Gavgavir Ikiavɨra Itir God Moses ganɨngizibar gɨn zui.

Aposel 10:38

Ia fo, God Nasaretɨn gumazim Iesus, uan Duam ko gavgavim a ganɨngi. Egha God a ko itima, ezɨ a nguibabagh arua gumazamizibar akurvasi. Egha Satanɨn apengan itir gumazamizibagh ami me ua dera.

Jon Osirizir Akar Aghuim 15:26

“Godɨn Duar Gavgavim ia Danɨngamim, an Afeziam ko iti. A guizbangɨra mɨgeir Duam, an Afeziam ko ikegh izam. A izɨva deravɨra nan araziba ko ingangaribar gun mɨkɨmam.

Akar Mogomem 1:4

Kɨ Jon, ia gumazamizir 7plan siosɨn Esian Provinsɨn itiba, kɨ ia bagha akar kam osiri. Godɨn datɨrɨghɨn ikia, fomɨra ikia, egh gɨn uamategh izamim, Godɨn kamra navir amɨrizim ia danɨngɨva, egh ian apangkuv. Eghtɨ 7plan duar aghuir Godɨn ingangarim gamua an atrivir dabirabimɨn guamɨn itiba, da uaghan ian apangkuvigh navir amɨrizim ia danɨng.

Ua Me Ini 28:3

Kɨ kamaghɨn ifonge, Aron, nan ofa gamir gumazimɨn otogh, nan ingangarim damuam. Kamaghɨn, nɨ gumazir kɨ korotiaba ko bizir igharazibar ingaramin fofozim me ganɨngizibar diagh me mɨkemeghtɨ, me Aron darugh nan ofa damuamin korotiamɨn ingarigh.

Onger Akaba 72:2

Eghtɨ a nɨn gumazamiziba ko gumazir onganarazibagh amiba, an arazir aghuimra me gativagh, guizɨn arazimɨn gɨn mangɨ men araziba tuisɨgham.

Aisaia 9:6

Bar guizbangɨra, otarir mam amebam e bagha a bate, a borir God e ganɨngizir mam. Eghtɨ an e gativagh en ganamin arazir kam, mati gumazim dɨpenir akɨnir dafam uan dɨpɨzim gatɨgha aneteri. Kar an ziaba, Gumazir Nɨghnɨzir Bar Aghuiba Anɨdim, ko Godɨn Gavgaviba Bar Itim, ko Afeziar Zurara Ikiavɨra Itim, ko Atrivir Dabirabir Aghuim ko Navir Amɨrizim Anɨdim.

Aisaia 28:6

Ikiavɨra Itir God uabɨ nɨghnɨzir aghuim isɨ kotiaba barazir gumazir aruabar anightɨ, me guizɨn arazimɨn gɨn mangɨ deraghvɨra kotiaba tuisɨgham. Eghtɨ a gavgavim isɨ nguibar ekiamɨn tiar akabar itir mɨdorozir gumazibar anɨngam, eghtɨ me apaniba ateghtɨ, me aven izɨ gumazamizibav soghan kogham.

Aisaia 32:15

Ikiavɨra Itir God uan Nguibamɨn ikia uan Duam, uam e bagh anemangam. Eghtɨ dughiar kamɨn, gumazamiziba puvatɨzir danganim, azenir bar aghuim otogham, eghtɨ bizir bar igharagha gariba a bativam. Eghtɨ azeniba, dagher avɨribar amutɨ da otivam, mati temeba pura ruarir pɨzimɨn aghui.

Sekaraia 4:6

Ezɨ ensel Ikiavɨra Itir Godɨn akam, gavmanɨn gumazir dapanim Serubabel danɨngasa, kamaghɨn na mɨgei, “Kar, Ikiavɨra Itir Godɨn Gavgaviba Bar Itimɨn akam: Nɨ ingangarim damusɨ, nɨ uan mɨdorozir gumazibar gavgavim ko, nɨ uan gavgavimɨn amodoghɨn bizibar amuam markɨ. Bar markɨ. Nan Duamɨn gavgavim nɨ ko ikɨtɨ, nɨ gavgavir kamɨn amodoghɨn ingangaribar amuam.

2 Samuel 23:3

Israelia en God, a mati dagɨar ekiar e modim, a kamaghɨn na mɨgei, “Atrivim Godɨn apengan ikɨva, guizɨn araziba ko Godɨn atiatim sara gumazamizibagh eghuv men gan.