Mateu 9:22 - Ritonõpo Omiry: A Bíblia Sagrada na língua Aparai do Brasil

²² Mame zupõ tytemuhmase eya rahkene. Mame Jezu kynosenuhmane tỹkakoxi, tupõ tytemuhmase exiryke. Ynara tykase ynororo: — Enaromyra exiko kuku. Tonetupuhse oya jexiryke tukurãkase ropa mase, tykase Jezu eya. Axĩ toekurãkase ropa ynororo. Kure toehse ropa.

Mateu 9:22 ပူးပေါင်းရင်းမြစ်များ

Mateu 15:28

Morara kary etaryke tyya ynara tykase Jezu eya: — To! Kuenetupuhno yronymyryme. Tonetupuhse jexiryke oya, ãkorehmãko ase, tykase Jezu eya. Mame axĩ mokyro ẽxiry toekurãkase ropa, morara karyke rokẽ Jezu a.

Mateu 17:18

Mame zae joroko tutũtanohpose Jezu a. Joroko tutũtase ahtao mokyro ae kure toehse ropa mõtoino rokene, joroko ke taõkemỹpo.

Mateu 8:13

Mame ynara tykase Jezu sajẽtu a: — Ytoko ropa atapyĩ taka. Tonetupuhse oya jexiryke opoetory nekurãka ropa. Mame toytose ropa ynororo tytapyĩ taka. Mame typoetory tonese eya. Pake toekurãkase ropa kynexine Jezu omi poe.

Mateu 9:2

Mame pakaihkapỹ tonehse imehnomo a etueh tapoe. Jezu jamitunuru waro toexirykõke, Ritonõpo mũkurume Jezu tonetupuhse tyya xine exiryke kurãkara tarose eya xine. Mame toto a tonetuputyry eneryke tyya, ynara tykase Jezu ytoytopyny a: — Enaromyra exiko aimo. Oorypyry korokãko ropa ase, tykase Jezu eya.

Mateu 9:29

Morarame toto enuru apone Jezu tomary ke. Ynara kynako eya xine: — Jenetuputyryke oya xine, okurãkatorỹko ropa ase, tykase Jezu eya xine.

Maku 10:52

Mame Jezu a tozuhse: — Ytoko. Tonetupuhse oya jexiryke okurãkãko ropa ase. Axĩ tonure toehse ropa ynororo. Mame Jezu maro toytose ynororo osema ae.

Maku 5:34

Morarame ynara tykase Jezu: — Kuku, jupõ mytemuhmano okurãkatohme. Kuenetupuhno. Morara exiryke kure ytoko ropa. Tukurãkase ropa mase, tykase Jezu eya.

Ruka 17:19

Mame ynara tykase ynororo ipũ imotahpyrỹpyry a: — Owõko. Ytoko ropa. Ritonõpo enetuputyryke oya tukurãkase ropa mase, tykase Jezu eya.

Ruka 18:42

Ynara tykase Jezu eya: — Osenuhmako ropa. Tonetupuhse jexiryke oya tukurãkase ropa mase, tykase.

Ruka 7:50

Mame ynara tykase Jezu nohpo a: — Tonetupuhse oya jexiryke typynanohse mase. Ytoko ropa. Torẽtyke pyra exiko, tykase Jezu eya.

Ruka 8:48

Morarame ynara tykase Jezu eya: — Kuku, tonetupuhse jexiryke oya tukurãkase ropa mase. Naeroro oserehpyra exiko. Kure rokẽ ytoko ropa, tykase Jezu eya.

João 4:53

Moro poko tutuarõtase jumy Jezu omihpyry poko: “Omũkuru kure ropa nexino,” katopõpyry ae ro imũkuru tõxirohkehse. Naeroro Jezu tonetupuhse eya tosẽme, typoetory tõ maro.

Atos 14:9

Mokyro a Pauru omiry totase kure. Zae tonetupuhse eya, tukurãkary ropa waro Ritonõpo ehtoh tonetupuhse roropa eya. Mame Ritonõpo omiry enetuputyry eya eneryke tyya

Atos 16:18

Morara kary poko tuhke tõmehse ynororo. Morarame toemynyhmaryke ynara tykase Pauru joroko a: — Jezu Kyrixtu omi poe aaropõko ropa ase. Zae otũtako ropa, tykase joroko a Pauru. Morara kary etaryke tyya joroko tutũtase ropa zae nohpo ae.

Epereu 4:2

Moro omi kurã totase kyya xine, mokaro pakatokõ saaro. Totase eya xine repe. Yrome otato pyra toh toehse onenetupuhpyra toexirykõke.