1 Samuel 10:26 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁶ Ezɨ Sol uaghan uan nguibam Gibean ghu. Ezɨ mɨdorozir gumazir gavgavir maba, God men navibagh irazɨ, me uaghan Solɨn gɨn ghue.

1 Samuel 10:26 ပူးပေါင်းရင်းမြစ်များ

1 Samuel 11:4

Ezɨ akam inigha zuir gumaziba ghua Gibean nguibar ekiamɨn oto, kar Solɨn nguibar ekiar a itim. Egha me, me gegharima, gumazamiziba bar puvɨrama azi.

1 Samuel 15:34

Egha Samuel gɨn uamategha Raman nguibar ekiamɨn ghuzɨma, Atrivim Sol Gibean ua dɨpenimɨn ghu.

Josua 18:28

Sela, Haelep, Jebus, an ziar igharazim Jerusalem, Gibea, ko Kiriat Jearim. Distrighɨn kam 14plan nguibar ekiaba an iti, ezɨ nguibar dozir maba dar boroghɨn iti. Nguazir kam, Benjaminɨn anabamɨn adarazi a ini.

Aposel 13:48

Ezɨ Kantrin Igharazibar Gumazamiziba, me akar kam baregha, bar akuegha ghaze, akar kam bar dera. Ezɨ gumazamizir God ikɨrɨmɨrir aghuir zurara ikiam bagha mɨseveziba, me bar nɨghnɨzir gavgavim an iti.

Onger Akaba 110:3

Nɨ uan apanibav soghamin dughiam, nɨn gumazamiziba uaghan nɨ ko mangɨ nɨn akurvagham, egh ia Godɨn mɨghsɨamɨn ghuavanangam. E gari ghuariabar amariba dɨmagaribar ira azenibagh iri da aghua dagher avɨriba iti. Kamaghɨra, nɨ dughiabar zurara gavgavim ini mamaghɨra ikɨ, egh gumazir igiamɨn mɨn otogham.

2 Samuel 21:6

E fo, Ikiavɨra Itir God atrivimɨn ikiasa Sol amɨsefe. Solɨn nguibam Gibea. Kamaghɨn amizɨ, e kamaghɨn nɨn azai, Nɨ Solɨn ikɨzimɨn gumazir 7plan e danɨngigh. Eghtɨ e Ikiavɨra Itir Godɨn damazimɨn me guightɨ, me arɨmɨghiregham.” Ezɨ Devit me mɨgɨa ghaze, “A dera, kɨ me isɨ ia danɨngam.”

Gumazir Dapaniba 20:14

Egha Benjamin anabamɨn adarazi bar moghɨra uan nguibar ekiaba ategha iza Gibean uari akufa, egha Israelia ko mɨsoghasa.

Esra 1:5

Ezɨ Judan anabam ko Benjaminɨn anabamɨn adarazir gumazir dapaniba, ko ofa gamir gumaziba ko Livain anabamɨn adarasi, me gumazamizir God men duaba fezɨ me uamategh Jerusalemɨn mangasa ifongeziba, bar dɨkavigha, Ikiavɨra Itir Godɨn Dɨpenim uam an ingarsɨ mangasava ami.

1 Samuel 13:2

Dughiar kamɨn Sol ua bagha 3,000pla Israelian mɨdorozir gumaziba amɨsevegha, igharaziba amadazɨma me ua nguibabar ghue. A mɨdorozir gumazir kabar tongɨn, 2,000pla inizɨ, me a ko Mikmasɨn nguibar ekiamɨn iti, a Betelɨn nguibamɨn boroghɨn mɨghsɨar dozibar iti. Egha a uaghan mɨdorozir gumazir 1,000pla amadazɨ, me an otarim Jonatan ko, me Benjaminɨn anabamɨn nguazimɨn aven, Gibean nguibar ekiamɨn iti.

Aisaia 10:29

Me uaghira daghurir dɨpamɨn faghafiagha, bɨnigha ghuanaga, dɨmangan Geban nguibar ekiamɨn akui. Raman nguibar ekiamɨn itir gumazamiziba bar atiatingi. Ezɨ, Gibean nguibar ekiamɨn itir gumazamiziba, kar Atrivim Solɨn nguibar ekiam, me anetegha are.