3 Inurukõ okoi orihmatõ sã mã toto, aomirykõ okoi epity sã mã orihmato.
Mame Ritonõpo tõturupose nohpo a: — Oty katoh morara myrino? tykase. — Okoi jenekunohno, tykase nohpo, — morara exiryke enahno, tykase.
Tapuruse ywy jepetõkara a; reão tõ sã mã toto, jesekary se mã toto. Jery warata sã mã kehko, pyrou sã roropa, inurukõ tapema sã mana, taere exikety sã ipunaka.
Opi orihmato ke pehme mã toto, okoi orihmatõ samo. Typanarykõ apurũko mã toto, okoi saaro, otato pyra toehtohme,
Tõmirykõ ke imehnõ enaroximãko mã toto, tytapemakẽ samo; imehnõ eunohnõko: “Yna omiry onetara imehnõ mana,” ekarõko toh mã repe.
Sekerekane õmiry imepỹ wõko sã mana pyrou potyry samo, yrome tuaro exikety omiry mã imehnõ akorehmãko ekurãkatohme ropa.
Ynara exiryke, etyhpyryme oesekãko sã mana okoi orihmatõ samo.
Zae pyra toexirykõke osenetupuhkehpyra mã toto popyra ehtoh riry poko, imehnõ akorekehkapõko mã toto.
Tamonohse yna a, õmihpyry omipona pyra toehse, omoro, Ritonõpo, turumekase yna a, yna Esemy. Tãtamorepase yna imehnõ ryhmary poko, yna tuisary tõ rumekary poko yna a te, imehnõ enekunopyry poko roropa.
Tahxime ajohpe oturũko mã toto imehnomo a. Ajohpe rokẽ mã toto sero nono po, zae ehtoh poko pyra mã toto. Ynara ãko Kuesẽkõ mana: “Ypoetory tõ popyra ehtoh poko exikehpyra mã toto, Ritonõpome jenetupuhpyra mã toto.”
Tope tõ enekunohnõko roropa mã toto emero porehme, zae ehtoh onekaropyra mã toto. Tunurukõ amorepãko mã toto ajohpe ehtohme; tyyrypyrykõ poko mã toto, iirypyryme toehtohkõ onurumekara mã toto.
Ykerekeremary poko kohmãnõko mã toto, zuaro mase, yyryhmary se mã toto.
Okoi sã matose. Iirypyryme matose ipunaka. Morara exiryke õmirykõ iirypyryme roropa mana. Iirypyryme okurohtao xine oexirykõke, ajoajohpe õmirykõ mana.
Torẽtyke ase opoko xine. Oenekunopyrykõ se imehnõ exiryke, Kyrixtu rumekatohme ropa oya xine ipyno hkopyra oehtohkõme. Morararo pake Ewa tonekunohse joroko tamuru a omi kurã ke samo.