Juize 5:23 - Ritonõpo Omiry: A Bíblia Sagrada na língua Aparai do Brasil

²³ “Pata Meroze popyra tyripoko,” ãko Ritonõpo nenyokyhpyry; “Popyra tyripoko, moro pata põkõ popyra tyripoko, oehpyra toto exiryke Ritonõpo akorehmase, soutatume oehpyra tokurehse toto osetapase Ritonõpo poetoryme.”

Juize 5:23 ပူးပေါင်းရင်းမြစ်များ

Neemia 3:5

Mokyro mykapo orutua kõ, Tekoa põkõ toerohse nexiase. Yrome mokaro tamuximãkõ toerokurukõ se pyra toh nexiase tomarykõ ke tyrohmanohpose toto ahtao erohtoh erasamo a.

Saumu 94:16

Onoky towõse ymaro popyra exiketõ poremãkatohme? Onoky ymaro nexiase popyra ehtoh poko exiketõ akorekehkatohme?

Jeremia 48:10

Popyra ehtoh enehpoko mokyro ajoajohpe rokẽ Ritonõpo nyripohpyry poko exikety! Popyra ehtoh oehnõko mokyro a soutatume ahtao yrome onuopyra ynororo ahtao!

Mateu 25:41

— Mame imoihmãkomo a roropa typozery wino exiketomo a roropa ynara ãko mana: “Mya ytotoko. Ritonõpo ozehno xine mana. Apotoimo htaka ytõko matose. Moro apotoimo tyrise Ritonõpo a joroko tamuru wãnohtohme, inenyohtyã wãnohtohme roropa, enara.

Romanos 15:18

Pake Kyrixtu poe juteutõkara amorepary poko exiase, enetupuhtohme toto a, Ritonõpo omipona toto ehtohme. Aomipona toehse mã toto jomiry etaryke tyya xine te, kure jehtopõpyry eneryke roropa tyya xine. Morara kary poko ihximyra ase.

1 Korĩtiu 16:22

“Kuesẽkõ se pyra exiketõ wãnohnõko Ritonõpo mana,” ãko ase. “Osehko ropa Jezu,” ãko ase, Kuesẽkõ oepyry ropa se jexiryke.

1 Korĩtiu 3:9

Ritonõpo tupi sã matose. Tupito esẽ tutupi pyno exiry sã opyno xine Ritonõpo mana. Ritonõpo tupi poko erohketõ sã ynanase Aporu maro. Ãmorepatorỹko ynanase. Tapyi esẽ tytapyĩ pynanopyry sã roropa opynanohtorỹko Ritonõpo mana. Itapyĩ sã matose.

2 Korĩtiu 6:1

Erohnõko ynanase Ritonõpo maro. Naeroro ajohpãme sã okurãkatopõpyrykõ Ritonõpo a onurumekara ehtoko.

Juize 13:3

Ritonõpo nenyokyhpyry tõsenepose nohpo a, ynara tykase ynororo eya: — Emũkuasaromepyra mexiase, poetoẽme exisaromepyra. Yrome seromaroro poetoẽme exĩko mase, enurũko mã orutuame.

Juize 2:1

Ritonõpo nenyokyhpyry toytose Kiukau poe Pokĩ pona Izyraeu tõ zuruse, ynara tykase ynororo: — Kuapoiatose Ejitu nonory po awahtao xine, kuenepyatose xiaro, sero nono pona, ynekarohpyry pona atamurukomo a. Ynara akene eya xine: “Jũme jomihpyry onytyoromara ase.

Juize 21:5

Tõturupose toto: — Izyraeu tõ oxiekyryme exiketõ poe emero, onokãkõ rokẽ onuhpyra tokurehse oximõtoh pona, Mixipa pona, Ritonõpo ẽpataka? Apitoryme tõmirykõ totapose Ritonõpo a: ytopyra exiketõ oximõtoh taka, Ritonõpo ẽpataka, Mixipa pona, mokaro mã totapasẽme ytopyra toehse toto exiryke.

Juize 21:8

Naeroro tõturupose toto: — Izyraeu tõ oxiekyryme exiketõ poe, onokãkõ oehpyra tokurehse Ritonõpo ẽpataka, Mixipa pona? Mame tuaro toehse toto: Jape-Kireate põkõ emero oehpyra tokurehse toto oximõtoh taka.

Juize 4:6

Mokyro a Parake, Apinoão mũkuru tonehpose tyya, pata Ketese po ynororo ahtao, Napatari nonory po. Ynara tykase ynororo eya: — Ritonõpo, Izyraeu tõ Esẽ mã ynara tyripõko oya: “10 miume orutua kõ imenekako Napatari tõ wino Zepurõ tõ wino roropa, toto arotohme ypy Tapoa pona.

Juize 5:13

Mame toytose toto, enetuputyhpõkomo tutuisarykõ esaka, Ritonõpo Kuesẽkõ poetory tomo, tõsetapatohkõ eraximaryme, mame toytose toto oseporyse Parake maro.

Juize 6:11

Mame Ritonõpo nenyokyhpyry tooehse, typorohse ynororo wewe konõto myhtokoxi pata Opara pũto. Moro wewe esẽ kynexine Joaxi, Apieze ekyry. Imũkuru Kiteão erohnõko kynexine, tiriiku kyrỹko uwa euhkatoh tao, tõtonẽse moro ao, onenepyra mitianita tõ ehtohme.

Juize 8:5

Mame tonahsẽ tokaropose Kiteão a Sukote põkomo a. Ynara tykase ynororo: — Mitianita tõ ekahmãko ro ynanase: Zepa, Saumuna, enara. Mokaro ymaro exiketõ totaehse mã toto. Ajohpame sã tonahsã ekarotoko eya xine.

Juize 8:6

Yrome tozuhse ynororo Sukote tamuximãkomo a: — Otyme kure tonahsẽ ekarory yna a opoetory soutatu tomo a? Zepa tõ Saumuna maro anapoipyra ro matose!

Juize 8:8

Mame Penueu pona toytose Kiteão, tonahsẽ tokaropose orutua komo a, morotõkomo a repe. Yrome onekaropyra, Sukote põkõ omihpyry saaro tozuhse ynororo eya xine.

1 Samueu 17:47

Mame Izyraeu tõ roropa tuaro exĩko mã toto Ritonõpo poko. Ahno pyre, warata tõkehko se pyra mana ipunaka typoetory tõ pynanohtohme. Kuesẽkõ rokẽ oetapãko mana, ynoro rokẽ oporemãkapõko mana yna a, tykase Tawi.

1 Samueu 18:17

Morarame ynara tykase Sauu Tawi a: — Mose, Merape, jẽxiry apitorymano. Mose ekarõko ase oya opytyme. Oty se rokẽ hano oya? Ypoetoryme rokẽ oexiry se ase, soutatume, orẽpyra exiketyme, Ritonõpo Kuesẽkõ omipona exiketyme osetaparyhtao, tykase Sauu. Tõsenetupuhse Sauu tukurohtao rokene: “Kure ya pirixteu tomo a Tawi etapary. Morara ahtao onetapara ase, totapase eya xine exiryke.”

1 Samueu 25:28

Ajohpãme sã zae pyra jehtopõpyry ikorokapoko. Mame Ritonõpo orẽpyra orĩko mana, okynã sã tuisame oehtohme opoenomo te, apakomotyã roropa, enara. Ynara exiryke, Ritonõpo omipona rokẽ etonãko mase. Morara awahtao zae rokẽ mase exĩko oorikyryponãmero, tykase.

1 Samueu 26:19

Seromaroro jomiry etako. Yzehno oexiry Ritonõpo poe ahtao, jeky kaneru ekarõko ase jahkatohme yyrypyry korokapotohme eya. Mãpyra ahno poe rokẽ ahtao, toto wãnohpory se ase Ritonõpo a. Jesary poe taropose ywy eya xine, Ritonõpo nekarohpyry poe. “Ytoko taroino, katonõ tõ neponãmary eahmase,” ãko sã toh mã ya.