Naum 1:5 - Ritonõpo Omiry: A Bíblia Sagrada na língua Aparai do Brasil

⁵ Ritonõpo ẽpataka, ypy tõ tykytyky ãko mana, somohmã tõ atakuhmõko mã kehko. Oseneporyhtao nono tykytyky ãko, ipõkõ emero nono pona epukãko mana.

Naum 1:5 ပူးပေါင်းရင်းမြစ်များ

2 Samueu 22:8

Morarame nono tykytyky tykase, kywyh tykase roropa; ypy ãtykyry kywyh tykase, tykytyky tykase roropa tãtaekymase Ritonõpo exiryke.

Jo 26:11

Xikihme exiketõ, kapu apõ tõ enaroximaryhtao eya oserehnõko mã kehko, tykytyky ãko mã kehko enaromỹke toehtohkõke.

Jo 9:5

Tokare pyra ypy tõ syryhmãko mana esarykõ poe, zehno tahtao toto enahkapõko mana.

Saumu 104:32

Sero nono eneryhtao Ritonõpo a tykytyky ãko mana; ypy tõ aporyhtao eya orexĩto tũtãko mana.

Saumu 114:4

Ypy tõ pyhseky tykase toh nexiase kaneru tõ samo, somokyhmã kõ pyhseky tykase toh nexiase kaneru poenõ samo.

Saumu 114:6

Ypy tomo, oty katohme kaneru tõ sã pyhseky mexiatose? Somokyhmãkomo, oty katohme kaneru poenõ sã pyhseky mexiatose?

Saumu 18:7

Morarame nono tykytyky tykase, kywyh tykase roropa, ypy tõ apõ kywyh tykase. Tykytyky tykase roropa, tãtaekymase Ritonõpo exiryke.

Saumu 18:8

Eunary ae orexĩto tutũtase, ĩtae roropa apoto tutũtase oahmame pyra.

Saumu 46:6

Imehnõ nonory põkõ oserehnõko mã toto, mokaro kowenu tõ tyjamihkehkasẽme mã toto. Oturũko mã Ritonõpo konomeru samo, tuname sero nono exĩko mana.

Saumu 68:8

nono tykytyky tykase, kapu poe konopo toehse itamurume Ritonõpo oepyryke Xinai esemy, Izyraeu tõ Esẽ roropa.

Saumu 98:7

Panaikato tyriko tuna konõto, isene exiketõ emero tunakuaõkõ maro. Oeremiatoko, nono, emero nono põkõ maro.

Exutu 19:18

Ypy Xinai orexĩtohpã sã kynexine, epona typorohse Ritonõpo exiryke apoto maro. Moro orexĩto tõnuhse apoto konõto erexĩtory samo apotoimo poe samo. Tykytyky tykase toto morohne kurũke.

Izaja 24:1

Etatoko ke! Sero nono typõke pyra exĩko mana, tonore ona ripõko Ritonõpo mana; popyra sero nono ripõko mana, sapararahme pata tõ põkõ ripõko mana.

Izaja 24:20

Sero nono wazawazame ytõko mana aetymyhpyry samo, kywyh kywyh ãko mana tapyi pitiko samo, tyryrykane jamihme ahtao. Popyra ehtoh poko sero nono põkõ ehtoh omoxinety sã mana; toepukase ahtao owõsaromepyra ropa exĩko mana.

Izaja 5:25

Naeroro tyekĩtapãse Kuesẽkõ typoetory tõ poko; tomary tanỹse eya, tuãnohse toto. Ypy tõ tykytyky tykase kehko, aorihtyã ekepyry tõ typahsẽ sã tõxinamasẽme exĩko pata esemary po. Morara toehse ahtao ro toto zehno Ritonõpo ehtoh enahpyra ro; tomary tanỹse ro mana typoetory tõ wãnohtohme.

Jeremia 10:10

Yrome omoro mase Ritonõpo nymyry; Ritonõpo isene exikety, Tuisame jũme exikehpyra exiketyme. Zehno awahtao sero nono tykytyky ãko mana; ahno tõ zehno awahtao enahnõko mã toto.

Jeremia 4:24

Osenuhmase ypy tõ pokoxi, tykytyky ãko toh nexiase; Emorymãkomo roropa kywyh ãko nexiase xia, mya ropa.

Ezekieu 38:20

Kana tõ emero, torõ tõ roropa te, onokyro tõ okyno tõ roropa inunomo te, zumo pyra exiketõ maro te, ahno tõ emero, sero nono po tykytyky ãko mã toto juno toehtohkõke. Ypy tõ epukãko mã kehko, topu tõ tytohkasẽme exĩko, apuru tõ emero epukãko mã kehko.

Joeu 2:10

Ytokehpyra mã toto, nono tykytyky ãko mana, kapu roropa, xixi kohmãnõko mana nuno roropa, xirikuato tõ roropa zemime hkopyra exĩko mã kehko.

Amoxi 9:5

Ritonõpo, yna Esemy, Jamihmehxo Exiketyme mase, sero nono tapose ahtao oya, tykytyky ãko mana, sero nono põkõ emero xitãko mã toto toemynyhmarykõme. Sero nono onuhnõko mana, yhtõko roropa mana tuna Niro tunary samo.

Mikeja 1:4

Mame ipupuru tõ zopino ypy tõ tunatãko mã kehko; moronapu sã mã kehko apoto htao; sararakame ytõko mã jakanahmã pona tuna sararakaneme samo.

Apakuke 3:10

Ypy tõ oeneryke tykytyky tykase kehko; tuna tukuãse kapu aeino. Tuna tõ nono zopino panaikatome toehse sororokane samo, pohkane konõto samo tõnuhse mã kehko.

Zakaria 4:7

— Zoropapeu ẽpataka ypy tõ kaehxo exiketõ ona topohmãme exĩko. Topu imehxo exikety Ritonõpo Tapyĩ kyryry enehnõko mana, esaka tyritohme. Moro eneryke kohtãko mã toto: “Kure potu! Kure potu mana!” ãko.

Marakia 4:1

Ynara ãko Ritonõpo Jamihmehxo Exikety: — Moro ẽmepyry oehnõko mana: epyrypaketõ emero tyahkasẽme exĩko mana, popyra exiketõ maro, onahpoty samo tonore ahtao. Tonahkasẽme exĩko mã toto ipunaka.

Mateu 27:51

Morarame apurutoh toexihkase Ritonõpo Tapyĩ tao. Kamisa risẽ toexihkase kaino zuhkurenaka. Nono roropa kywyh kywyh tykase. Topu konõto roropa toehmose kehko.

Mateu 28:2

Mame tuaro pyra toto ahtao nono kywyh kywyh tykase jamihme. Mame Ritonõpo nenyokyhpyry tyhtose kapu ae. Jezu ekepyry ẽtypyry apurutoh tysyryhmase ropa eya. Mame epona typorohse ynororo topu pona.

Apokaripxi 20:11

Morarame tuisa apõ konõto enease, karimutumano. Tapõ po typorohse exikety enease roropa. Ewinoino sero nono toepase samo, kapu roropa toepase samo, osenepyra toehse.

Apokaripxi 6:14

Mame osenepyra toehse kapu, pape amemyry samo. Ypy tõ tysyryhmase esae xine, ahmõta tõ roropa esae xine tysyryhmase.

Juize 5:5

Ypy tõ tykytyky tykase Ritonõpo ẽpataka, tykytyky tykase ypy Xinai roropa, Ritonõpo Izyraeu tõ Esẽ ẽpataka.