Mateu 21:43 - Ritonõpo Omiry: A Bíblia Sagrada na língua Aparai do Brasil

⁴³ — Ynara kary se roropa ase oya xine, tõmipona orirykõ se Ritonõpo kynexine repe. Yrome aomipona pyra oexirykõke tynekarohpyry oya xine puxihkãko ropa mana imehnomo a ekarotohme ropa. Mame mokaro zae exĩko mã toto, Ritonõpo omipona exĩko.

Mateu 21:43 ပူးပေါင်းရင်းမြစ်များ

Exutu 19:6

Amarokõ tapiakase ya, imehnõ wino jomipona oehtohkõme, ymaro oturuketõme sã oehtohkõme.” Morara kaxiko Izyraeu tomo a, tykase Ritonõpo Moeze a.

Izaja 26:2

Pata omõtoh etapuruhmakatoko Ritonõpo poetory tõ omõtohme, aomipona exiketomo te, zae ehtoh poko exiketomo, enara.

Izaja 28:2

Orutua jamihmã enehpõko Ritonõpo mana, orẽpyra exikety; konopoimo topuxikirime exikety sã oehnõko mana, tyryrykane jamihmã samo, emero enahkane sã roropa. Konopo jamihmã samo, tuna tukumase ahtao zueme exikety samo. Emero enahkapõko mokyro mana!

Mateu 12:28

Joroko tamuru poe pyra ase. Ritonõpo Zuzenu poe joroko tõ tũtanohpõko ropa ase. Moro eneryke oya xine tuaro exĩko matose. Emero esẽme Ritonõpo exiry waro exĩko matose. Tarona roropa tooehse ynororo mana oya xine.

Mateu 21:41

— Mokaro xityã etapãko sãtã mana, tykase toto. — Morarame tutupi ekarõko imehnomo a mana kurãkomo a, tutupi eraseme toto ehtohme. Zae uwa epery apiakãko mã toto toperytase ahtao, tykase toto.

Mateu 21:42

Ynara tykase Jezu eya xine: — Ritonõpo omiry onysekeremara ro matou? Ynara tymerose mana: “Tapyi risẽ sã mokyro mana, tapyi rinanõ nurumekahpyry samo. ‘Popyra sero nase,’ tykase toh repe. Yrome tapyi nikapuru apoihtyme toehse kure exiryke, tũpore, jamihme tapyi ehtohme. Morara tyrise Kuesẽkomo a. Morara exiryke kure mana. Kyzamaro xine mana,” me tymerose Ritonõpo omiryme.

Mateu 21:44

Ritonõpo nymenekahpyryme ase. Yzehno awahtao xine etuarimãko matose topu pona aepukahpyry samo. Yrome ozehno xine jahtao popyrahxo oya xine mana ipunaka. Etuarimakehpyra exĩko matose. Topu konõto nutũmahpyry sã roropa matose exĩko, tykase Jezu.

João 3:3

— Zae rokẽ ynara ãko ase oya, enuruzomopyra awahtao xine, Ritonõpo tuisame exiry onenepyra ekurehnõko matose, tykase Jezu eya.

João 3:5

— Zae rokẽ ase ynara ãko oya, tõpurihkase awahtao xine kure repe. Yrome Ritonõpo Zuzenu poe oenururukohtao rokẽ Ritonõpo poenõme exĩko matose. Morara ahtao rokẽ Ritonõpo esaka omõnõko matose.

1 Korĩtiu 13:2

Otarãme Ritonõpo omi poe aomiry ekarõko ase imehnomo a. Otarãme emero poko zuarohxo ase atamorepaketõ samo. Otarãme imehnõ motye tupimãkõ waro roropa ase. Otarãme Ritonõpo jamitunuru enetuputyryke ya ypy tõ enuẽnapory waro roropa ase repe, yrome imehnõ pyno pyra jahtao otyme kure hano Ritonõpo a? Arypyra ipunaka.

1 Peturu 2:9

Yrome matose mokaro sã pyra. Ritonõpo nymenekatyãme matose. Tuisa konõto poetoryme matose, Ritonõpo maro oturuketõme sã roropa matose. Tukurãkase matose. Ritonõpo poenõme matose. Tymenekase matose: “Ritonõpo kure mana,” katohme imehnomo a: “Emero zuaro Ritonõpo mana,” katohme roropa imehnomo a. Tymenekase matose eya oorypyrykõ poko pyra oehtohkõme, kure ehtoh poko rokẽ oehtohkõme tysaaro.