25 Ixinukuturu htoko toytorykõ kuhnõko mã toto, tonurãkara, osetapãko mã toto, toetỹse exiketõ samo.
Morarame jarãnao exiketõ emero tonukehkapose toto omõtoh onenepyra toto ehtohme.
Ezuru itapyĩ tao tozehsẽme exĩko, saerehkara roropa mana. Saerehkane esahpokoxi, xinukutume exĩko mana.
Tãxiahtao tykohmãse eya xine mana, tonurãkara sã tomarykõ ke osema zupĩko mã toto.
Tõsetapase toto, aetỹtyã sã toytose toto wapu kywyh karyke; emese kure aehtopõpyrykõ toto anakorehmara nexiase.
Ritonõpo poe otupĩko mã toto; morara exiryke Ejitu põkõ emero rĩko mã toto azahkuru rokene, oseosetapãko mã toto etỹketõ samo, epuepukãko sã mã toto tonarurukõ pona.
Sero nono wazawazame ytõko mana aetymyhpyry samo, kywyh kywyh ãko mana tapyi pitiko samo, tyryrykane jamihme ahtao. Popyra ehtoh poko sero nono põkõ ehtoh omoxinety sã mana; toepukase ahtao owõsaromepyra ropa exĩko mana.
Apuru tõ apoapõko sytatose tonurãkara samo tonure pyra exiketõ samo; tãxiahtao osetapãko sytatose, koko ahtao samo, poetome ro kuahtao xine aorihtyã sã ytoytõko sytatose.
Seromaroro awãnohnõko Ritonõpo mana; oenukehkapõko mana jũme pyra repe saereme osenuhmara oehtohme, tykase. Morarame axĩ akurũ xinukutumã sã ke tonukehse ynororo. Toytoytose; tarotarone tupise eya, tãtarypose ynororo.
Tãxiahtao xiaxiake ytoytõko matose tonurãkara samo, oemary ke oesemary zupĩko matose. Orẽnõko matose emero poko oerokurukohtao, oryhmatorỹko imehnõ mana, omõkomory kurã arõko imehnõ mana, typynanohneke pyra exĩko matose.
Yrome imepyny tyekyry zehno exikety xinukutumao ytokety sã mana. Ytoytõko mã repe, yrome tosemary onenepyra sã mana. Xinukutume exiryke osenuhmara mana.