Tanieu 5:21 - Ritonõpo Omiry: A Bíblia Sagrada na língua Aparai do Brasil

²¹ Taropose ynororo ahno winoino, onokyro sã tõsenetupuhse ynororo. Jumẽtu tõ ikuremahnõ maro kynexine, onahpoty tonahse eya pui tõ samo, jarao rokẽ tynyhse ynororo tohxikase kynexine koko ahtao axitaku ke. Morara kynexine Ritonõpo Imehxo ehtoh enetupuhtoh pona eya, emero tuisa tõ Esẽme mana, tynymenekahpyry ripõko tuisame mana.

Tanieu 5:21 ပူးပေါင်းရင်းမြစ်များ

Jo 39:5

“Onoky a jumẽtu tõ ona põkõ tymyhpokase tamoreme xine toto ytotohme, tosẽke pyra exiketomo?

Ezekieu 17:24

Mame wewe tõ emero nono po zuaro exĩko mã kehko, ywy ase Ritonõpo. Wewe kaetokohxo exiketõ akohnõko ase, zumo pyra exiketõ ahtanohpõko ase. Wewe tõ isene ro exiketõ anorymapõko ase, tonore aexityã ahtanohpõko ropa ase. — Ywy, Ritonõpo, oturuase. Emero tyrĩko ase jomihpyry ae ro.”

Tanieu 4:14

Ynara tykase sã ynororo opore: ‘Moro wewe akohtoko, amoriry tõ ihkohtoko, zarỹkatoko ipahtohme, epery tõ roropa ipahtoko. Onokyro tõ erehtoko, oseremaketomo jerutumã po exiketomo, torõ tõ roropa erehtoko amoriry tõ po exiketomo.

Tanieu 4:17

Moro mã Ritonõpo nyripohpyryme mana, tokarose inenyohtyamo a, sero nono põkõ enenanõ kapu poe, zuaro emero ehtohme, Ritonõpo Kapu Esẽ rokẽ tuisa tõ emero esẽme mana sero nono po. Tynymenekatyamo a tuisame ehtoh ekarõko mana, tuisame pyra toto ahtao ro ipunaka.’

Tanieu 4:22

— Moro wewe opoko enetupuhtoh nexiase. Tuisamehxo toehse mase, jamihme roropa. Pata tõ esẽme mase sero nono etyhpyry pona, kapu pona sã roropa.

Tanieu 4:25

Atapyĩ tae aaropõko mana, mya ahno winoino, onokyro tõ rãnao exĩko mase. Pui sã onahpoty enahnõko mase, jarao rokẽ nyhnõko mase, axitaku oehxikãko mana. Morara exĩko mase 7me jeimamyry pona, Ritonõpo Imehxo ehtoh enetuputyry ponãmero oya. Tuisa tõ Esẽme mana, emero sero nono põkomo, tuisame orutua rĩko roropa mana, ise tahtao.

Tanieu 4:26

Ritonõpo nenyokyhpyry omi poe moro wewe ãtykyry tynomose imity maro, ynara enetupuhtohme mana: tuisame exĩko ropa mase, Ritonõpo Imehxo Exiketyme tonetupuhse oya ahtao, moro ekaroryhtao roropa oya imehnõ netaryme.

Tanieu 4:34

— Morarame 7me jeimamyry taropose ahtao, ywy, Napukotonozo osenuhmase kakoxi, josenetupuhtoh toekurãkase ropa. Ynara tykase ywy: “Kure mase, Ritonõpo kapu Esemy. Oeahmary se ase Imehxo Exiketyme mase, jũme Exikehpyra mase. Ritonõpo jamitunuru enahpỹme mana; tuisame aehtoh exikehpyra mana.

Tanieu 4:35

Ritonõpo a kurãkõ nymyryme pyra sytatose; ipoetoryme sytatose nono põkomo te, inenyohtyã kapuaõkõ roropa. Tyriry se ynororo ahtao anakorekehkasaromepyra sytatose. ‘Morohne poko pyra exiko,’ kasaromepyra sytatose eya.”

Tanieu 4:37

Morara exiryke ywy, tuisa Napukotonozo, “Kure mase,” ãko ase Ritonõpo Kapu Esemy a. “Tuisamehxo mase,” ãko ase eahmaryme. Inyriry emero zae nase ipunaka, epyrypaketõ poremãkapory waro roropa mana. Enara.

Tanieu 5:18

Omy Napukotonozo tuisame tyrise Ritonõpo Imehxo Exikety a. Eya omy tyrise jamihmehxo, orẽpyrahxo, tuisamehxo, enara.