1 Samuel 25:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Ia kamaghɨn a mɨkɨm, ‘Devit ghaze, O nan namakam, kɨ kamaghɨn Godɨn azai, a nɨ ko nɨn ikɨzim ko nɨn biziba bar, navir amɨrizim ko dabirabir aghuim isɨ ia danɨngam.

1 Samuel 25:6 ပူးပေါင်းရင်းမြစ်များ

1 Eghaghaniba 12:18

Ezɨ men mav, Amasai, Godɨn Duam a gapazazɨma, a kamaghɨn Devit mɨgei, “O Jesin otarim Devit, e nɨ ko ikiasa. E nɨn adarazir ikiasa. Bar guizbangɨra, nɨn God nɨn akurvasi. Kamaghɨn amizɨ, nɨ ko nɨn akurvazir gumaziba, deravɨra ikɨ navir amɨrizim ko dabirabir aghuim ikiam.” Ezɨ, Devit me inigha uan mɨdorozir gumazibar garir gumazir dapanibar me arɨki. Ezɨ Amasai gɨn Devitɨn 30plan mɨdorozir gumazir gavgavibar gumazir dapanimɨn oto.

Luk Osirizir Akar Aghuim 10:5

“Egh ia dɨpenitamɨn aven mangɨ egh faragh kamaghɨn mɨkɨm suam, navir amɨrizim ia ko iti.

1 Timoti 5:6

Ezɨ amizir odiarir uan mɨkarzim isa pura tintinimɨn bizir igharazibagh amim, an angamɨra ikiava, navir averiamɨn aven, a mati aremegha gɨfa.

Onger Akaba 122:7

Gumazamizir Jerusalemɨn dɨvazimɨn aven itiba deragh ikɨva, ua mɨdorozim damuan kogham.

2 Tesalonika 3:16

Ekiam a navir amɨrizimɨn mɨngarim, a zurara ia damutɨ ia navir amɨrizimɨn biziba bar dar ikiam. Ekiam bar moghɨra ia ko ikiam.

Jon Osirizir Akar Aghuim 14:27

“Kɨ ia ataghɨraghasa, egha kɨ navir amɨrizim ia ganɨdi. Ezɨ nan navir amɨrizir kɨ ia ganɨdim, a nguazimɨn gumazamiziba anɨdi moghɨn puvatɨ. Kamaghɨn amizɨma, ia nɨghnɨzir avɨribar amuva egh osɨman markɨ, egh atiatingan markɨ.

1 Tesalonika 3:8

E kamaghɨn fo, ia Ekiam bagha tugha gavgavizɨma, e kagh uaghan, en dabirabim datɨrɨghɨn bar dera.

2 Samuel 18:28

Ezɨ Ahimas roghɨra iza kamaghɨn atrivimɨn diagha ghaze, “E deraghavɨra iti.” Egha an atrivimɨn boroghɨn izava, nguazim girɨgha fuagha, uan guam nguazim mɨtuagha ghaze, “Atrivim, nɨ nan ekiam, e Ikiavɨra Itir Godɨn ziam fam, a nɨn God. Gumazir nɨ batogha nɨ ko mɨsoziba, a me isa en dafarim gatɨzɨ e me abɨni.”

1 Samuel 25:5

Ezɨ a gumazir 10plan igiaba amadazɨma, me Nabal bagha Karmelɨn zui. A kamaghɨn me mɨgei, “Ia Karmelɨn mangɨ nan ziamɨn dughiar aghuim isɨ Nabal danɨngigh.

Onger Akaba 122:8

Kɨ uan adarazi ko, uan namakabagh nɨghnɨgha, kamaghɨn Jerusalem mɨgɨa ghaze, “Nɨ amɨragh nɨmɨra ikɨtɨ mɨdoroziba nɨn aven otivan markɨ.”

Jenesis 43:23

Ezɨ ingangarir gumazim men akam baregha kamaghɨn me mɨgei, “Ia atiating nɨghnɨzir avɨribar amuan markɨ. Ian God, a uaghan ian afeziamɨn God, a uabɨ ian dagɨaba isa ian mɨtaribagh aghui. Ezɨ kɨ uabɨ, dagɨar ia daghebagh ivezeziba, kɨ da inigha gɨfa.” Egha a ghua Simeon inigha iza me ganɨngi.