Juize 18:24 - Ritonõpo Omiry: A Bíblia Sagrada na língua Aparai do Brasil

²⁴ — Arypyra. Ykyryry tõ ritõ panõ tarose oya xine ynyrityamo, jamorepane roropa, oturukety Ritonõpo maro, tarose oya xine. Oty tynomose oya xine ykyryryme? tykase ynororo eya xine.

Juize 18:24 ပူးပေါင်းရင်းမြစ်များ

Jenexi 31:30

Zuaro ase: omuhpe oexiryke omy tõ poko, toytose omoro. Yrome oty katohme yneponãmary tomatonanohse roropa oya, ytapyĩ taono? tykase.

Jenexi 31:34

Tupise eya repe. Yrome tykyryry onenepyra tokurehse ynororo. Ineponãmary tonẽse Rakeu a kameru kyryry aka, epona typorohse ynororo.

2 Koronika 25:15

Tyenonohse Ritonõpo Amazia nyrihpyry eneryke tyya. Mame urutõ tonyohse eya tuisa zuruse. Ynara tykase ynororo eya: — Oty katohme imehnõ neponãmary eahmãko mah? Tosẽ onewomasaromepyra nexiase morohne onetapara imehnõ ehtohme.

Saumu 115:8

Ah mokaro tynyrityã sã, tyneponãmarykõ sã nexĩ toto: tyrihpõkomo te, tyneponãmarykõ eahmananõ roropa!”

Jeremia 50:38

Ah nenahno itunarykomo, nono tonore rokẽ ehtohme. Papironia nonory pehme mana tyneponãmarykõke, ahno naxikatyamo; mokaro pokoino rowohpe sã toehse mã toto.”

Jeremia 51:17

Morohne eneryke tyya xine ahno tõ emero putuhtome sã, tuaro pyra exiketõ sã osekarõko mã toto. Mokaro neponãmary rinanõ tãkye pyra exĩko mã toto tynyrityã ajohpãkõ, isene pyra exiryke.

Ezekieu 23:5

Mame ypytyme tahtao ro imehnõ maro exikehpyra Oora nexiase. Typenetase ynororo axirio tõ poko, tymaro se exiketomo.

Atos 19:26

Yrome mokyro kahpyry omiry etãko matose. Enẽko roropa matose. Kynyrihpyrykõ rumekapõko mana imoihmãkomo a Epezu põkomo a rokẽ pyra, Azia põkomo a roropa kynyrihpyrykõ rumekapõko mana: “Ritõ kara moxiamo, ahno nyrityã rokene,” ãko mana kynyrihpyrykõ poko.

Apokaripxi 17:2

Sero põkõ tuisary tõ mokyro poko toehse toto musurehpã poko toehse, nohpo poko exiketõ samo. Etỹketõ sã ipoko toehse toto sero nono põkomo, eukuru onẽkehpyra exiketõ samo, nohpo poko exikehpyra exiketõ sã roropa.

Juize 17:13

Ynara tykase Mika: — Zuaro ase. Seromaroro Ritonõpo poe emero kure exĩko ya, rewita nae jexiryke, oturuketyme Ritonõpo a.

Juize 17:5

Osa nae Mika nexiase Ritonõpo poko ehtohme. Imehnõ ritõ panõ tyrise roropa eya, upo roropa tyrise eya Ritonõpo maro oturukety zupõme. Tumũkuru toiro tymenekase eya Ritonõpo maro oturuketyme ehtohme.

Juize 18:23

Mame kui kui kary etaryke tyya xine, mokaro oepyry Tã tõ mykapo, tỹkakoxi toeramase toto, tõturupose Mika a: — Otara toehse amarokomo? Oty kase mokaro imoihmãkõ noehno? tykase.

Juize 18:25

Ynara tykase Tã tõ eya: — Kurehxo oya exiry mynyhme rokẽ oehtopo. Õmiry etaryhtao otarame moxiã ozehno exĩko, mame oryhmãko mã toto. Morara ahtao orihnõko mase emero atapyĩ taõkõ maro.