Tanieu 11:24 - Ritonõpo Omiry: A Bíblia Sagrada na língua Aparai do Brasil

²⁴ Tokare pyra osetapãko mã ynororo, pata tõ põkõ maro, tymõkomokehxo exiketomo. Mokaro ryhmãko xihpyryme mã ynororo, tytamuru nyrihpyry sã pyra ipunaka. Mõkomo apiakãko mã ynororo tysoutatu tõ kyryryme, uuru tõkehko te, ikyryry tõ typyne exiketõ, emero apoiryhtao eya. Mame osenetupuhnõko mana pata tõ, jamihmãkõ poremãkapory poko repe, yrome okynã pyra moro poko osenetupuhnõko mana.

Tanieu 11:24 ပူးပေါင်းရင်းမြစ်များ

Neemia 9:25

Pata tõ jamihmãkõ tapoise eya xine tapuruse toto ahtao ro, tupito tõ kurã roropa, tapyi tõ maro tymõkomoke pehme, tuna pẽkamã tõ tahkase toto ahtao, oriwera tomo, wewe eperytaketomo, uwa zoko ke tarykase exiketomo. Typenetatohkõ tonahsẽme tonahse eya xine, tupunase toto, tõseahmase toto onekarohpyry kurã ke porehme.

Porowepio 17:8

Ahno nae ynara osenetupuhnõko, tineru ke imehnõ epekahnõko emero porehme; tineru ekarõko mã toto zae pyra ehtoh ripotohme imehnomo a, pyaxi jamitunuru sã moro ekarõko mã toto.

Porowepio 19:6

Tuisamehxo exiketõ zamaro se sytatose emero, tynekarory tõ ekaroneme exiketõ maro osepeme se sytatose roropa emero.

Porowepio 23:7

“Otuhko ty toiro,” ãko mã ynororo repe, yrome tyoro aosenetupuhtoh mana.

Ezekieu 34:14

Inahpatorỹko ase onahpoty kurã ke, ypy tõ po Izyraeu tõ nonory po, jakanahmã po roropa, ona tõ po emero onahpoty kurã nae ahtao Izyraeu tõ nonory po.

Ezekieu 38:10

Ynara ãko Ritonõpo Kuesẽkõ Koke a: — Morarame moro ẽmepyry toehse ahtao osenetupuhnõko mase popyra ehtoh ritohme oya.

Tanieu 11:23

Osepeme se exiketõ enekunohnõko mana, aomirykõ totase ahtao ro eya, mame tysoutatu tõ ke, tuhkãkõkara ke jamihmehxo exĩko mana.

Tanieu 7:25

Ritonõpo kerekeremãko mana, ipoetory tõ ryhmãko mana Ritonõpo Imehxo Exikety poetory tomo. Ritonõpo nyripohpyry myakãmary kuhnõko mana, eahmatoh tonõ roropa. Ritonõpo poetory tõ poremãkãko mana 3me jeimamyry zokonaka.

Numeru 13:20

Nono enetoko ropa, oty sã nae? Kure arykatohme? Popyra? Wewe tõ roropa enetoko. Orẽpyra ehtoko otyro epery enehtatoko roropa moro poe (Uwa epery tõ toehse ehtoh exipitõko nexiase).

Mateu 9:4

Yrome mokaro a typoihtory waro Jezu kynexine. Morara exiryke ynara tykase ynororo: — Juaro pyra oexirykõke ykerekeremãko matose okurohtao xine.

Juize 9:4

800 karamame parata touse eya xine tyneponãmarykõ Paau-Perite eahmatoh tae ekarotohme eya. Moro parata ke orutua kõ, popyra exiketõ topehmase eya tymaro toto ytotohme.