Ozeja 11:9 - Ritonõpo Omiry: A Bíblia Sagrada na língua Aparai do Brasil

⁹ Awãnohpyra xine ase ozehno xine jehtoh ke. Ypoetory tõ onenahkara ropa ase, Ritonõpome jexiryke ahno rokẽ kara ase; Ywy, Ritonõpo Kurano, ypoetory tõ rãnao ase, toto onenahkara ropa ase.”

Ozeja 11:9 ပူးပေါင်းရင်းမြစ်များ

2 Samueu 20:10

Amasa zuaro pyra nexiase, punião onenepyra roropa Joape emahpo. Amasa tuasakase punião ke zuakuru htaka Joape a. Zuahxirirĩ tutũtase, nono pona sapararah tykase. Toorihse Amasa rahkene, onuozomopyra ropa Joape nexiase. Mame Joape tõ toytose Apisai maro Sepa ekahmase.

Saumu 46:5

Moro pata po Ritonõpo mana, naeroro jũme enahpyra exĩko mana; ẽmepyryhtao typatary akorehmãko Ritonõpo mana.

Saumu 78:38

Yrome typoetory tõ wãnopyry se pyra Ritonõpo kynexine. Toto onenahkara kynexine, toto rypyry tykorokase eya. Tuhke rokẽ typoetory tõ zehno toehtoh tymynyhpãkapose eya totypohse ynororo toto zehno toexiry poko, toto onuãnohpyra toehtohme.

Saumu 85:4

Yna enehko ropa, Ritonõpo yna Pynanohne, penekehpyra exiko opoetory tõ poko!

Izaja 12:6

Xião põkomo, atãkyematoko, Ritonõpo eahmatoko roropa. Ritonõpo kurano, Jamihmehxo Exikety, Izyraeu tõ Esemy moroto mana typoetory tõ maro osesarĩko mana.”

Izaja 31:1

Popyra ehtoh oehnõko mokaro a, Ejitu pona ytoketõ takorehmapotohkõme! Osepeme ahno maro toexirykõ se mã toto kawaru tõ tuhke nae toexirykõke, kahu tõ tuhke nae roropa toexirykõke, soutatu tõ orẽpyra exiketõ kawaru po ytoketõ nae roropa repe, yrome Izyraeu tõ Esẽ Kurã onenetupuhpyra mã toto, Ritonõpo a atakorehmapopyra mã toto.

Izaja 41:14

Ynara ãko Ritonõpo mana typoetory tomo a: “Pisarara matose jamihme pyra roropa, yrome enaromyra ehtoko; ywy ase Ritonõpo, Izyraeu tõ Esẽ kurano, Opynanohnekõme ase, oewomatorỹko ase.

Izaja 41:16

Typahse kehko kakoxi ahtao oya xine, tarosẽme exĩko mana tyryrykane a, mame wirikane a sapararahme typahsẽme exĩko mã kehko. Morarame moro sã toehse ahtao tãkye exĩko matose ywy, Ritonõpo Oesẽkõme jexiryke. Mame jeahmãko matose, Izyraeu tõ Esẽ kurano.

Izaja 48:9

“Awãnopyrykõ se jahtao tuãnohse oexirykõ ya, oenahkaporykõ se jahtao pake tonahkase mexitory ya, yrome morara ahtao jeahmara sero nono põkõ exiry. Mãpyra penekehpyra exiase opoko xine, Ritonõpome jexiryke jeahmary oya xine zae mana.

Izaja 5:24

Morara exiryke ãtaryka zahkary sã apoto a, onahpoty tonore zahkary sã roropa; moro sã Izyraeu tõ osenepyra exĩko: otyro sã exĩko mã toto imity tõ tymotase ahtao, ekuru tõ tarosẽme exĩko putoh katoh samo, Ritonõpo Jamihmehxo Exikety nyripohpyry omipona pyra toehse oexirykõke; Izyraeu tõ Esẽ Kurã omiry xihpyryme tokarose roropa oya xine.

Jeremia 26:3

Otarame otatõme exĩko mã toto, mame popyra toehtohkõ rumekãko mã toto. Moro sã toehse ahtao, ywy roropa etyorõmãko ase, popyra ehtoh onenehpopyra exĩko ase toto pona, toto wãnohtohme popyra toto ehtoh emetakame.

Jeremia 30:11

Amaro xine exĩko ase opynanohtohkõme. Imeimehnõ nonory enahkapõko ase, emero aaropotopõpyrykõ ya, yrome oenahkara xine ase. Tuãnohsẽme exĩko matose repe; yrome, awãnopyrykohtao ya, zae rokẽ awãnohtorỹko ase; onymotyẽkara ase. Ywy Ritonõpo oturuno.”

Ozeja 12:1

Popyra ehtoh poko rokẽ kohmãnõko Izyraeu tõ mana. Inyrityãkõ toiparo rokẽ mã kehko. Imeimehnõ enekunohnõko mã toto, toto ryhmatohme, toto etapatohme roropa, enara. Osepeme toehtohkõme tõmirykõ etapõko mã toto axirio tomo a, mame azeite aropõko mã toto tynekaroryme Ejitu pona.

Ozeja 14:4

Ynara ãko Ritonõpo mana: “Ypoetory tõ kurãkãko ase, toto amonohtopõpyrykõ korokãko ase. Toto pyno exĩko ase yronymyryme ukurohtao, tohne toehkehse jexiryke ipoko xine.

Marakia 3:6

Ynara ãko Ritonõpo mana: — Ywy ase Ritonõpo. Onytyoromara ase. Morara exiryke amarokomo, Jako pakomotyã onenahkara mexiatose.

Numeru 23:19

Ahno sã pyra Ritonõpo mana, ajohpe exiketõ sã pyra; tõsenetupuhtoh onytyoromara mana. Tõmiry totapose ahtao Ritonõpo a, moro rĩko mana; ‘Tyrĩko ase,’ tykase ahtao Ritonõpo a tyrĩko mã rahkene.

Teuteronomiu 13:17

Ritonõpo omi poe enahkapohpyry onukurãkara ehtoko okyryrykõme. Moro sã awahtao xine tohne exikehnõko Ritonõpo mana, opyno xine exĩko mana. Tõmihpyry ae ro tõturutopõpyry ae ro kytamurukomo a amarokõ oemãkapotorỹko mana tuhke oehtohkõme.

1 Samueu 26:8

Mame Apisai ynara tykase Tawi a: — Seroae ozehnoto tokarose Ritonõpo a oya. Sauu uwoxi, iwaratã ke ro, nono po ahtao ro, toiro rokẽ tuõko ase. Onuozomopyra ropa ase, tykase Apisai.