1 Korin 10:22 - Godɨn Eghaghanim: Akar Gavgavir Dɨkɨrɨzir Ghurim ko Igiam

²² E ti Ekiam damightɨ, an navim ikuvigham o? En gavgavim ekevegha, Ekiamɨn gavgavim gafiras? Bar puvatɨ!

Godɨn Akar Aghuim; Akar Dɨkɨrɨzir Gavgavir Igiam

²² E ti Ekiam damightɨ, an navim ikuvigham? O, e ti ghaze, en gavgavim ekevegha, Ekiamɨn gavgavim gafiras? Bar puvatɨ!

1 Korin 10:22 ပူးပေါင်းရင်းမြစ်များ

Godɨn Araziba 32:21

Me asebar gɨn ghua dar ziaba fava na gamizɨ, nan navim bar ikuvigha men anɨngaghegha men atari. Aser me ziaba fer kaba, da pura godɨn ifavariba, da guizɨn godba puvatɨ. Kamaghɨn, kɨ ikɨzir pura bizibar mɨn ikia bar onganizim, kɨ me isɨ Israelia bagh me ameghtɨ, Israelian naviba bar ikuvigham. Kɨ gumazamizir fofoziba puvatɨziba inightɨma, bizir kam me damightɨ me ataram.

Godɨn Araziba 32:16

Me ikɨzir igharazibar asebar ziaba fema, men arazir kam, Ikiavɨra Itir God bar men aghuagha navim bar men ikufi. Egha men arazir kam bangɨn a bar men anɨngaghegha men atari.

Hibru 10:31

Kamaghɨn, Godɨn ikia mamaghɨra itim, a tavɨn suiragh ivezir kuram a danɨngam, eghtɨ gumazir kam guizbangɨram atiatingam.

Esekiel 22:14

Dughiar kɨ pazavɨra ia damuamin kamɨn, ia uan navir averiabar aven osɨmtɨzir kam aterɨva puvɨra atiatingam. Kɨ Ikiavɨra Itir God, kɨ mɨkemezɨ moghɨn, kɨ damuam.

Fofozir Gumazim 6:10

Bizir otivir kaba, da puram otivir puvatɨ. Bar fomɨra God da otivasa mɨkemezɨ, da datɨrɨghɨn otivaghiri. Egha God en arazibagh fogha gɨfa. Kamaghɨn e a ko uari batoghan kogham. Guizbangɨra, an gavgavim en gavgavim gafira.

Sefanaia 1:18

Dughiar kamɨn, Ikiavɨra Itir God uan anɨngagharim akagham, eghtɨ men gol ko silva tong bar men akuraghan kogham. Bar puvatɨgham. An anɨngagharim, avimɨn mɨn otogh nguazimɨn ruaghateviba bar dar isigham. A zuamɨram otogh, nguazimɨn gumazamiziba bar me agɨvagham.

Aisaia 45:9

E gumazamiziba, God en ingari, e mati pura bizir kɨniba. Kamaghɨn gumazir Godɨn atara a mɨgeim, a bar ongani. Gumaka, a bar ikuvigham. God mati gumazir nguazir mɨnebar ingarimɨn mɨn iti. Ezɨ e nguazir mɨnebar mɨn, bɨaghiregha pura tintinibar nguazim gireghav iti. Ia bizir kam gɨnɨghnɨgh. Nguazir mam ti dɨkavigh mangɨ gumazir a inigha mɨnemɨn ingarizim, kamaghɨn an azaragham, “Manmaghɨn ami? Nɨ na inigha bizir tizimɨn ingari?” Eghtɨ nguazim ti kamaghɨn atar mɨkɨmam, “Nɨ tizim bagha bizir nɨ ingarizir kam, an suighamin agharimningɨn ingarizir puvatɨ?”

Onger Akaba 78:58

Me mɨghsɨabar ghua asebar ofa gamir dakozibar ingarizɨ, God puvɨra men atari. Me marvir guabar ingarizɨ, Godɨn navim me bagha bar ikufi.

Jopɨn Akɨnafarim 9:4

God nɨghnɨzir aghuim ko fofozim ko gavgavir ekiam iti. Kamaghɨn, tinara a batuegh a gafiragham? Gumaziba puvatɨ.

Josua 24:19

Ezɨ Josua me mɨgɨa ghaze, “Ia zuamɨra kamaghɨn mɨkɨman markɨ, egh suam, kɨ Ikiavɨra Itir Godɨn ziam fam. Guizbangɨra, Ikiavɨra Itir God, godɨn igharazitam a ko magh garir puvatɨ. A uabɨra, ia an ziam fasa a ifonge. Ia akɨrim a gasaragh godɨn igharazibar ziaba fɨtɨ, a ian arazir kuraba gɨn amadaghan kogham.

Godɨn Araziba 6:15

Ia kamaghɨn fogh, Ikiavɨra Itir God, ian God, ia ko iti, ezɨ gumazamiziba asebar gɨn zuima, Godɨn navim me bagha bar ikufi. Eghtɨ ia asebar ziaba fɨtɨ, Ikiavɨra Itir God ian atar, mati avim bizibar isia da gevi moghɨn, ia agɨvaghtɨ, ia ua nguazir kamɨn ikian kogham.

Godɨn Araziba 4:24

Ikiavɨra Itir God, ian God, a uabɨra guizbangɨra God. A ian amamangatɨghtɨ, ia asetamɨn ziam fan kogham. God avir bar puvɨra isimɨn mɨn iti, egh uan apanibar atar men isigham. Kamaghɨn amizɨ, ia kamaghɨn damuan markɨ.

Ua Me Ini 34:14

“Kɨ uabɨra, kɨ Ikiavɨra Itir God, ia nan ziamra fɨ. Egh aser ifavariba nan danganim inian kɨ bar aghua. Egh ia asebar ziaba fan markɨ.

Ua Me Ini 20:5

Ia asetam ko marvir guatamɨn itevibar pɨrɨva an ziam fan markɨ. Guizbangɨra, kɨ Ikiavɨra Itir God, kɨ ian God. Egh godɨn ifavaritamɨn amamangatɨghtɨ, a nan danganim inian kogham. Bar puvatɨ. Gumazamizir nan aghuaziba, me osɨmtɨzim iti, ezɨ kɨ ivezir kuram me ko men ikɨzim danɨng mangɨvɨra ikɨtɨ, men ikɨzimɨn igiar boriba ko azɨziba otogham.

1 Atriviba 14:22

Dughiar kamɨn Judabar gumazamiziba arazir kurar avɨriba Ikiavɨra Itir Godɨn damazimɨn dagh ami. Ezɨ arazir kurar me amizir kaba, Ikiavɨra Itir Godɨn anɨngagharim gamizɨ, a ghua bar ekefe. Men inazir afeziaba faragha arazir kurabagh ami, ezɨ Ikiavɨra Itir Godɨn adarir datɨrɨghɨn Judabar itim, a bar ekevegha adarir fomɨra men inazir afeziabar ikezim bar a gafira.

Jeremaia 7:19

Ezɨ kɨ Ikiavɨra Itir God, kɨ ghaze, Me kamaghɨn amua paza nararam amir pu. Bar puvatɨ. Me paza uarira uarigh amua aghumsɨzim uarira uarigh anɨngi.

Jeremaia 44:8

Ia datɨrɨghɨn Isipɨn ikia, egha ia uan dafaribar asebar marvir guabar ingara, ofan mɨgharir mughuriar aghuim zuiba, aser igharagha garibagh anɨdi. Ezɨ ian arazir kam na gamima, kɨ bar puvɨram anɨngaghe. Eghtɨ kamaghɨn ia ikuvigham. Eghtɨ Kantrin Igharazibar Gumazamiziba bar ia dɨpova, akar asuir kurabar ia mɨkɨmam. Egh me uan apaniba akar kurabar me mɨkɨmsɨ, me kamaghɨn mɨkɨmam, ‘Ia Judaba ikuvizɨ moghɨn ia ikuvigham.’