Aisaia 1:23 - Godɨn Eghaghanim: Akar Gavgavir Dɨkɨrɨzir Ghurim ko Igiam

²³ O Jerusalem, nɨn gumazir dapaniba, me gumazir akaba batoziba, egha me uaghan okɨmakɨar gumazibar namakaba. Me zurara kotiabar dughiamɨn, me gumazir arazir kurabagh amibar amamangatɨzɨ, me uarir akurvaghasa me givizivigha, dagɨaba ko biziba me ganɨdi, ezɨ me men akurvasi. Egha me kotiaba barazir dughiamɨn, me borir ameboghfeziaba oveaghuezibar akurvazir puvatɨ, Egha me uaghan deragha kuariba arɨgha oragha, amizir paba oveaghuezibar osɨmtɨziba akɨrir puvatɨ.

Aisaia 1:23 ပူးပေါင်းရင်းမြစ်များ

Maika 7:3

Gumazamizir bar arazir kurabagh fogha dagh amiba, me zuraram arazir kurabagh ami. Gavmanɨn ingarir gumaziba ko, jasba kotɨn dughiamɨn, me gumazamizibar azangsɨzima, me moga dagɨabar me giveza me gakaghorima, me paza kotiaba barasi. Gumazir ziar ekiaba itiba pura uan ifongiabar jasbav geima, jasba guizɨn arazim ategha pura gumazir kurar kabar ifongiabar gɨn zui.

Sekaraia 7:10

Ia pazɨvɨra amizir paba ariaghirezibar amuan markɨ. Egh borir afeziba ariaghireziba ko, gumazamizir saghuiamɨn iza ia ko itiba ko, gumazamizir biziba puvatɨziba, ia pazɨ me damuan markɨ. Egh ia uaghan uan adarazi gasɨghasɨghan markɨ.

Ua Me Ini 23:8

Gumazitam ia apezeper kotiam gifarɨsɨva dagɨaba ia danɨngtɨ, ia dagɨar kaba inian markɨ. Guizbangɨra, arazir kam gumazir dapanibar damaziba apɨrizɨ me deravɨra nɨghnɨzir puvatɨ. Egha arazir kam uaghan gumazir aghuarir osɨmtɨziba puvatɨzibar kotiam gasɨghasɨsi.

Luk Osirizir Akar Aghuim 19:46

Egha kamaghɨn me mɨgei, “Godɨn Akɨnafarimɨn aven, osizirim kamaghɨn iti, ‘Nan Dɨpenim, God ko mɨgeir Dɨpenimra. Ezɨ ia a gamizɨ, an okɨmakɨar gumazibar mogomer danganimɨn mɨn oto.’ ”

Malakai 3:5

Egha Ikiavɨra Itir Godɨn Gavgaviba Bar Itim ghaze, “Kɨ izɨ ian araziba tuisɨgham. Kɨ bar zuamɨra kotɨn aven gumazamizir kabar arazir kurabar gun me mɨkɨmam. Gumazamizir kabar kara: imezibagh amir gumazamiziba ko, kukunir gumaziba ko, gumazamizir poroghamibagh asɨghasɨziba ko, gumazamizir kotɨn akabagh ifariba ko, gumazir dapanir deragha uan ingangarir gumaziba ivezir puvatɨziba ko, gumazir amizir odiaribagh ifara pura men biziba isiba ko, gumazamizir afeziaba ariaghirezir boribar biziba isiba ko, gumazamizir Kantrin Igharazibar Gumazamizir men tongɨn itibar akurvazir puvatɨziba. Gumazamizir arazir kaba bar dagh amiba me nan apengan itir puvatɨ.”

Aisaia 3:14

Egha Ikiavɨra Itir God uan gumazamizibar gumazir dapaniba ko gumazir aruaba ko kotiam gamua kamaghɨn me mɨgei, “Nan gumazamiziba mati, nan wainɨn azenim, ezɨ iarara azenir kam gasɨghasigha, an itir biziba bar da okeme. Ia gumazamizir biziba otevezibar apangkuvir puvatɨ. Bar puvatɨ. Men bizir muziariba, ia me da da isava uan dɨpenibar da pozibav kɨri.

Mak Osirizir Akar Aghuim 11:17

Egha a men sure gamuava kamaghɨn me mɨgei, “Mɨgɨrɨgɨar kam Godɨn Akɨnafarimɨn osizirimɨn iti, o puvatɨ? “ ‘Nan Dɨpenimɨn ingangarimɨn mɨngarim kamakɨn, kar Nguaziba Bar Men Gumazamiziba God ko Mɨgeir Dɨpenim.’ “Ezɨ ia a gamizɨ, an okɨmakɨar gumazibar mogomer danganimɨn mɨn oto!”

Matyu 21:13

Egha kamaghɨn me mɨgei, “Godɨn Akɨnafarimɨn aven, osizirim kamaghɨn iti, ‘Nan Dɨpenim, God ko mɨgeir Dɨpenimra. Ezɨ ia a gamizɨ, an okɨmakɨar gumazibar mogomer danganimɨn mɨn oto!’ ”

Maika 3:11

Ezɨ Jerusalemɨn gumazir dapaniba kotɨn dughiamɨn, gumazamizibar amamangatɨzɨ, me modogha dagɨaba me givezegha me gakaghorima, me paza kotiaba tuisɨsi. Ezɨ ofa gamir gumaziba, gumazibar amamangatɨghtɨ me dagɨaba me danɨngtɨ, me Godɨn Akar Gavgavibar mɨngariba abɨgh me mɨkɨmam. Ezɨ akam inigha izir gumaziba uaghan ghaze, me dagɨaba inighɨva, akar mogomebar mɨngariba deragh da abɨgham. Jerusalemɨn gumazir ekiar kaba bar, me kamaghɨn amua ghaze, “Ikiavɨra Itir God e ko iti. Ezɨ bizitam e gasɨghasighan kogham.”

Hosea 9:15

Egha Ikiavɨra Itir God ua kamaghɨn mɨgei: “Efraimia fomɨra Gilgalɨn ikia egha faraghavɨra arazir kurar kabagh ami. Ezɨ dughiar kamra, kɨ uaghan men anɨngagha men atari. Gumazamiziba arazir kurar avɨrim gamima, men gumazir dapaniba uaghan nan akaba batosi. Kamaghɨn amizɨ, kɨ uan dɨpenimɨn me batuegham. Egh ua me gifueghan kogham.

Hosea 4:18

Men gumazir aruaba aghumsɨzir arazim bar a gifonge. Kamaghɨn amizɨ, me wainɨn avɨriba apava ongani, egha gɨn me poroghamiba uari bakeir arazim tintinimɨn a gami.

Jeremaia 22:17

Ezɨ nɨ uabɨra uabɨ gɨnɨghnɨgha, egha zurara bizir igharagha gariba iniasa puv a dagh ifuegha, ifavarir arazim gamuava bizir kaba isi. Egha nɨ pura gumazir arazir kurabagh amir puvatɨzibav sozi me ariaghiri. Egha nɨ gumazamiziba dɨkabɨra paza me gami.”

Jeremaia 5:5

Kamaghɨn amizɨ, kɨ mangɨ gumazir dapanibar gan, me ko mɨkɨmam. Me ti Ikiavɨra Itir God, men God, a me damuasa ifongezir arazibagh fo. Ezɨ kɨ fo, gumazir dapanir kaba uaghan Ikiavɨra Itir Godɨn akaba batuegha, an ifongiamɨn gɨn mangan aghua.

Aisaia 33:15

Gumazamizir kabanang Ikiavɨra Itir God ko ikiam: Gumazamizir arazir aghuibagh amiba, ko gumazamizir guizbangɨra mɨgeiba, ko gumazamizir ua baghavɨra biziba iniasa igharaz darazi dɨkabɨrir puvatɨziba, ko gumazamizir gumaziba apezeperir dagɨaba isɨ me danɨngtɨ, me a bagh arazir kuram damuamin aghuaziba, ko gumazamizir gumazir mam gumazir igharazitam mɨsueghtɨ an aremeghan me oraghan aghuaziba, ko gumazamizir arazir kurabar ganan aghuaziba.

Aghuzir Akaba 29:24

Gumazim okɨmakɨar gumazimɨn akuragha, a uabɨ uabɨn apanim gami. Egh aning amizir arazir kam aghurighɨrɨghtɨ, me a isɨ kotiam datɨgham. A kotɨn aven akam modoghtɨ, God a gasɨghasigham.

Aghuzir Akaba 17:23

Gumazir arazir kuram gamim kotɨn iti, gumazamiziba kotiam gasɨghasɨghasa anepezepera dagɨaba moga a ganɨdi, eghtɨ a bar akuegh dagɨar kaba inigh egh kotiam gasɨghasɨgham.

2 Eghaghaniba 36:14

Ezɨ ofa gamir gumazibar dapaniba ko, gumazamiziba bar moghɨra akɨrim ragha Ikiavɨra Itir God gasaragha, kantrin igharazibar arazir bar kurar God bar aghuazibagh amua ghuavɨra iti. Me kamaghɨn amua, Ikiavɨra Itir Godɨn Dɨpenir Jerusalemɨn itir a ua baghavɨra inabazim gamima, an an damazimɨn mɨze.

Godɨn Araziba 16:19

E fo, dagɨar gumaziba jasba apezepera me ganɨdiba, da gumazir nɨghnɨzir aghuiba itibagh ami, me damazir okavɨrɨzibar mɨn iti. Egha arazir kam uaghan gumazir aghuarir osɨmtɨziba puvatɨzibar kotiam gasɨghasɨsi. Kamaghɨn amizɨ, gumazitam me apezeper kotiam gifarɨsɨ, dagɨaba me danɨngtɨ, me dagɨar kaba inian markɨ. Me guizɨn arazim gɨghan markɨ. Me kotiamɨn aven pazɨ gumazitamɨn akurvaghɨva, igharazitav dɨkabɨnan kogham. Me guizɨn arazimɨn gɨn mangɨ gumazamiziba bar me tuisɨgham.

Luk Osirizir Akar Aghuim 24:27

Egha Iesus aning geghari. A faragha Moses osirizir akabav gɨa, ghua, Godɨn akam inigha izir gumazibar akaba bar aning mɨgei. A Godɨn Akɨnafarimɨn itir akar an gun mɨkemeziba, dar mɨngariba bar aningɨn sure gami.

Jems 1:27

Guizbangɨn nɨghnɨzir gavgavir God Afeziamɨn damazimɨn deragha osɨmtɨziba puvatɨzim, a kamakɨn: E borir ameboghfeziaba ovengezibar akurvaghɨva, amizir odiarir men paba ovengeziba sarama akurvagh, men osɨmtɨziba ateram. Ezɨ uaghan bizir mam, e uari uan daroriba deravɨra dar ganam, eghtɨ nguazir kamɨn araziba e damutɨ e Godɨn damazimɨn mɨzeghan kogham.

Aisaia 1:22

Nɨ fomɨra silvan aghuimɨn mɨn gari, egha nɨ datɨrɨghɨn mati kapa akuaghiregha gɨfa. Nɨ fomɨra mati wain, a bar sɨngi, egha nɨ datɨrɨghɨn, mati wain me dɨpam sara a iverezɨ a isɨngtɨziba puvatɨ.

Aisaia 5:23

Iavzika! Ia kotɨn aven akaba tuisɨghamin dughiamɨn, gumazir arazir kurabagh amiba uan osɨmtɨziba akɨrasa, ia apezepera dagɨaba ia ganɨdima, ia me ataghɨrazima me zui. Egha ia gumazir osɨmtɨziba puvatɨzibar akaba deragha da tuisɨzir puvatɨ.

Aisaia 30:1

Ikiavɨra Itir God kamaghɨn mɨgei, “Judan adarasi, me nan boriba me bar ikuvigham, me bar orazir puvatɨzir darazi. Me nan nɨghnɨzimɨn gɨntɨzir puvatɨ. Me uan nɨghnɨzibar gɨntɨgha ghua kantrin igharazim ko roroam gami. Egha tuavir kamɨn, me arazir kurar bar avɨrim, uan arazir kurar faragha amizibagh siriabagh arɨsi. Mevzika. Kamaghɨn amizɨ, me bar ikuvigham.

Aisaia 65:2

Kɨ zurara dughiabar gumazamizir nan akaba batoziba ua me iniasa me baghavɨra ikia uan dafarim amadagha men azangsɨghavɨra iti. Kar gumazamizir uan arazir kurabar tuavibar gɨn mangasa bar ifongeziba. Me uan ifongiabar gɨntɨsi.

Jeremaia 4:17

Kɨ Ikiavɨra Itir God, kɨ kamaghɨn mɨgɨa ghaze, Ia Jerusalemia nan akam batoke. Kamaghɨn, apaniba Jerusalem avɨnigham, mati gumaziba dagher azenim dɨvazimɨn mɨn an okari.

Jeremaia 32:32

Israelia ko Judaba na damutɨ kɨ bar men anɨngaghɨvɨra ikiasa, me arazir kurar igharagha garibagh amuavɨra iti. Gumazamizir kɨniba ko, atriviba ko, gumazir dapaniba ko, ofa gamir gumaziba ko, akam inigha izir gumaziba ko, Judan gumazamiziba ko, Jerusalemɨn itir gumazamiziba, me bar moghɨra arazir kurabagh ami.

Esekiel 12:2

“O nguazir kamɨn gumazim, ikɨzir nɨ datɨrɨghɨn men tongɨn itir kam, me akaba batozir darasi. Me damaziba ikia gari puvatɨ. Egha me kuariba ikia biziba barazir puvatɨ. Me akaba batogha orazir puvatɨzir ikɨzim.

Hosea 5:10

Ikiavɨra Itir God kamaghɨn mɨgei: “Ia oragh. Judan gumazir dapaniba, mati gumaziba gumazir igharazimɨn nguazir otevim okɨmasa nguazir mɨtaghniabagh sɨvaghsɨvasi. Kɨ men arazir kurar kam bangɨn men anɨngaghegh me gasɨghasigham, mati aperiam otogha bizibagh asɨghasɨsi.

Amos 5:12

Ia amir arazir kuraba, kɨ bar dagh fo. Kɨ fo ia osɨmtɨzir bar avɨribagh ami. Ia gumazamizir aghuiba paza me gami. Gumazir kuraba ia apezepera moga dagɨaba ia ganɨdima, ia dagɨaba isa, gumazir onganarazibagh amibar, kotiabar me gifara me abɨri.

Maika 3:9

Ia Jekopɨn ovavir boribar gumazir dapaniba deragh na baragh, ia guizɨn arazibar aghua. Ia Israelian gumazir aruaba, ia arazir aghuibagh irazɨ, da ghua arazir kurabar mɨn otifi.

Maika 6:12

Ezɨ nguibar ekiamɨn itir gumazir dagɨar avɨriba itiba, me onganarazibagh amir gumazamizibagh ifara men biziba pura dagh ekua, egha paza me gami. Nguibar ekiar kamɨn gumazamiziba, me bar ifavarir gumazamizibara.

Dɨboboniba 22:7

Ezɨ Moapia ko Midianian gumazir dapanir kaba dɨkavigha, Balam Israelia gasɨghasɨghamin akavsiabagh ivezasa ivezim sara inigha ghua Balam mɨgei.

1 Samuel 8:3

Egha aning uan afeziamɨn arazibar gɨn zuir puvatɨ. Puvatɨ. Aning dagɨaba iniasa bar kufi, egha aning gumazir mabar amamangatɨzɨ, me uari bagha nɨghnɨgha dagɨaba isa aning ganɨdima, aning men kotiabar ghuangsɨgha deragha dar kɨrir puvatɨ.

Aisaia 1:17

Ia arazir aghuim ko, guizɨn arazimɨn fofozim inigh. Egh arazir aghuir kam bagh ingar bar gavgavigh ikɨ. Egh gumazir igharaz darazi dɨkabɨriba, men arazir kuram akɨrighɨva nɨghnɨzir aghuiba me danɨng. Egh ia borir ameboghfeziaba oveaghueziba ko, amizir paba oveaghueziba, deravɨra me damu. Egh uaghan gumazamiziba pazɨ me damutɨ, ia men akurvagh.

Aisaia 1:18

“Ia oragh. Kɨ Ikiavɨra Itir God, kɨ ia mɨgɨa ghaze, Ia izɨ, e uari akuvagh deraghvɨra nɨghnɨgh akam akɨrigham. Kɨ garima, ia arazir kurar avɨriba iti, egha ia mati nir ghurghurim, me nguazir aghevim a gasɨghasigha gɨvazɨ moghɨn iti. Eghtɨ kɨ ia zuegh ia damutɨ, ia ua buruvir ovɨzimɨn mɨn bar ghurghurigham. Guizbangɨra, ian arazir kuraba, mati ter ovɨzir aghevir ighiabagh amimɨn mɨn gari. Eghtɨ kɨ ian arazir kuraba gɨn amadaghtɨ, ia arinir ghurghurimɨn mɨn bar ghurghurigham.

Aisaia 28:14

Ia gumazir aruar Jerusalemɨn itir gumazamizibar gariba, ia deraghvɨra Ikiavɨra Itir Godɨn akam baragh. Ia na dɨpova ghaze, nan akam a pura bizim.

Jeremaia 5:6

Gumazamizir kaba arazir kurar avɨribagh amua, egha dughiar avɨribar Ikiavɨra Itir God, akɨrim ragha a gasara. Bizir kam bagh, men apaniba, laionɨn ruarir ghuribar itiba azenan izɨ me mɨsoghtɨ me arɨmɨghiram. Apanir kaba, afiar atiar danganir kɨnibar itibar mɨn izɨ me gasɨghasɨgham. Apanir kaba, kaziar atiar ekiabar mɨn izɨ, Judan nguibar ekiabar boroghɨn mongegh ikɨ ganam, eghtɨ gumazim o amizitam nguibam ategh azenan izɨtɨ, apaniba kaziar ekiar kabar mɨn uari fɨ me mɨkɨn, men mɨkarziba abɨghɨrarigham.”

Esekiel 22:27

“Ian gumazir aruaba, mati afiar atiaba asɨzim mɨsuegha uarir tongɨn an kuam getuima, a dɨghoraghire. Me bizir avɨriba ikiasa gumazibav suagharɨgha, egha ifara pura men biziba isi.