10 Mame tururume toytose nohpo eya ynara kase: — Mokyro ro toehse ropa ymaro mokokonie aoturuhpyry tõsenepose ropa ya.
Morararo tynio tupise nohpo a oturuse imaro, ynara tykase ynororo eya: — Ritonõpo poe urutõ tõturuse ya. Ritonõpo nenyokyhpyry sã kynako, jerehno pitiko rokẽ pyra. Otokoino toehse ynororo onekaropopyra akene. Tosety onekaropyra roropa kynako.
Mame morara tyrise Ritonõpo a Manoa omihpyry ae: Inenyokyhpyry tõsenepose ropa ipyty a typorohse ahtao tupito po. Inio ameke kynexine.