Aisaia 10:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Egh afiragh mangɨ temer ekiaba ko nguazir aghuir azenibar ingaramim sara daboroghtɨ, da bar isigham. Ikiavɨra Itir God, Asiriabagh asɨghasigh, bar men duaba ko mɨkarziba agɨvagham, mati arɨmariam gumazim puv a gamizɨ, an gavgavim bar magɨrɨ ameregh gɨvagham.

Aisaia 10:18 ပူးပေါင်းရင်းမြစ်များ

2 Atriviba 19:23

Nɨ uan ingangarir gumazir dapanibav kemezɨ, me nɨn ziam fa nan ziamɨn tira. Ezɨ kɨ men akatoribar mɨgɨrɨgɨar kaba baraki. Kɨ fo, nɨ kamaghɨn mɨgɨa ghaze, nɨ uan karisɨn avɨriba inigha Lebanonɨn Mɨghsɨabar orazibar ghuavanaga, egha bar Lebanonɨn ruarir bar pɨzimɨn aven ghua, danganir gumaziba aven zuir puvatɨzimɨn, nɨ temer sidan bar ruariba ko temer painɨn bar aghuiba oke.

Jeremaia 21:14

Kɨ ian arazir kurar ia amiziba ikarvagh pazavɨra ia damigham. Kɨ avim damightɨ a Jerusalemɨn nguibar ekiamɨn otogham, mati avim ruarir arɨzimɨn dɨkavigha isi, egh avir kam atrivimɨn dɨpenimɨn isitɨ, Jerusalemɨn dɨpeniba uaghan bar moghɨra isigham. Kɨ Ikiavɨra Itir God, kɨ mɨkemegha gɨfa.”

Aisaia 9:18

Gumazamizibar arazir kurabara me gasɨghasɨsi. Mati avim benir ataghatariba ko ogher kurabar isia ghua, temer dafaribagh irɨgha ghua, ruarir ekiam girɨzɨ a isi. Ezɨ maburan mɨgharim dɨkavigha ghuavanadi.

2 Atriviba 19:28

Nɨn anɨngagharir akar nan itiba ko, nɨ uabɨra uabɨ feir arazim, kɨ bar dagh fo. Ezɨ kɨ datɨrɨghɨn akezim isɨ nɨn atinim darugh, egh ainɨn otevir me hosɨn akam gazuim, isɨ nɨn akam darugham. Egh nɨ amɨkɨrɨgh tuavir nɨ uan nguibamɨn ikegha izezim, uam an mangɨgham.’ ”

Aisaia 10:16

Ezɨ Ekiam, a Ikiavɨra Itir Godɨn Gavgaviba Bar Itim, a ziar ekiam ko gavgavir ekiam iti. Egh a datɨrɨghɨn arɨmariar bar kuratam amadaghtɨ, an Asiriabar mɨdorozir gumazibar amu, men gavgavir ekiam agɨvagham. Egh a uaghan avim damightɨ, a dɨkavigh isi mangɨ men biziba bar da agɨvagham.

Aisaia 32:19

Eghtɨ aisɨn amozim mar irɨ ruarir ekiamɨn itir temeba bar dagh asɨghasigh, egh uaghan nguibar ekiamɨn dɨpenibagh irɨtɨ, da bar nguazim giregham, eghtɨ ia Ekiamɨn gumazamiziba bar deravɨra ikiam. Egh ia uan dagher ovɨziba nguazir dɨpam iti naghɨn da oparam, egh ia uan bulmakauba ko donkiba ateghtɨ, da uan ifongiabar daru oghevsevibar amɨ ikiam.

Aisaia 37:24

Nɨ uan ingangarir gumazir dapanibav kemezɨ, me nɨn ziam fa nan ziamɨn tira. Ezɨ kɨ men akatoribar mɨgɨrɨgɨar kaba baraki. Kɨ fo, nɨ kamaghɨn mɨgɨa ghaze, nɨ uan karisɨn avɨriba inigha Lebanonɨn Mɨghsɨabar orazibar ghuavanega, egha bar Lebanonɨn ruarir bar pɨzimɨn aven ghua, danganir gumazamiziba aven zuir puvatɨzimɨn, nɨ temer sidan bar ruariba ko temer painɨn bar aghuiba oke.

Sekaraia 12:6

“Dughiar kamɨn kɨ Judan gumazir dapanibar amightɨ, me mati tuzim dafogha isi moghɨn, o mati witɨn azenir bar mɨsɨngizim dafogha isia mɨzariaba zui. Eghtɨ kantrin men boroghɨn itiba da bar gɨvagham. Eghtɨ Jerusalemɨn nguibar ekiamra, a itir danganimra ikɨvɨra ikiam.