1 Samuel 3:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ezɨ otarir igiam Samuel, a Elin apengan ikia, Ikiavɨra Itir Godɨn ingangarim gami. Azenir avɨriba ghuezɨma, Ikiavɨra Itir God mɨgɨrɨgɨar avɨriba Israelia ganɨngizir puvatɨ. Dughiar vabara a irebamɨn mɨn garir bizibar aven a me mɨgei.

1 Samuel 3:1 ပူးပေါင်းရင်းမြစ်များ

Onger Akaba 74:9

E gan fofoghamin arazarazitaba bar itir puvatɨ. Da bar moghɨra ghuegha gɨfa. Ezɨ Godɨn akam inigha izir gumazitam uam e ko itir puvatɨ. Osɨmtɨzir kam gɨvamin dughiam, en tav bar a gɨfozir puvatɨ.

1 Samuel 3:21

Egha Ikiavɨra Itir God, zurara Silon nguibamɨn Samuel bativa uan akaba isa a ganɨdi.

1 Samuel 2:11

Hana Ikiavɨra Itir God ko mɨkemegha gɨvagha, Elkana ko ua Raman nguibamɨn ghu. Ezɨ an otarir dozim Samuel, a Silon ikia ofa gamir gumazim Elin apengan ikia, an akurvagha Ikiavɨra Itir Godɨn ingangarim gami.

1 Samuel 2:18

Dughiar kamɨn Samuel uan mugamra ikia ofa gamir gumazimɨn inir ghurghurir aghuim ikegha, Ikiavɨra Itir Godɨn ingangarir kam gami.

Aisaia 13:12

Gumazamizir bar avɨrim arɨghiregham, eghtɨ kɨ vaghvaziba ateghtɨ, me ikiam. Egh nɨ kantri Ofirɨn golɨn bar aghuim burian asaghasaghizɨ moghɨn, nɨ me burian asaghasegham.

1 Samuel 3:15

Ezɨ Samuel akar kam baregha uan mɨsiamɨn akua ghua amɨnim tira. Egha a ghua Ikiavɨra Itir Godɨn Purirpenimɨn tiar akam kui. Egha Samuel uan irebamɨn mɨn garir bizimɨn gun, Elin mɨkɨman atiatingi.

1 Samuel 2:35

Egh kɨ ua bagh ofa gamir gumazitam amɨseveghtɨ, a navim nan ikɨva, ingangarir kɨ ifongezibara damuam. Egh kɨ an ikɨzim damutɨ, me zurara nan ofabar amuamin adarazir otivam, eghtɨ me kɨ mɨsevezir atrivim bagh ingaram.

1 Samuel 2:36

Eghtɨ nɨn ikɨzimɨn gumazitaba ikɨvɨra ikɨva, me ofa gamir gumazir kam bagh mangɨva dagheba ko silvan dagɨaba bagh an azangsɨgham. Egh me kamaghɨn ofa gamir gumazimɨn azangam, ‘Nɨ en amamangatɨghtɨma, e ofa gamir gumazimɨn ingangarir tabara amigh, egh e dagher muziarir taba iniam.’ ”

Aghuzir Akaba 29:18

Ikiavɨra Itir God, akam gumazamizibagh anɨngizir puvatɨzɨ, me tintinibar arazir igharazir avɨrim gamighai. Ezɨ gumazir Godɨn Akar Gavgavibar gɨn zuim, a bar akongegham.

Esekiel 7:26

Eghtɨ osɨmtɨzir ekiaba uari tɨvaghtɨvagh me bagh izam, eghtɨ bizir kurar otivir avɨribar akaba uari tɨvaghtɨvagh me bagh izɨtɨ, me da baragham. Egh bar atiatingɨva nan nɨghnɨzibagh fofoghsɨ, akam inigha izir gumazibar azangsɨghtɨ, kɨ akaba me danɨngan kogham. Eghtɨ ofa gamir gumaziba men sure damuamin akaba puvatɨghtɨ, men gumazir dapaniba me danɨngamin nɨghnɨzir aghuiba puvatɨgham.