Mateu 19:4 - Ritonõpo Omiry: A Bíblia Sagrada na língua Aparai do Brasil

⁴ Ynara tykase Jezu: — Ritonõpo omiry onysekeremara ro matou? Ynara tymerose pake: “Emero tyrise ahtao Ritonõpo a, orutua tyrise eya nohpo maro.”

Mateu 19:4 ပူးပေါင်းရင်းမြစ်များ

Jenexi 1:27

Moro sã ahno tyrise Ritonõpo a; tysã tyrise toto eya. Tyrise toto eya orutuame, nohpome, enara.

Jenexi 2:18

Moromeĩpo ynara tykase Ritonõpo: — Toiroro mose ehtoh popyra nase. Imepỹ rĩko ase imarõme aehtohme, akorehmaneme, tykase.

Jenexi 2:23

— To! Mose kure ipunaka! Upũ mose ro, yzehpyry roropa. “Nohpome” mose esehpãko ase upũ risẽme exiryke, tykase ynororo.

Jenexi 5:2

Orutua te, nohpo roropa tyrise toto eya, kure rokẽ tyrise toto eya, mame “ahnome” tosehpase toto eya.

2 Koronika 24:3

Asakoro nohpo tõ tymenekase Joiata a tuisa Joaxi pyxiãme. Toemũkuase Joaxi imũkuru tomo ẽxiry tomo, enara.

Marakia 2:15

Ajohpe pyra mana: toiro pũme sã amarokõ tyrise Ritonõpo a ouzenukõ maro typoetoryme oehtohme. Oty se Ritonõpo nae oya xine, opyty maro? Oemũkuarykõ se mana, typoenõme toto ehtohme, tõmiry omipona aehtohkõme. Morara exiryke tomeseke ehtoko anamonohpyra oehtohkõme, opyty kuroko ytopyra oehtohkõme imepỹ nohpo poko.

Mateu 12:3

Ynara tykase Jezu eya xine: — Pape imerohpyry onenepitopyra ro hmatohu Tawi poko typoetory tõ maro, omise toto ehtopõpyry poko? (Kytamurukõme Tawi kynexine. Tuisame roropa kynexine.)

Mateu 21:42

Ynara tykase Jezu eya xine: — Ritonõpo omiry onysekeremara ro matou? Ynara tymerose mana: “Tapyi risẽ sã mokyro mana, tapyi rinanõ nurumekahpyry samo. ‘Popyra sero nase,’ tykase toh repe. Yrome tapyi nikapuru apoihtyme toehse kure exiryke, tũpore, jamihme tapyi ehtohme. Morara tyrise Kuesẽkomo a. Morara exiryke kure mana. Kyzamaro xine mana,” me tymerose Ritonõpo omiryme.

Mateu 21:6

Morara exiryke Jezu omi poe toytose ipoetory. Emero tyrise toto a.

Mateu 22:31

Mame aorihtyã ẽsemãkapory ropa poko Ritonõpo omiry onysekeremara ro matou? Ynara tykase Ritonõpo:

Maku 12:10

— Ritonõpo omiry onenepyra ro matou? Meneatose ro. Ynara tymerose eya: “Tapyi rinanõ nurumekahpyry: ‘Topu popyra,’ karyke eya xine, mororo tyrise ropa tapyi kyryryme, kure exiryke tũpore, jamihme tapyi ehtohme.

Maku 12:26

Aorihtyã ẽsemamyry ropa poko Moeze omihpyry onenepitopyra ro hmatou? tykase Jezu eya xine. — Moeze a Ritonõpo tõturuse pika myhto. Ynara tykase ynororo: “Aparão esẽme ase, Aparão te, Izake te, Jako te, enara ase toto esẽme,” tykase Ritonõpo Moeze a aorihtyã poko.

Maku 2:25

Morarame Jezu a tozuhse toto. Ynara tykase ynororo: — Pape imerohpyry onenepitopyra hmatou Tawi ehtopõpyry poko, typoetory tõ maro omise toto ahtao?

Ruka 10:26

Mame ynara tykase Jezu eya: — Otara ãko Ritonõpo nymeropohpyry nah? Oty enetupuhnõko hma? tykase Jezu eya.

Ruka 6:3

Morarame Jezu a tozuhse ynaroro: — Tawi tõ ehtopõpyry poko onysekeremara ro hmatou? Mokyro omise toehse, typoetory tõ maro.