17 Mokyro poko wenikehnõko imehnõ mana. Esety poko roropa wenikehnõko mã toto inonory põkomo.
Imehnõ amorepatoh tonõ oya xine oruno sã toiparo rokẽ mana; toto ezuhtoh oya xine jamihme pyra mana ipunaka, orino risẽ sã rokene.
Mokaro poko wenikehnõko jẽkõ roropa mana. Tyhmokasẽme exĩko toto moromoro tomo a, tonahkasẽme exĩko mã toto wewe aepukahpyry samo.
Ah ipoenõ norihno toto, ipakomotyã roropa axĩ wenikehtohme ipoko!
Ah Ritonõpo wenikehpyra nexino iirypyrykõ poko; yrome mokaro ehtoh poko ah wenikehtohme nexĩ toto.
Yrome popyra ehtoh poko exiketõ akorekehkãko mana; naeroro toorihse toto ahtao axĩ toto poko wenikehnõko mã toto.
Jepetõkara omiãko xihpyryme ypoko mã toto. Joorikyry se mã toto wenikehtohme ypoko.
Ynara ãko mã toto: “Ehmaropa! Izyraeu tõ enahkase, wenikehtohme toto esety poko jũme.”
Kuepetõkara patary tõ takuhkuhmose oya; tonahkase toto oya jũme tuenikehse ipunaka mã toto.
Zae ehtoh poko exiketõ poko wenikehpyra imehnõ mana kure toto nyrityã pokoino, yrome axĩ wenikehnõko mã toto popyra exiketõ poko.
Yrome popyra exiketõ itumehnõko Ritonõpo mana. Ãtaryka mukary sã iirypyrymãkõ oũko mana.
Ononory tykararahse oya exiryke, ononory põkõ totapase roropa oya exiryke oekepyry ononẽpyra ekurehnõko mã toto. Ah mokyro pakomotyã emero norihno toto tuisa popyra exiryke.
Mokaro ahno toorihse mã toto, oehpyra ropa mã toto isene toehtohkõme ropa; zuzenume rokẽ mã toto ẽsemãpyra ropa. Tuãnohse toto oya, tonahkase toto, ipoko xine tuenikehse imehnõ mana emero porehme.
Axiria tuisary poko ynara tykase Ritonõpo: “Emũkuara exĩko mana, naeroro mokyro esety poko wenikehnõko mã toto. Ritõ panõ enahkapõko ase, oneponãmarykõ eahmatoh tao. Axirio tõ ekepyry zonẽtoh ahkãko ase typahsẽme sã rokẽ toto exiryke.”