Opatia 1:11 - Ritonõpo Omiry: A Bíblia Sagrada na língua Aparai do Brasil

¹¹ Jerusarẽ omõtoh tytohkase ahtao epetõkara a, tomõtohkõme pata pona mõkomo typyne exiketõ ematonanohse, oty kara mexiatose. Mame imeimehnõ nonory põkomo a, imenekatoh tomase, moro mõkomo kurã apiakatohme tymõkomorykõme, mokaro sã mexiatose, imaro xine.

Opatia 1:11 ပူးပေါင်းရင်းမြစ်များ

2 Tuisa 25:11

Morarame ahno akoĩpyry tarose Nepuzaratã a, Papironia pona, emese kure erohketõ akoĩpyry maro te, mokaro maro tõsekarose aexityamo Papironia põkomo a.

Saumu 137:7

Ritonõpo, wenikehpyra exiko etomita tõ nyrihpyry poko Jerusarẽ poremãkatopõpyry poko! Wenikehpyra exiko aomihpyrykõ poko: “Pata Jerusarẽ ikararahtoko emapotohme nono pona,” tykase toto.

Saumu 50:18

Emero rokẽ omato tõ eneryhtao oya xine osepeme exĩko matose toto maro, imehnõ nohpo poko exiketõ maro imehnõ orutua poko exiketõ maro osepeme exĩko matose.

Saumu 83:5

Oepetõkara atae mã toto tõsenetupuhtohkõ poko; mokaro atae exiketõ oporemãkapory poko ynara mã toto:

Saumu 83:6

Etõ põkomo te, iximaeu tõ maro; Moape põkomo te, hakarita tõ maro;

Ezekieu 35:10

— “Izyraeu tõ esẽme mosekaroatose, Juta tõ maro, inonorykõ maro. Mame inonorykõ apoitoh mekaroatose, ywy, Ritonõpo toto esẽme, moroto jahtao ro.

Joeu 3:3

Imenekatoh tomase eya xine tynamoto tõme ypoetory tõ apiakatohme; poetohti tokamose eya xine imehnõ namotome toto ehtohme. Mame moro tineru tonahkase eya xine nohpo tõ poko, eukuru jehnahpyry poko roropa.

Amoxi 1:6

Ynara ãko Ritonõpo mana: — Kaza põkõ iirypyryme toehse itamurume, morara exiryke toto wãnohnõko ase. Ahno tapoise eya xine imepỹ nono põkõ porehme tynamotokõme, toto ekamotohme Etõ tomo a.

Amoxi 1:9

Ynara tykase Ritonõpo: — Tiro põkõ iirypyryme toehse itamurume. Morara exiryke toto wãnohnõko ase. Ahno tapoise eya xine, tõmirykõ totapose ahtao eya xine osepeme ehtohme. Tynamotokõme emero tarose eya xine Etõ pona.

Naum 3:10

Moro sã ahtao ro Tepa põkõ tarose imepỹ nono pona imehnõ namotome; tynonorykõ poe tarose toh nexiase; ipoenõ takurihmose osema tõ ae emero. Imenekatoh tomase epetõkara a tamuximãkõ apiakatohme typoetoryme toto ehtohme, imeĩpo tarose toto tymyhse keti ke tynamotokõme.

Sowonia 2:10

Moro sã tuãnohsẽme exĩko mã toto. Toepyrypase toto exiryke, Ritonõpo, Jamihmehxo Exikety poetory tõ tounohse eya xine exiryke, toepyrypase roropa exiryke inonorykõ poremãkary poko tyya xine.