João 19:6 - Ritonõpo Omiry: A Bíblia Sagrada na língua Aparai do Brasil

⁶ Morarame Jezu eneryke tyya xine ynara tykase toto opore: — Wewe pokona exixihmapoko aorihtohme. Wewe pokona exixihmapoko aorihtohme, tykase toto. Jamihme tõmitase toto. Ynara tykase Pirato eya xine: — Amarokõ arotatoko. Exixihmatatoko. Ywy aorikyry se pyra ase repe. Morara exiryke arotoko, tykase eya xine.

João 19:6 ပူးပေါင်းရင်းမြစ်များ

Mateu 26:58

Ameke rokẽ Peturu ytõko kynexine toto ekahmãko Ritonõpo maro oturuketõ tuisary tapyĩ taka. Jarao rokẽ Peturu kynexine aporo eraximãko rokene. Mame jarakapyhpyry aka tomõse ynororo. Soutatu tõ maro typorohse ynororo eraximase rokene, Jezu orikyry enese.

Mateu 27:22

— Morara ahtao oty rĩko ywy Jezu Kyrixtu poko? tykase ropa ynororo eya xine. — Wewe pokona exixihmapoko, tykase toto oximõme.

Mateu 27:24

Mame mokaro ajoajohpe exiry eneryke tyya, tuna tapoise Pirato a tõsemahtohme imoihmãkõ neneryme. Ynara tykase ynororo: — Ywy ahtao mose anaorihmapopyra exiry zae se jexiryke. Mose etapary zae pyra ya mana iirypyryme pyra exiryke. Etapary se awahtao xine amarokohko, tykase ynororo eya xine.

Ruka 23:4

Morarame ynara tykase Pirato Ritonõpo maro oturuketõ tuisary tomo a, tuhkãkomo a roropa: — Mose hxirory se pyra ase azahkuru pyra exiryke ya, tykase.

João 18:3

Morara exiryke morotona toytose Juta, tupito pona. Tymaro soutatu tõ tarose Ritonõpo Tapyĩ erase tõ maro. Ritonõpo maro oturuketõ tuisary naropotyã mokaro kynexine, parixeu tõ naropotyã roropa kynexine. Typyreke toytose toto. Tozure roropa toytose toto, koko exiryke.

João 18:31

Ynara tykase Pirato: — Amarokõ ikuhtoko atamurukõ nymerohpyry poe, tykase eya xine. Yrome ynara tykase toto eya: — Omoro ro ikuhko kowenu omi poe aorihmapotohme. Kowenu omi poe ahno anaorihmaposaromepyra ynanase, tykase toto eya.

João 18:38

— Oty moro zae exiry? tykase Pirato eya. Morarame mya roropa tutũtase ropa Pirato. Ynara tykase ynororo eya xine: — Kure rokẽ nase ynororo, orihpỹme.

João 19:15

Mame ynara tykase toto eya: — Etapapoko ty! Etapapoko ty! Wewe pokona exixihmapoko, tykase rokẽ toh Pirato a. — Otuisarykõ exixihmapory se hmatou, wewe poko hna? tykase eya xine Pirato. Mame ynara tykase toto eya: — Toiro tutuisake ynanase. Ĩperatu rokẽ mã yna tuisaryme, tykase Ritonõpo maro oturuketõ tuisary tomo Pirato a.

João 19:4

Morarame Pirato tutũtase ropa tapyi tae. Ynara tykase ynororo imoihmãkomo a: — Mokyro enehse ropa ytõko ase onenerykõme. Aorihmapory se pyra ase. Oty pokoinohxo aorihmapõko ha, tykase Pirato eya xine.

Atos 2:23

Pake Ritonõpo zuaro kynexine, Jezu exixihmapotoh waro. Toxixihmapose oya xine, zehnotokomo a. Moro waro Ritonõpo kynexine Jezu orihpyra ro ahtao. Yrome: “Ah nexixihmã toto,” tykase Ritonõpo.

Atos 7:52

Urutõ kõ tyyryhmase atamurukomo a emero. “Ritonõpo mũkuru oehnõko mana,” kananõ totapase toto a. Mokaro saaro matose. Mokyro mexixihmatose tooehse ahtao.