Juize 10:13 - Ritonõpo Omiry: A Bíblia Sagrada na língua Aparai do Brasil

¹³ Yrome typynanohse awahtao xine ya kurumekatose imehnõ ritõ tõ eahmatohme oya xine. Naeroro opynanohpyra xine ropa ase.

Juize 10:13 ပူးပေါင်းရင်းမြစ်များ

1 Koronika 28:9

Mame tumũkuru Saromão a ynara tykase ynororo: — Aimo, oya ynara ãko ase, Ritonõpo omy esẽ enetupuhko, aomiry omipona exiko, ynoro rokẽ pyno exiko, ỹme exiko aomihpyry omipona. Kuosenetupuhtohkõ waro mã ynororo te, kypenetatohkõ roropa. Eya oytoryhtao opynanohnõko mana; yrome irumekaryhtao oya, orumekãko roropa mana jũme.

2 Koronika 12:5

Mame urutõ Semaia toytose Ropoão a imehnõ Juta tõ tamuximãkõ maro, Jerusarẽ po tõximõse toh kynexine Xisake kurũke. Ynara tykase ynororo eya xine. — Ynara ãko Ritonõpo mana oya xine: “Turumekase ywy oya xine. Naeroro orumekatorỹko ase Xisake poetoryme oehtohkõme,” tykase.

2 Koronika 15:2

Toytose ynororo tuisa Asa zuruse. Ynara tykase ynororo eya: — Tuisa Asa, Juta tõ maro emero, etatoko pahne! Ritonõpo Izyraeu tõ Esemy amaro xine mana, imaro awahtao xine. Zupiryhtao oya xine osenepõko oya xine mana. Yrome irumekaryhtao oya xine orumekatorỹko roropa mana.

2 Koronika 21:10

Morotoino etomita tõ Juta poetory tõme exipyra ropa toehse toh kynexine. Mame morara ahtao pata Ripina põkõ roropa Juta tõ tuisary turumekase eya xine. Moro sã toehse Ritonõpo turumekase Jeorão a exiryke, tytamuru tõ Esemy.

Jeremia 2:13

Azahkuru ehtoh asakoro tyrise ypoetory tomo a: turumekase ywy eya xine, itunary kurã enatyryme jahtao te, pẽkamã tahkase roropa eya xine tutunary ẽme ehtohme, konopo tunary kurãkatohme repe. Yrome toto tunary ẽ toerakase mã kehko, erurukaneme sã mã toehse kehko.”

Jeremia 2:19

Popyra oehtopõpyrykõ awãnohtorỹko mana, Tuãnohsẽme exĩko matose turumekase oya xine jexiryke. Tuaro exĩko matose popyra jurumekary ehtoh poko oya xine, itunetyme exikety sã mana Oesẽkõ Ritonõpo rumekary oya xine, jomiry omipona pyra oexirykomo, enara. Ywy, Oesẽkomo Ritonõpo Jamihmehxo Exikety, oturũko ase.”

Jona 2:8

Mokaro tyneponãmarykõ xihpyry eahmananomo a turumekase omoro Tosẽkõme.

Teuteronomiu 32:15

Tymõkomoke toehse Ritonõpo poetory tomo, tytineruke toehse, tomãse toto, tupune toehse, tuesapare roropa. Mame Ritonõpo turumekase eya xine; Towomanekõ omipona se pyra toehse toh nexiase, typynanohnekomo.

Juize 10:14

Seromaroro ytotoko onymenekahpyrykomo a, ritõ kõ kuhsamo a, ãkorehmatohkõme eya xine. Otarame ãkorehmatorỹko mã toto oetuarimarykohtao.

Juize 2:12

Ritonõpo tytamurukõ Esẽ eahmary turumekase eya xine, toto enepyhpono Ejitu poe. Imeimehnõ ritõ kõ toahmase eya xine Ritonõpo myakãme. Imehnõ neponãmarykõ eahmaryke eya xine tyekĩtapãse Ritonõpo toto poko ipunaka.

Juize 2:19

Yrome mokyro tuisa toorihse ahtao, toeramase ropa toto tyyrypyrykõ poko toehtohkõme ropa. Tytamurukõ popyra ehtopõpyry motye toehse toto. Imehnõ neponãmary poko toehse toto, eahmatohme Ritonõpo myakãme. Tuaro pyra exiketõ sã toehse toto. Popyra toehtopõpyrykõ onurumekara toehse toto.