Porowepio 15:9 - Ritonõpo Omiry: A Bíblia Sagrada na língua Aparai do Brasil

⁹ Popyra exiketõ nyrityã se pyra Ritonõpo mana ipunaka, yrome zae ehtoh poko exiketõ pyno mana.

Porowepio 15:9 ပူးပေါင်းရင်းမြစ်များ

Saumu 1:6

Ynara exiryke, tõmipona exiketõ pynanohnõko Ritonõpo mana, yrome popyra exiketõ wãnohnõko mana.

Saumu 11:7

Zae ehtoh rĩko Ritonõpo mana, ajohpe pyra ehtoh jamaro mana; aomiry omipona exiketõ jũme isene exĩko mã toto Ritonõpo ẽpataka.

Saumu 139:24

Kueneko popyra ehtoh nae ahtao ukurohtao, kuaroko jũme amaro exiketõ esemary ae.

Saumu 5:5

Epyrypaketõ se pyra mase ipunaka. Popyra exiketõ zehno mase emero porehme.

Porowepio 15:10

Zae ehtoh rumekaryhtao ahno a tuãnohsẽme exĩko mana pitiko rokẽ pyra, mame tukurãkary se pyra exikety orihnõko mana.

Porowepio 21:21

Imehnõ pyno awahtao, zae roropa awahtao okynahxo isene exĩko mase, õmiry etary se exĩko imehnõ mana, kure orĩko roropa mã toto.

Porowepio 21:4

Popyra exiketõ epyrypãko mã toto imehnõ motye kure toexiry poko, orẽpyra toexiry poko roropa, morara ehtoh iirypyryme mana.

Porowepio 21:8

Zae pyra exikety torẽnase azahkuru ehtoh poko, yrome kure exiketõ zae ehtoh poko rokẽ mã toto.

Porowepio 4:19

Yrome popyra ehtoh poko exiketõ esemary xinukutumã sã mana koko exikety samo. Epukãko rokẽ mã toto tosemarykõ onenepyra toexirykõke.

Porowepio 8:13

Ritonõpo omipona awahtao popyra ehtoh se pyra mase. Oepyrypary se pyra ase ipunaka te, imehnõ motye kure osekarory roropa, popyra ehtoh poko se pyra roropa ase te, omi ajohpe ehtoh se pyra ase, enara.

Izaja 26:7

Zae ehtoh poko exiketõ esemary tupime pyra mana; Omoro, Ritonõpo, zae exiketõ esemary rĩko mase amimome.

Izaja 51:1

Ynara ãko Ritonõpo mana: “Jomiry etatoko, tõsepynanopyry se exiketomo, ya oehketomo tãtakorehmapotohkõme! Moro topu poko osenetupuhtoko ewino taxikase mexiatose, topu ahkatoh esary poe touse mexiatose.

Izaja 51:7

“Etatoko pahne zae ehtoh waro exiketomo, ãmorepatohkõ ya tukurãkase okurohtao xine mana! Enaromyra ehtoko ohtomarykohtao imehnomo a, opoihtorykohtao roropa eya xine penekehpyra ehtoko.

Jeremia 44:4

Ypoetory tõ, urutõ kõ onenyohkehpyra exiase oya xine ourutohkõme moro oorypyrykõ xihpyry poko pyra oehtohkõme, moro se pyra jexiryke ipunaka.

Ozeja 6:3

Yronymyrymehxo sosekarotone Kuesẽkomo a! Anamonohpyra xixi ehtoh samo, kuakorehmatorỹko mana; anamonohpyra oehnõko mana konopo oepyry sã nono ehxikatohme eina exisasaka ahtao.

Apakuke 1:13

Yrome otãto mokaro popyra exiketõ eanahtõko mah, Ritonõpo? Nuriame exiketõ enery se pyra mase ipunaka kure oexiryke. Popyra exiketõ tyyrypyrykõ poko ehtoh oneanahtosaromepyra mase. Naeroro oty katohme mynyhme rokẽ mahno kurehxo exiketõ etaparyhtao popyra exiketomo a?

Mateu 7:13

— Asakoro osema sã kuosenetupuhtohkõ mana. Ritonõpo omipona ehtoh osema pitiko ae ytotoh sã mana, tupimã ae ytotoh samo. Yrome moro ae rokẽ ytotoko. Ynara exiryke Ritonõpo osenetuputyry ae pyra awahtao xine tyoro ae ytoketõ sã matose, zumo ae ytoketõ samo. Moro ae ytoketõ mã etuarimaketõ esaka ytõko. Tuhke roropa moro ae ytoketõ mana.

Teuteronomiu 7:13

Opyno xine exĩko mana, kure ehtoh enehpõko oya xine mana, tuhkehxo amarokõ emãkapõko roropa mana. Opoenõkõ tuhke ekarõko roropa mana oya xine, tiriiku tõkehko itamurume ekarõko oya xine mana, uwa tomo te, azeitona tomo, pui mũkuru tõ tuhke, kaneru poenõ tuhke. Morohne ekarõko Ritonõpo oya xine mana moro nono po, inekarory po, tõmihpyry etapotopõpyry ae ro kytamuru tomo a.

1 Timoteu 6:11

Yrome omoro Ritonõpo poetoryme oexiryke tomeseke mokaro sã pyra oehtohme. Tineru poko openetary irumekako, kure oexiry aroko. Ritonõpo zamaro exiko. Oesẽme onenetupuhkehpyra exiko. Imehnõ pyno exiko roropa. Penekehpyra exiko Ritonõpo nyrohmanohpotoh poko. Osenetaonohpyra exiko roropa.

2 Timoteu 2:22

Nuasemãkõ otarame tyyrypyrykõ poko penetãko mã toto. Ipenetarykõ poko pyra exiko. Ynara rokẽ exiko, zae ehtoh poko rokẽ exiko, Jezu enetuputyry poko, imehnõ pyno oexiry poko, kure rokẽ oexiry poko, enara. Moro saaro Ritonõpo maro oturuketomo, kure rokẽ toexirykõ poko toto. Tyyrypyry poko pyra toto ipunaka tukurohtao xine.