Marakia 2:6 - Ritonõpo Omiry: A Bíblia Sagrada na língua Aparai do Brasil

⁶ Zae ehtoh poko imehnõ anamorepakehpyra toh nexiase. Azahkuru ehtoh poko imehnõ anamorepara toh nexiase. Osepeme ynanexiase moroto. Zae ehtoh poko imehnõ tuhkãkõ takorehmase roropa eya xine zae pyra toehtohkõ rumekatohme eya xine.

Marakia 2:6 ပူးပေါင်းရင်းမြစ်များ

Jenexi 17:1

Morarame 99me jeimamyry taropose Aparã ahtao tõsenepose ropa Ritonõpo eya, ynara tykase ynororo eya: — Ywy ase Ritonõpo Jamihmehxo Exikety. Jomiry omipona exiko, zae ehtoh poko rokẽ exiko roropa.

Jenexi 6:9

Sero nase Noe ehtopõpyry poko. Toemũkuase ynororo oseruao: Sem te, Kam te, Jape, enara. Zae exiketyme Noe kynexine, Ritonõpo omipona. Sero nono põkõ rãnao, Noe rokẽ Ritonõpo maro oturuketyme kynexine.

Saumu 119:142

Zae oehtoh jũme exikehpyra mana, õmihpyry jũme zae roropa mana.

Saumu 119:151

Yrome omoro, Ritonõpo, ameke pyra mase ya; onyripohpyry tõ emero zae mã kehko.

Saumu 37:30

Tuaro exiketõme mã oturũko mã toto, zae ehtoh poko exikehpyra aomirykõ mana.

Saumu 37:37

Zae ehtoh poko exiketõ eneko, ajohpe pyra exiketõ roropa; atatapoipyra exiketõ typoenõke, typakõke roropa mã toto,

Porowepio 5:2

Moro sã awahtao zae ehtoh poko zuaro exĩko mase, õmiry roropa tyriko imehnomo a enetupuhtohme zuaro oehtoh poko.

Jeremia 23:22

Josenetupuhtoh tokare pyra aexityã waro toto ahtao, jomiry ekarory waro toto exiry, ypoetory tõ takorehmase exiry eya xine azahkuru toto ehtoh rumekatohme eya xine, popyra toto ehtoh rumekary roropa eya xine.

Tanieu 12:3

Mokaro tuaro exiketõ, imehnõ tuhkãkõ amorepananõ zae ehtoh poko toto ehtohme, zemimã sã exĩko mã toto, xirikuato sã kapu poko, jũme osezehkara sã exĩko mã toto.

Ozeja 4:6

Ypoetory tõ ypoko tuaro se pyra mã toto. Morara exiryke osenahkãko mã toto. Amarokõ roropa, oturuketomo, ya tuaro se pyra matose, ynyripohpyry poko tuenikehse oya xine. Naeroro oturuketõme orumekatorỹko ase, omũkuru tõ se pyra ase roropa ymaro oturuketõme.

Mateu 22:16

Mame typoetory tõ taropose eya xine Jezu a, Erote epe tõ maro. Ynara tykase toto Jezu a: — Zae rokẽ yna amorepãko mase. Awaro ynanase. Ritonõpo omiry poko yna amorepãko mase. Torẽtyke pyra roropa mase opoko. Okerekeremaryhtao imehnomo a oty kara mase. Oenery poko roropa imehnomo a oty kara mase.

Maku 12:14

Mame toytose toto Jezu a. Ynara tykase toto eya: — Amorepatõ mase. Awaro ynanase. Ajohpe pyra mase ipunaka. Imehnõ zuno pyra roropa mase. Tuisame ahtao, tuisame pyra ahtao, oxisã rokẽ mã toh oya. Zae Ritonõpo omiry poko amorepatõ mase. Yrome kure kowenu tinerũ epehmary yna a? Kure onepehmara yna exiry? Oty kurehxo? tykase toto eya, tõturupose.

Ruka 1:6

Mokaro oximaro kure rokẽ toh kynexine Ritonõpo a. Ritonõpo omipona toh kynexine ipunaka, inymeropohpyry omipona roropa toh kynexine.

Ruka 20:21

Morara exiryke enenanõ toytose Jezu ekahmase. Ynara tykase toto Jezu a: — Amorepatõ mase, zae rokẽ yna amoreparyke oya. Imehnõ zuno pyra mase. Ritonõpo omiry zae ekarõko mase imehnomo a, tykase toto. Kure sã tõturuse toto eya repe.

Atos 26:18

Toto amorepase ytoko ajoajohpe pyra aehtohkõme, joroko tamuru rumekatohme eya xine, Ritonõpo omipona rokẽ toto ehtohme. Iirypyrykõ korokãko ase tosẽkõme jenetuputyryhtao eya xine. Esarykõ ekarõko ase eya xine ypoetory tõ maro,” tykase Jezu ya.

Teuteronomiu 33:10

Onyripohpyry tõ poko opoetory tõ amorepãko mã toto, ixtaratu zahkãko mã toto oẽpataka, okyryry apoto apõ po tynekarory tõ zahkãko mã toto.

Teuteronomiu 33:8

Rewi tõ poko ynara tykase ynororo: “Ritonõpo, tyriry se oehtoh enetupuhpõko mase Urim ke, Tumĩ maro opoetory tomo a, anamonohpyra exiketomo a, Rewi tomo a. Tukuhse toh nexiase oya Masa po. Mame tuna enatyry tõ pũto Meripa po zae toto ehtoh menepoase.

Teuteronomiu 33:9

Anamonohpyra toh nexiase onetapohpyry omipona, tumykõ pyno toehtohkõ motye opyno toh nexiase, takorõ tõ pyno ehtoh motye, tumũkuru tõ pyno ehtoh motye roropa opyno nexiase toto. Onyripohpyry tõ omipona toh nexiase.

Apokaripxi 14:5

Toipe mã toto ajohpe pyra. Zae rokẽ mã toto Ritonõpo a.

1 Samueu 2:12

Eri poenõ asakoro natokomo popyra toh nexiase, Ritonõpo omiry onymoipyra toh kynexine.