Jona 1:6 - Ritonõpo Omiry: A Bíblia Sagrada na língua Aparai do Brasil

⁶ Mame tyhtose wapu tuisary ahtao Jona tonese eya, ynara tykase: — Oty katoh nyhnõko rokẽ mah? Owõko ty! Oturuko oneponãmary a, kypynanohtohkõme eya. Otarame kypyno xine ynororo ahtao kuorihmapopyra xine mana, tykase ynororo Jona a.

Jona 1:6 ပူးပေါင်းရင်းမြစ်များ

2 Samueu 12:22

Ynara tykase ynororo: — Ỹ, isene poeto ahtao tyxitase ywy, otuhpyra roropa exiase, ynara enetuputyryke ya: Otarame Ritonõpo kure exiryke nupunato poeto enẽko mana. Mame anaorihmapopyra exĩko mana, ase repe.

Exite 4:16

“Juteu tõ emero oximõme tyripoko pata Susã põkomo, otuhpyra ehtoko õtururukõme ypoko. Oseruao ẽmepyry ae otuhpyra ehtoko otytyko onẽpyra ehtoko õtururukõme, saereme, koko, enara. Ywy roropa otuhpyra ase ypoetory tõ nohpo tõ maro. Moromeĩpo ytõko ase tuisa a oturuse, aomiry onymoipyra exikety samo. Mame moro pokoino taorihmapose jahtao, ‘Otara’ kara, orihnõko ase,” tykase Exite.

Saumu 107:6

Mame toetuarimarykohtao tykohtase toto Ritonõpo a takorehmatohkõme, mame typynanohse ropa toh nexiase eya aetuarimatohkõ winoino.

Saumu 78:34

Yrome toitoine totapase toto ahtao eya, tupise ynororo orihpyra exiketomo a; toeramase ropa toto tyyrypyrykõ rumekary se toehse toto, yronymyryme tõturuse toto Ritonõpo a.

Izaja 3:15

Zae pyra matose ypoetory tõ ryhmaryhtao oya xine tymõkomokãkara rohmanohporyhtao oya xine.” Ywy, Ritonõpo Jamihmehxo Exikety, ourutorỹko ase.

Ezekieu 18:2

— Oty katohme Izyraeu tõ nonory po sero tuaro exikety omihpyry omiãko toh nae: “Jũkomo a uwa ikataĩ aexityã tonahse, mame ipoenõ zery tyekykytase samo?”

Joeu 2:11

Konomeru sã soutatu tõ tyripõko Ritonõpo mana; ipoetory tõ osetapaketõ ikuhpỹme mã toto, orẽpyra aomiry omipona exiketõ mana. Ritonõpo ẽmepyry enaroximatoh imehxo mana, orekohmato konõto. Onoky moro eanahtõko nae?

Amoxi 5:15

Popyra ehtoh se pyra ehtoko, zae ehtoh se rokẽ ehtoko. Imehnõ ewomatoko ajohpãkomo a ihxiroryhtao apiakane ẽpataka. Otarame Ritonõpo Oesẽkõ, Jamihmehxo Exikety oekyry tõ akoĩpyry pyno exĩko mana.

Jona 3:8

Upo amurutoko kamisa topuxiximã risẽ rokene, oekykõ roropa! Mame oturutoko yronymyryme Ritonõpo a te, zae pyra oehtohkõ irumekatoko oorypyrykõ roropa.

Jona 3:9

Otarame Ritonõpo nupunato kuenetorỹko ropa mana. Otarame kyzehno xine exikehnõko mana. Morarahtao kuenahkapopyra xine exĩko roropa mana,” tykase tuisa.

Atos 21:13

Yrome ynara tykase ynororo: — Oty katoh xitãko matou? Jesenakunuhkapõko matose. Ymykyry zuno pyra ase. Jorikyry zuno pyra roropa ase. Jerusarẽ pona ytõko ase. Jyhtomaryhtao eya xine Jezu omiry pokoino oty kara ase jesẽme aexiryke, tykase ynororo yna a.

Romanos 13:11

Etatoko pahne, Jezu oepyry ropa waro matose. Naeroro ipakatyã sã ehtoko. Ritonõpo nymeropohpyry omipona kuahtao xine ipakatyã sã sytatose. Kyrixtu enetupuhpitoryhtao kyya xine okyna ro aepyry ropa kynexine. Okyna hkopyra aepyry ropa mana seromaroro.

Epezu 5:14

Ynara exiryke, emero tonepose ahtao saereme sã exĩko, jarao exĩko mana. Morara exiryke ynara tymerose imepyny a: “Nyhkety, apakako ty. Oẽsemãko ropa orihxĩpo, mame Kyrixtu saereh ãko mana opona,” me tymerose.