2 Samuel 7:24 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁴ O Ikiavɨra Itir God, nɨ Israelia e gamizɨ, e zurara kamaghɨra nɨn gumazamizibar ikiam. Eghtɨ nɨ uabɨ en Godɨn ikiam.

2 Samuel 7:24 ပူးပေါင်းရင်းမြစ်များ

Godɨn Araziba 26:18

Ezɨ, datɨrɨghɨn Ikiavɨra Itir God, akam akɨrigha ghaze, a ia inizɨ ia bar an gumazamizibara, ezɨ a ia mɨkemezɨ moghɨn bar ia gifonge. Egha a uan Akar Gavgavibar gɨn mangasa ia mɨkeme.

1 Pita 2:10

Ia fomɨra pura gumazamizir kɨnibar mɨn iti, egha datɨrɨghɨn ia Godɨn gumazamiziba. Ia fomɨra Godɨn apangkuvim inizir puvatɨ, egha ia datɨrɨghɨn an apangkuvim inigha gɨfa.

Jon Osirizir Akar Aghuim 1:12

Ezɨ gumazamizir maba a ini, egha nɨghnɨzir gavgavim an ziamɨn iti. Kamaghɨn amizɨ, a me gamizɨma me Godɨn boribar mɨn otifi.

Jeremaia 31:33

Kɨ Ikiavɨra Itir God, kɨ kamaghɨn ia mɨgei, Gɨn izamin dughiam otoghtɨ, kɨ Israel ko Akar Dɨkɨrɨzir Gavgavim damightɨ, a kamaghɨn mangam: Kɨ uan araziba men nɨghnɨzibar arɨgh, egh da isɨva men navir averiabar da osiram. Egh kɨ men Godɨn ikɨtɨma me nan gumazamizibar ikiam.

Aisaia 12:2

“Ia oragh! God nan akuragha ua na ini. Eghtɨ kɨ nɨghnɨzir gavgavim an ikɨva atiatingan kogham. Ikiavɨra Itir God, a Godra, a na gamima, kɨ gavgavigha iti. Guizbangɨra, a nan Akurvazir Gumazim, ezɨ kɨ an ziam fava onger akam gami.”

Onger Akaba 48:14

Ia kamagh me mɨkɨm suam, “Godɨn kam a en God, a zurara ikia kamaghɨra iti. Egh a zurara en faragh mangɨ tuavim en akakagham.”

Jenesis 17:7

Egh kɨ nɨ ko nɨn ovavir borir gɨn otivamiba ko Akar Dɨkɨrɨzir Gavgavim akɨram. Eghtɨ Akar Dɨkɨrɨzir Gavgavir kam gavgavigh mamaghɨra ikiam. Akar Dɨkɨrɨzir Gavgavir kam kamakɨn, kɨ nɨn God, egha nɨn ovavir boriba uaghan, kɨ men God.

Sekaraia 13:9

Eghtɨ ikɨzir itir kam, a nan damazimɨn zueghsɨ, kɨ a damu ganigham, mati me silvaba ko, golɨn mɨneziba batueghasa, avimɨn da tuema da isi. Eghtɨ me na ko mɨkɨmtɨ, kɨ men mɨgɨrɨgɨaba baragham. Egh kɨ kamaghɨn me mɨkɨm suam, ‘Ia nan gumazamiziba.’ Eghtɨ me kamaghɨn na mɨkɨmam, ‘Nɨ Ikiavɨra Itir God nɨ en God.’ ”

Hosea 1:10

Israelia ua bar avɨrasemegham, mati ongarir dadarimɨn gigim, eghtɨ me me mengan iburagham. Datɨrɨghɨn God kamaghɨn me mɨgei, “Ia nan gumazamiziba puvatɨ.” Egh gɨn dughiatam izɨtɨ, a kamaghɨn me mɨkɨm suam, “Ia Godɨn Zurazurara Angamɨra Itimɨn boriba.”

Jeremaia 32:38

Egh me nan gumazamizibar ikɨtɨ, kɨ men Godɨn ikiam.

Jeremaia 31:1

Ikiavɨra Itir God kamaghɨn mɨgei: “Dughiar kɨ inabazimɨn, kɨ Israelian ikɨziba bar men Godɨn ikiam, eghtɨ me nan gumazamizibaram otogham.

1 Eghaghaniba 17:22

O Ikiavɨra Itir God, nɨ Israelia e gamizɨ, e zurara kamaghɨra nɨn gumazamizibar ikiam. Eghtɨ nɨ uabɨ en Godɨn ikiam.

2 Samuel 7:23

E Israelia Isipɨn kalabusɨn itima nɨ uam e ini, egha nɨ e gamizɨ e nɨn gumazamizibar otifi. Kamaghɨn amizɨ, nguazir kamɨn gumazamizir igharaziba me, e nɨn gumazamizibar mɨn garir puvatɨ. E nɨn gumazamiziba kantrin kamɨn otogha itima, nɨ bizir aghuiba ko bizir ekiar avɨribar en akura. Nɨ gumazamizir igharaziba batuegha men asebagh asɨghasɨghizɨ, e iza men nguazim ini. Kamaghɨn amizɨ kantriba bar dar gumazamiziba ziar ekiam nɨ ganɨdi.

Godɨn Araziba 27:9

Egha Moses Livain anabamɨn ofa gamir gumaziba ko tuivighav ikia, kamaghɨn Israelia mɨgei, “O Israelia! Ia aghumra ikɨ deraghvɨra nan akam baragh. Ia datɨrɨghɨn Ikiavɨra Itir God, ian Godɨn gumazamizibar otivigha gɨfa.

Ua Me Ini 15:2

Ikiavɨra Itir God uabɨ na gamizɨma, kɨ gavgavigha, onger akam bangava an ziam fe. A zurara ua na isi, ezɨ kɨ an ziam fasa. A nan God, egha nan akurvazim. Kamaghɨn amizɨ, kɨ an ziar ekiam fasa. Nan afeziamɨn God, kɨ an ziar ekiam fɨ, a isɨ bar pɨn anerɨgh ighiam damuam.

Ua Me Ini 6:7

Egh kɨ ia damightɨ ia nan gumazamizibar ikɨtɨ, kɨ ian Godɨn mɨn ikiam. Egh kɨ gɨn ia damightɨ ia Isipian ingangarir arazimɨn fɨrighɨregh, dughiar kamɨn ia fogh suam, kɨ Ikiavɨra Itir God, ian God.

Jenesis 17:8

Ezɨ Kenanɨn nguazir nɨ datɨrɨghɨn puram aperaghav itir kam, kar igharaz darazir nguazim. Eghtɨ kɨ nɨ ko nɨn ovavir borir gɨn otivamiba, kɨ Kenanɨn nguaziba bar da isɨ, ia danɨngam. Eghtɨ nguazir kam, a ian nguazimɨn ikɨ mamaghɨra ikiam. Eghtɨ kɨ nɨn ovavir boribar Godɨn ikiam.”

Godɨn Araziba 32:6

Ia bar onganigha fofozitam tong ian dapanibar itir puvatɨ. Ikiavɨra Itir God, a ian afeziam. A ian ingarizɨ ia otivigha datɨrɨghɨn ikɨzir mamɨn mɨn oto. Ezɨ kar ti ia an arazir aghuiba ikarvaghasa, arazir kurar kamɨn a gami.

2 Samuel 7:25

“O Ikiavɨra Itir Godɨn Gavgavim, nɨ uan ingangarir gumazim, ko an adarazi bagha amizir akar dɨkɨrɨzir kam, kɨ kamaghsua, nɨ a damightɨ a zurara kamaghɨra ikɨ.